ކުޑަކުދިންގެ ހައްޤުތައް ރައްކާތެރިކުރުމުގެ ޤާނޫނު މުރާޖާކުރަނީ

ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނު މުރާޖާ ކުރުމުގެ މަސައްކަތް ފެށުމަށް ނިންމާފައިވާކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ހާމަކުރައްވައިފިއެވެ. މި ޤާނޫނަކީ 2019 ވަނަ އަހަރުގެ ނޮވެމްބަރު 20 ގައި ތަސްދީޤުކޮށް، 2020 ވަނަ އަހަރުގެ ފެބްރުއަރީ 20 އިން ފެށިގެން ޢަމަލުކުރަން ފެށި ޤާނޫނެކެވެ. މި ޤާނޫނަށް ޢަމަލުކުރަން ފެށުމުގެ ކުރިން ޢަމަލުކުރަމުން އައީ 1991 ވަނަ އަހަރު ފާސްކުރި ކުޑަކުދިންގެ ޙައްޤުތަކާބެހޭ ޤާނޫނަށެވެ.

ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން ސްޓޭޓް މިނިސްޓަރ ޒީނާޒް އަދުނާން ވިދާޅުވީ، ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނަށް އަހަރުތަކެއް ވެފައިވާއިރު ޤާނޫނު މުރާޖާކޮށް ގެންނަންޖެހޭ ބަދަލުތައް ބަލަމުންދާނެ ކަމަށެވެ.

"އަޅުގަނޑުމެންނަށް ހޯދިފައިވާ ޑޭޓާތަކާއި މި ނިޒާމްގެ ތެރޭގައި މަސައްކަތްކުރާ ހުރިހާ އެންމެނާއެކު މަސައްކަތްކޮށް ރަނގަޅު ޕްރޮސެސްއެއްގެ ތެރެއިން މި މަސައްކަތް ކުރިއަށްދާނީ،" 

ޒީނާޒް ވިދާޅުވިއެވެ.

ރާއްޖެއިން ބައިވެރިވެފައިވާ ބައިނަލްއަޤްވާމީ މުޢާހަދާތަކަށް އަލިއަޅުއްވާލައްވަމުން ސްޓޭޓް މިނިސްޓަރ ވިދާޅުވީ، ކުޑަކުދިންނަށް ކުރާ އަނިޔާ ހުއްޓުވުމުގެ "ބޮގޯޓާ ކޯލް ޓު އެކްޝަން" ޤަރާރުގައި ސޮއިކުރުމުގެ އިތުރުން ކޮންވެންޝަން އޮން ދަ ރައިޓްސް އޮފް ޗިލްޑްރަން (ސީއާރްސީ) ގެ 6 އަދި 7 ވަނަ ރިޕޯޓް ވެސް ރާއްޖެއިން ހުށަހަޅާފައިވާ ކަމަށެވެ. އަދި ސީއާރްސީ ކޮމިޓީން ހުށަހަޅާފައިވާ ކަންކަމަށް ރިޢާޔަތްކޮށް، ކުޑަކުދިން ބައިވެރިވާ ކަންކަމުގައި އެކުދިންގެ ޚިޔާލާއި މަޝްވަރާ ހޯދުމުގެ ޕޮލިސީއެއް އެކުލަވާލަމުންދާ ކަމަށާއި، މި އަހަރުގެ ނިޔަލަށް އެ ޕޮލިސީގެ ފައިނަލް ޑްރާފްޓް އެކުލަވާލެވޭނެ ކަމަށް ވިދާޅުވިއެވެ.

މިކަމާ ގުޅޭގޮތުން ޗައިލްޑް ޕްރޮޓެކްޝަން ސްޕެޝަލިސްޓް މުހައްމަދު ނައީމް ވިދާޅުވީ، ޤާނޫނު މުރާޖާކުރާއިރު އެ ޤާނޫނު ތަންފީޒުކުރުމުގައި ކުރެވިފައި ހުރި ކަންކަމާއި ދިމާވެފައިވާ ގޮންޖެހުންތައް ދެނެގަތުމަކީ ވަރަށް މުހިންމު ކަމެއް ކަމަށެވެ.

"ޤާނޫނެއް ހަދާފައި ތަންފީޒްކުރުން އެންމެ އުނދަގޫކަމަކަށް ވަނީ. އެހެންވީމަ ތަންފީޒްކުރުމުގައި ކޮންކަހަލަ ގޮންޖެހުންތަކެއްތީ ދިމާވެފައި ހުރީ. ކީއްވެގެންތޯ އެ ގޮންޖެހުންތައް ދިމާވަނީ. އެކަމަށް ބަލާލުން މުހިއްމު،" 

ނައީމް ފާހަގަކުރެއްވިއެވެ.

ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނުގެ މައިގަނޑު މަޤްޞަދަކީ، ޤާނޫނުއަސާސީއާއި ބައިނަލްއަޤުވާމީ މުޢާހަދާތަކާ އެއްގޮތަށް ރާއްޖޭގައި ކުޑަކުދިންގެ ޙައްޤުތައް ރައްކާތެރިކޮށް ކަށަވަރުކޮށްދިނުމެވެ. މީގެއިތުރުން ކުދިންނަށް އަޅައިލުމާއި ރައްކާތެރިކަން ދިނުމުގައި ޢާއިލާއާއި، ބެލެނިވެރިންނާއި، މުޖުތަމަޢު އަދި ދައުލަތުގެ ޒިންމާތައް ކަނޑައަޅައި، އެހީތެރިކަން ބޭނުންވާ ކުދިންނާއި ޢާއިލާތަކަށް އެއްބާރުލުން ފޯރުކޮށްދިނުމަކީ ވެސް މި ޤާނޫނުގެ މުހިންމު ބޭނުމެކެވެ.