މޯލްޑިވިއަންގެ އައު ސީޕްލޭން ޓަރމިނަލް ރަސްމީކޮށް ހުޅުވައިފި

ދިވެހިރާއްޖޭގެ ޤައުމީ އެއަރލައިން، މޯލްޑިވިއަންގެ އައު ސީޕްލޭން ޓަރމިނަލް ރަސްމީކޮށް ހުޅުވައިފިއެވެ.

މި ޓަރމިނަލް ރަސްމީކޮށް ހުޅުއްވައިދެއްވީ މިކަމަށްޓަކައި މިއަދު ބޭއްވި ޚާއްޞަ ރަސްމިއްޔާތެއްގައި، ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީންއެވެ. މި ރަސްމިއްޔާތުގައި މޯލްޑިވިއަން ހިންގާ އައިލެންޑް އޭވިއޭޝަން ސާވިސަސް (އައިއޭއެސް) ގެ މެނޭޖިން ޑިރެކްޓަރު އިބްރާހިމް އިޔާސް އާއި އެ ކުންފުނީގެ އިސްވެރިންގެ އިތުރުން އޭވިއޭޝަން ދާއިރާގެ ގިނަ ބޭފުޅުން ބައިވެރިވެވަޑައިގެންނެވިއެވެ.

މޯލްޑިވިއަންގެ އައު ސީޕްލޭން ޓަރމިނަލް ތަރައްގީކޮށްފައި ވަނީ އެންމެ ޒަމާނީ ފެންވަރުގެ ޚިދުމަތްތަކެއް ފަސިންޖަރުންނަށް ދެވޭނެ އިންތިޒާމުތަކާ އެކުގައެވެ. 

އައިލެންޑް އޭވިއޭޝަނުން މައުލޫމާތު ދޭ ގޮތުގައި، މި ޓަރމިނަލް ތަރައްގީކޮށްފައިވަނީ ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކާ ފުޅާ ދާއިރާއެއްގައި މަޝްވަރާކުރުމަށް ފަހުގައެވެ. އެގޮތުން މުޅި ޓަރމިނަލް ފަރުމާކޮށްފައި ވަނީ ރާއްޖެ އަންނަ ފަތުރުވެރިންނަށް ރާއްޖޭގެ ޤުދުރަތީ ރީތިކަމާއި މުއްސަނދި ސަގާފަތް ދައްކުވައިދޭ ފަދަ ހިތްގައިމު ގޮތަކަށެވެ.

މި ޓަރމިނަލްގައި ހިމެނޭ މުހިންމު ޚިދުމަތްތަކަށް ބަލާއިރު، "ހުވަނދުމާ" ލައުންޖްގެ އިތުރުން 2 ޕްރައިވެޓް ލައުންޖެއް ވަނީ ޤާއިމުކޮށްފައެވެ. މީގެއިތުރުން، ކުޑަކުދިންނަށް ހާއްސަ ސަރަހައްދަކާއި، މޯލްޑިވިއަންގެ އަމިއްލަ ބްރޭންޑްގެ ސުވެނިއަރ އަދި ކާބޯތަކެތި ލިބޭނެ ކިއޮސްކެއްވެސް މި ޓަރމިނަލްގައި ވަނީ ހިމަނާފައެވެ. ޖާގައިގެ ގޮތުން ބަލާއިރު، ޓަރމިނަލްގެ އެތެރޭގައި އެއްފަހަރާ 90 މީހުންނަށް އަދި ބޭރުގައި 40 މީހުންނަށް ހިދުމަތް ދިނުމުގެ ތަނަވަސްކަން ވަނީ ގާއިމުކޮށްފައެވެ.

_{މޯލްޑިވިއަންގެ އައު ސީޕްލޭން ޓަރމިނަލް ހުޅުވުމަށް ބޭއްވި ރަސްމިއްޔާތުގެ ތެރެއިން / ފޮޓޯ: ޕީއެސްއެމް}

ތިމާވެށި ރައްކާތެރިކުރުމަކީ މި މަޝްރޫޢުގައި ވަރަށް ބޮޑު އިސްކަމެއް ދީފައިވާ ކަމެކެވެ. އެގޮތުން ޕްލާސްޓިކް ފުޅި ކަނޑަށް އެޅުނަ ނުދިނުމަށްޓަކައި ވޭސްޓް ބޮޓްލް ރީސައިކަލް ކުރެވޭނެ ޒަމާނީ ނިޒާމެއް ވަނީ ގާއިމުކޮށްފައެވެ. އަދި ދަތުރުވެރިން އެއްތަނުން އަނެއްތަނަށް އުފުލުމަށް ބޭނުންކުރާ ވެހިކަލްތަކުގެ ތެރޭގައި ތިމާވެއްޓާ ރައްޓެހި ބީވައިޑީގެ ބެޓެރި ވެހިކަލްތައް ބޭނުންކުރަން ވަނީ ފަށާފައެވެ. 

މޯލްޑިވިއަންގެ ސީޕްލޭން ފްލީޓުގައި މިވަގުތުވެސް 11 ބޯޓު އޮޕަރޭޓް ކުރަމުން އަންނައިރު، ޚިދުމަތް އިތުރަށް ފުޅާކުރުމުގެ ގޮތުން އިތުރު 2 ސީޕްލޭން ގެނައުމުގެ މަސައްކަތް އެ ކުންފުނިން މިހާރުވެސް ދަނީ ކުރަމުންނެވެ. އައު ޓަރމިނަލާއެކު މޯލްޑިވިއަންގެ ސީޕްލޭން އޮޕަރޭޝަންތަކަށް ބޮޑު ކުރިއެރުމެއް ލިބިގެންދާނެ ކަމަށް އެ ކުންފުނިން ވިދާޅުވެއެވެ.