ކަނޑުމަގުން އެތެރެކުރަން އުޅުނު 8 މިލިއަނަށްވުރެ ގިނަ ސިނގެރޭޓު އަތުލައިގަނެފި

ކަނޑުމަގުން ރާއްޖެއަށް ސިއްރުން އެތެރެކުރަން އުޅުނު 8 މިލިއަނަށްވުރެ ގިނަ ސިނގިރޭޓް ކަސްޓަމްސްއިން އަތުލައިގަނެފިއެވެ.

ކަސްޓަމްސްއިން ވިދާޅުވީ، ކަނޑުމަގުން ރާއްޖެ ގެނައި މުދާ ޝިޕްމަންޓެއްގައި ޤާނޫނާއި ގަވާއިދާ ހިލާފު ތަކެތި ހުރިކަމަށް ބެލެވިގެން، ސެޕްޓެމްބަރ 27 ވަނަ ދުވަހު، މާލޭ ވިޔަފާރި ބަނދަރުގައި، ހާއްސަ އޮޕަރޭޝަނެއް ހިންގާފައިވާ ކަމަށެވެ.

މި އޮޕަރޭޝަންގައި "ޖެނެރަލް ކާގޯ" ގެ ގޮތުގައި ޑިކްލެއަރކޮށްފައިވާ ޝިޕްމަންޓެއް ބަލައިފާސްކޮށްފައިވާ ކަމަށާއި، އެ ޝިޕްމަންޓްގެ ތެރެއިން ގިނަ އަދަދެއްގެ ސިނގިރޭޓު ފޮށިތައް ފެނިފައިވާ ކަމަށް ކަސްޓަމްސްއިން ވިދާޅުވިއެވެ.

އެގޮތުން ޖުމްލަ 8,527,480 ސިނގިރޭޓު ސްޓިކްސް ހޯދައި، އެ އިދާރާގެ ބެލުމުގެ ދަށަށް މިހާރު ގެންގޮސްފައިވާ ކަމަށާއި، މި މައްސަލަ މިހާރު ދަނީ އިތުރަށް ތަހުގީގުކުރައްވަމުން ކަމަށް ކަސްޓަމްސްއިން  ވިދާޅުވިއެވެ.

ކަނޑުމަގުން ރާއްޖެއަށް ސިއްރުން އެތެރެކުރަން އުޅުނު 8 މިލިއަނަށްވުރެ ގިނަ ސިނގިރޭޓް ކަސްޓަމްސްއިން އަތުލައިގެންފި. pic.twitter.com/tmOsG3SdIE

— Maldives Customs Service (@CustomsMv) September 29, 2026

ދުންފަތުގެ ޤާނޫނު ހަރުކަށި ކުރުމާ ގުޅިގެން، ވަގަށް ސިނގިރޭޓާއި އެހެނިހެން ދުންފަތުގެ ބާވަތްތައް އެތެރެކުރަން އުޅޭ ފަރާތްތައް ހުއްޓުވުމަށް ސަރުކާރުން ދަނީ ހަރުދަނާ ފިޔަވަޅުތަކެއް އަޅަމުންނެވެ. މިގޮތުން މިހާރުވެސް އެފަދަ ބޮޑެތި އެތައް މައްސަލަތަކެއް ކަމާބެހޭ އިދާރާތަކުން ދަނީ ތަހުޤީޤު ކުރަމުންނެވެ.

ޤާނޫނާ ޚިލާފު މިފަދަ އަމަލުތައް ހިންގާ ފަރާތްތަކާމެދު، ވަކި މީހަކަށް ބެލުމެއް ނެތި ޤާނޫނު ތަންފީޒު ކުރަމުންދާނެ ކަމަށް ސަރުކާރުން މީގެ ކުރިން ވެސް ހާމަކޮށްފައިވެއެވެ. އަދި ރާއްޖޭގެ ބޯޑަރުތަކުގެ ސަލާމަތާއި ރައްކާތެރިކަން ކަށަވަރުކުރުމަށް ކަސްޓަމްސް އާއި އެހެނިހެން ސަލާމަތީ ބާރުތަކުން ގުޅިގެން މަސައްކަތް ކުރަމުންދާނެ ކަމަށްވެސް ސަރުކާރުން ވަނީ ހާމަކޮށްފައެވެ.