އަމީނީމަގުގެ ބަންދުކުރި ބައި އާދީއްތަ ދުވަހު ހުޅުވަނީ

އަމީނީ މަގުގައި މަރާމާތުކުރި ސަރަޙައްދު އަންނަ އާދިއްތަ ދުވަހު އާންމު ދަތުރުފަތުރަށް ހުޅުވާލާނެ ކަމަށް ބިނާރާއި ގެދޮރުވެރިކަމާ ޢުމްރާނީ ތަރައްޤީއާ ބެހޭ ވުޒާރާއިން ވިދާޅުވެއްޖެއެވެ.

 މަގު މަރާމާތުކުރުމުގެ މި މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލުކޮށްފައިވަނީ ޖޫން މަހުގެ 15 ވަނަ ދުވަހުއެވެ.

އަމީނީ މަގުގައި ހަލާކުވެފައިވާ ސަރަހައްދު މަރާމާތުކުރުމުގެ މަސައްކަތް ކުރިއަށްގެންދަނީ ސެގްމަންޓްތަކަކަށް ބަހާލައިގެންނެވެ. އެގޮތުން ދުއްވުމަށް ހުޅުވާލުމަށް ތައްޔާރުވެފައިވަނީ ސެގްމަންޓް 1 ގެ ގޮތުގައި ހިމެނޭ ދިވެހިރާއްޖޭގެ އަޑުން ފެށިގެން ދަރުމަވަންތަ ހޮސްޕިޓަލާ ހަމައަށް އޮތް ސަރަހައްދެވެ. މީގެއިތުރުން ސެގްމަންޓް 2 ގެ ގޮތުގައި ދިވެހިރާއްޖޭގެ އަޑު ކުރިމަތިން އޮންނަ ހަތަރުއަނގޮޅި ކަންމަތީގައި ތާރު އެޅުމުގެ މަސައްކަތްވެސް މިހާރު ވަނީ ނިންމާފައެވެ. މި ސަރަޙައްދުތަކުގައި ކުރިން އަޅާފައިވާ ތާރުގަނޑު ނަގައި، މަގުގެ އަޑީގެ ނެޓްވޯކްތައްވެސް ވަނީ އަލުން ތަރުތީބުކޮށްފައެވެ.

ތާރުގެ މަސައްކަތް ނިމި، މިހާރު ކުރިއަށްދަނީ ޓްރެފިކް ނިޝާންތައް ކުރެހުމާއި ފިނިޝިންގ މަސައްކަތްތަކެވެ. ބިނާރާ ބެހޭ ވުޒާރާއިން ވިދާޅުވީ، މަގުގެ އެންމެހާ މަސައްކަތްތައް ނިންމުމަށްފަހު އާދީއްތަ ދުވަހު މަގު ހުޅުވާލާނެ ކަމަށެވެ. އަދި މިއަށްފަހު ދެން ފަށާނީ ސެގްމަންޓް 3 ގެ މަސައްކަތެވެ. މި ސެގްމަންޓްގެ ދަށުން މަސައްކަތް ކުރިއަށްދާނީ އިއްޒުއްދީން މަގާ ހަމައިން ފެށިގެން ކޯރުކެނޑި ހިނގުމާ ހަމައަށް އޮންނަ ސަރަޙައްދުގައެވެ.

އަމީނީ މަގު މާފަންނާވީ ފަޅީގެ ބައިތައް މަރާމާތު ކުރުމުގެ މަސައްކަތް ކުރިއަށްގެންދިޔައީ، އެ ސަރަޙައްދުގެ ތާރުގަނޑު ވަރަށް ބޮޑަށް ހަލާކުވެ ވަޅުގަނޑުތައް ހެދެމުންދާތީ، އުޅަނދުތައް ދުއްވުމަށް ދަތިވުމުގެ ސަބަބުންނެވެ. އެ ސަރަޙައްދަކީ ބަސް ދަތުރުކުރާ އަދި ގިނަ އަދަދަކަށް ހެވީ ވެހިކަލްތައްވެސް ދުއްވާ މަގެކެވެ.

މާލޭގެ މަގުތައް ޒަމާނީ ފެންވަރަށް ތަރައްޤީކުރުމަށް ކުރަމުންދާ މަސައްކަތުގެ ތެރެއިން، މާލޭގެ ހުޅަނގުކޮޅުން ބޭރު މަގު ތަރައްޤީކުރުމުގެ މަޝްރޫޢު ފެށުމަށްވެސް މިހާރު ވަނީ ތައްޔާރުވެފައެވެ. އެގޮތުން ވެސްޓް ޕާކް ސަރަޙައްދުން ބައެއް މިހާރު ވަނީ ފެން ހިންދާ ނިޒާމުގެ މަސައްކަތަށް ބަންދުކޮށްފައެވެ. ބޮޑުތަކުރުފާނު މަގު ތާރު އަޅައިގެން ތަރައްޤީކުރުމުގެ މަޝްރޫޢުގެ ދަށުން ހެންވޭރު ފެރީ ޓާމިނަލުން ފެށިގެން ނޯތް ހާބަރާ ހަމައަށް އޮތް ސަރަޙައްދުގެ މަސައްކަތް މުޅިން ނިމި، އެ ސަރަޙައްދުގެ ދަތުރުފަތުރާއި ޓްރެފިކް ތޮއްޖެހުމަށް މިހާރު ވަނީ ބޮޑު ލުޔެއް ލިބިފައެވެ.