ވިޔަފާރި / ޚަބަރު
އެސްޓީއޯއިިން "އަމުލް" ބްރޭންޑްގެ އުފެއްދުންތައް ރާއްޖެއަށް ތައާރަފްކޮށްފި
އެސްޓީއޯއިން "އަމުލް" ބްރޭންޑް ތަޢާރަފް ކުރުން. ފޮޓޯ: އެސްޓީއޯ
މިހާރު ކުރިއަށްދާ ހޮޓެލް އޭޝިއާ އެގްޒިބިޝަންގައި އެސްޓީއޯ ޖެނެރަލް ޓްރޭޑިންގުން ދުނިޔޭގެ މަޝްހޫރު ބްރޭންޑެއް ކަމަށްވާ "އަމުލް" ގެ އުފެއްދުންތައް ރަސްމީކޮށް ތައާރަފްކޮށްފިއެވެ. އެސްޓީއޯގެ ސްޓޯލްގައި މިއަދު ބޭއްވި ހާއްސަ ހަފްލާއެއްގައި މި އުފެއްދުންތައް ތައާރަފު ކޮށްދެއްވީ އެ ކުންފުނީގެ އެކްސްކޯ މެންބަރުންނެވެ.
މި ތައާރަފްކުރުމާއެކު، މިއަދުން ފެށިގެން އަމުލް ބްރޭންޑްގެ މަގުބޫލު އުފެއްދުންތައް ކަމުގައިވާ ކިރާއި، ބަޓަރު، ޗީޒް އަދި އެކި ބާވަތްތަކުގެ އައިސްކްރީމް އެސްޓީއޯ ޕީޕަލްސް ޗޮއިސްއިން ލިބެން ހުންނާނެއެވެ. މީގެއިތުރުން ހޮޓެލް އޭޝިއާ އެގްޒިބިޝަންގައި ހުންނަ އެސްޓީއޯގެ ސްޓޯލުން އަމުލްގެ ޕްރޮޑަކްޓްތައް ބޭނުންކޮށްގެން ތައްޔާރުކޮށްފައިވާ މީރު ފޮނިކާތަކެއްޗާއި އައިސްކްރީމް ތަޖުރިބާކޮށްލުމުގެ ފުރުސަތުވެސް ވަނީ ހުޅުވާލާފައެވެ.
އަމުލް (އާނަންދު މިލްކް ޔޫނިއަން ލިމިޓެޑް) އަކީ ކިރުގެ އުފެއްދުންތަކަށް ހާއްސަ އިންޑިއާގެ އެންމެ ބޮޑު އެއް ބްރޭންޑެވެ. މި ބްރޭންޑަކީ ދުނިޔޭގެ އެކި ކަންކޮޅުތަކުގައި "ދަ ޓޭސްޓް އޮފް އިންޑިއާ" ގެ ނަމުން މަޝްހޫރުވެފައިވާ އިތުބާރު ހިފޭ ބްރޭންޑެކެވެ.
އެސްޓީއޯގެ ސްޓޯލަށް ޒިޔާރަތްކުރާ ފަރާތްތަކަށް ހާއްސަކޮށްގެން ކޮފީ ސްޓޭޓްގެ ހޮވާލެވޭ ބުއިންތަކާއެކު ޝައުގުވެރި ޕްރޮމޯޝަނަލް ހަރަކާތްތަކެއްވެސް ވަނީ ރާވާފައެވެ. އެގޮތުން ސްޓޯލުގައި ރަޖިސްޓްރީވާ ފަރާތްތަކުގެ މެދުގައި ކުރިއަށްދާ "ރެޖިސްޓަރ އެންޑް ވިން" ހަރަކާތުން ކޮންމެ ދުވަހަކު ގުރުއަތުން ހޮވޭ ނަސީބުވެރި އެއް ފަރާތަކަށް އިނާމު ދިނުމަށް ވަނީ ހަމަޖެހިފައެވެ. މީގެއިތުރުން، އެސްޓީއޯ ޕީޕަލްސް ޗޮއިސް ޕޭޖް ފޮލޯކޮށްގެން ކުރިއަށްގެންދާ "ފޮލޯ އެންޑް ވިން" ހަރަކާތުގެ ނަސީބުވެރިޔާއަށް ޑިޝްވޮޝަރެއް ލިބުމުގެ ފުރުސަތުވެސް ވަނީ ފަހިކޮށްދީފައެވެ.
މި އަހަރުގެ ހޮޓެލް އޭޝިއާ އެގްޒިބިޝަން ކުރިއަށްދަނީ މި މަހުގެ 28 އިން ފެށިގެން 30 ވަނަ ދުވަހުގެ ނިޔަލަށް ހުޅުމާލޭ ސިންތެޓިކް ޓްރެކްގައެވެ.
Ads by MSS
