ސަރުކާރުން ގެނައި ބަދަލުތަކުގެ ހެޔޮ ފައިދާ ގައުމީ އެއަރލައިނަށް ދަނީ ކުރަމުން: އަމީން

ސަރުކާރުން މޯލްޑިވިއަންގެ ހިންގުމަށް ގެނައި ހެޔޮ ބަދަލުތަކުގެ ރަނގަޅު ނަތީޖާ މިހާރު ފެންނަމުންދާ ކަމަށް ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.

ވަޒީރު އަމީން މިހެން ވިދާޅުވީ ވެލާނާ އިންޓަނޭޝަނަލް އެއާޕޯޓުގައި ބޭއްވި މޯލްޑިވިއަންގެ އައު ސީޕްލޭން ޓާމިނަލް ރަސްމީކޮށް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.

މި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ފާހަގަކުރެއްވި ގޮތުގައި، މޯލްޑިވިއަންއަކީ މީގެ ކުރިން ދައުލަތަށް ފައިދާ ހޯދައިދިނުމުގައި ވަރަށް ރަނގަޅު ނަމޫނާއެއް ދެއްކި ކުންފުންޏެކެވެ. ނަމަވެސް، 2018 އިން 2023 އަށް އެކަށީގެންވާ ގޮތެއްގައި ކުންފުނީގެ ކަންކަން ނުހިންގުމުގެ ސަބަބުން ކުންފުނީގެ ހާލަތު ވަރަށް ބޮޑަށް ދަށްވެ، ބޮޑެތި ދަރަނިތަކާ ކުރިމަތިލާން ޖެހުނު ކަމަށް އޭނާ ވިދާޅުވިއެވެ.

މުޅި އޮޕަރޭޝަންސް ހުއްޓުމަކަށް އައިސް، މިތާގައި ސަރވިސްކުރަމުންދިޔަ ކޮންޓްރެކްޓްތަކެއް ގެއްލި ވަރަށް ބަލިކަށި ހާލަތަކަށް ކުންފުނި އައި. 2023ގެ ފަހުން ކުންފުނީގެ މެނޭޖްމެންޓާއި، ހިންގުމަށް ގެނައި ބަދަލުން، ބޮޑު ދަރަންޏެއް 5 އަހަރު އޮއްވާ މިދިޔަ އަަހަރު ބަލާލި އިރު ކުންފުނި ޓަރންއެރައުންޑްކޮށްފި.

ވަޒީރު މުޙައްމަދު އަމީން ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަމާޒަކީ ކުރިއަށް އޮތް ތަނުގައިވެސް މޯލްޑިވިއަން އިތުރަށް ހަރުދަނާކޮށް، ދެމެހެއްޓެނިވި ގޮތެއްގައި ކުރިއެރުވުން ކަމަށް ވަޒީރު ވިދާޅުވިއެވެ. އަދި މޯލްޑިވިއަންއަކީ ދިވެހިންގެ ފަޚުރެއްކަން ފާހަގަކުރައްވަމުން، މިދިޔަ 3 އަހަރުގެ ތެރޭގައި ސީޕްލޭންގެ ޚިދުމަތް އައު މޮޑެލްއަކަށް ބަދަލުކުރުމުގެ މަސައްކަތް ކުރަމުންދާ ކަމަށްވެސް ވިދާޅުވިއެވެ.

މީގެއިތުރުން، ހަމައެކަނި ކުންފުންޏަށް އުމްރާނީ އަދި ރައުސުލްމާލު ހޯދުމަށް އިސްކަންދިނުމުގެ ބަދަލުގައި، މޯލްޑިވިއަންގައި މަސައްކަތްކުރާ މުވައްޒަފުންގެ މަސައްކަތުގެ މާހައުލު ރަނގަޅުކޮށް، ފަހިކޮށްދިނުމަށް މި ސަރުކާރުން ޚާއްޞަ އިސްކަމެއް ދެއްވާނެ ކަމަށްވެސް ވަޒީރުގެ ވާހަކަފުޅުގައި ފާހަގަކުރެއްވިއެވެ.