އިންވެސްޓަރުން ފައްސާލާތީ އިދިކޮޅުގެ އިޚްލާސްތެރިކަމާމެދު ސުވާލު އުފެދޭ: ހީނާ

ރާއްޖެއަށް އަންނަ ބޮޑެތި އިންވެސްޓްމަންޓްތަކާ ގުޅޭގޮތުން ދޮގު ވާހަކަ ފަތުރައި، އިންވެސްޓަރުން ފައްސާލުމަށް ކުރެވޭ މަސައްކަތްތަކުގެ ސަބަބުން އިދިކޮޅު ފަރާތްތަކުގެ އިޚްލާސްތެރިކަމާމެދު ސުވާލު އުފެދޭ ކަމަށް ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ނުވަތަ މިނިސްޓަރު ހީނާ ވަލީދު ވިދާޅުވެއްޖެއެވެ.

ރަސްމާލެ މަޝްރޫޢާއި ގުޅޭގޮތުން އިދިކޮޅު ފަރާތްތަކުން ދައްކަމުންދާ ވާހަކަތަކަށް ރައްދު ދެއްވަމުން ހީނާ ވަލީދު އެކްސްގައި ކުރެއްވި ޕޯސްޓެއްގައި ވިދާޅުވީ، ރާއްޖެއަށް އަންނަ ބޮޑެތި އިންވެސްޓްމަންޓްތަކާ ބެހޭގޮތުން ދޮގު ވާހަކަ ފަތުރައި، ސަރުކާރާ ދޭތެރޭ ފިތުނަ އުފައްދައި، އިންވެސްޓަރުންގެ ހިތުގައި ލައްޖެއްސުމުގެ ނަތީޖާ މީގެ ކުރިންވެސް މި ޤައުމުން ފެނިގެން ގޮސްފައިވާ ކަމަށެވެ. އަދި އެކަން އެންމެ ބޮޑަށް ތަޖުރިބާ ކުރެވުނު ފާފު އަތޮޅުގެ މަޝްރޫޢުން ފިލާވަޅު ލިބިގެން، ރާއްޖެއަށް އަންނަ އިންވެސްޓަރުން ފައްސާލުމަށް މަސައްކަތް ކުރާތީ، ޤައުމާމެދު އޮތް އިޚްލާސްތެރި ނިޔަތާމެދު ސުވާލު އުފެދޭ ކަމަށް ވިދާޅުވިއެވެ.

ރާއްޖެއަށް އަންނަ ބޮޑެތި އިންވެސްޓްމަންޓްތަކާ ބެހޭގޮތުން ދޮގު ވާހަކަ ފަތުރާ ސަރުކާރާ ދޭތެރޭ ފިތުނަ އުފައްދާ އިންވެސްޓަރުންގެ ހިތުގައި ލަކުނު ޖައްސާ ލައްޖެއްސުމުގެ ނަތީޖާ މީގެ ކުރިންވެސް މިޤައުމުން ފެނިގެންދިޔަ. އެކަން އެންމެ ރަނގަޅަށް ތަޖުރިބާ ކުރެވުނު "ފާފު އަތޮޅުގެ" މަޝްރޫޢުން… pic.twitter.com/oti9tSVcKQ

— Heena Waleed 🇲🇻 (@HeenaWaleed) September 30, 2026

ރަސްމާލޭގެ އިންވެސްޓްމަންޓްގެ މުހިންމުކަން ފާހަގަކުރައްވަމުން ހީނާ ވިދާޅުވީ، އީގަލްސް ހިލްސްއިން ރަސްމާލޭގައި ކުރާ އިންވެސްޓްމަންޓުން ދައުލަތަށް ލިބޭނެ ކަމަށް ބެލެވޭ އާމްދަނީއަކީ ރާއްޖޭގެ 179 ރިސޯޓާއި، 16 ހޮޓަލާއި، 920 ގެސްޓްހައުސް އަދި 165 ސަފާރީން މިހާރު ލިބޭ އާމްދަނީއަށްވުރެ ބޮޑު އާމްދަނީއެއް ކަމަށެވެ. އަދި މިހާރު ފަތުރުވެރިކަމުގެ ދާއިރާގެ ޖުމްލަ އިންވެސްޓްމަންޓަކީ 13.7 ބިލިއަން ޑޮލަރު ކަމަށްވެސް އެކަމަނާ ފާހަގަކުރެއްވިއެވެ.

ހީނާ ވަލީދު އިތުރަށް ވިދާޅުވީ، ތާއަބަދު ނަފްރަތާއި ހަސަދަވެރިކަމުގެ އަނދިރިކަމުގެ ތެރޭގައި ނުތިބެ، ވެރިކަމުގެ ދަހިވެތިކަން އެއްފަރާތްކޮށް ޤައުމީ ވިސްނުމުގައި ކަންކަމާމެދު ވިސްނަން ވެއްޖެ ކަމަށެވެ.

މި ބިޔަ މަޝްރޫޢުގެ ސަބަބުން ދިވެހި ރައްޔިތުންނަށާއި ޤައުމުގެ އިޤްތިޞާދަށް އިންޤިލާބީ ބޮޑެތި މަންފާތަކެއް ލިބިގެންދާނެ ކަމަށް ވަނީ ފާހަގަކުރެވިފައެވެ. އެގޮތުން، މި މަޝްރޫޢުގެ އެޑްވާންސެއްގެ ގޮތުގައި، ޑިވެލޮޕަރުގެ އަމިއްލަ ޚަރަދުގައި ގާތްގަނޑަކަށް 7.7 ބިލިއަން ދިވެހި ރުފިޔާގެ އަގުހުރި، 3 ކޮޓަރީގެ 5،000 ހައުސިންގ ޔުނިޓް ހުޅުމާލޭގައި އަޅައިދިނުމަށް ވަނީ ހަމަޖެހިފައެވެ. މި ފްލެޓްތަކުގެ ކުލި ނެގުމާއި ރައްޔިތުންނާ ޙަވާލުކުރުމުގެ ފުރިހަމަ ބާރާއި އިޚްތިޔާރު އޮންނާނީ ހަމައެކަނި ދިވެހި ސަރުކާރަށެވެ. 

މާލީ ވަޒީރު ޙަސަން ޒަރީރު ވިދާޅުވި ގޮތުގައި، މި މަޝްރޫޢުގެ އެންމެހައި މާލީ މުޢާމަލާތްތައް ހިންގުމަށް ހަމަޖެހިފައިވަނީ ރާއްޖޭގެ ބޭންކިންގ ނިޒާމުގެ ތެރޭގައި ހުޅުވޭ ޚާއްޞަ އެސްކްރޯ އެކައުންޓުތައް މެދުވެރިކޮށެވެ. މީގެ ސަބަބުން ރާއްޖޭގެ އިޤްތިޞާދުގައި ބޭރު ފައިސާ ހިފެހެއްޓި، އާންމު ރައްޔިތުންނަށް ދިމާވެފައިވާ ޑޮލަރުގެ ތާށިކަމަށް ދާއިމީ ޙައްލެއް ލިބިގެންދާނެއެވެ.

ހަމައެއާއެކު، ރަސްމާލެއިން ހިއްކުމަށް ހަމަޖެހިފައިވާ 1،150 ހެކްޓަރުގެ ބިމުގެ ތެރެއިން އީގަލް ހިލްސްއަށް ކުއްޔަށް ދޫކުރުމަށް ހަމަޖެހިފައިވަނީ 500 ހެކްޓަރެވެ. ބާކީ އޮތް 600 އަށްވުރެ ގިނަ ހެކްޓަރަކީ ދިވެހި ރައްޔިތުންގެ ގެދޮރުވެރިކަމަށް ޚާއްޞަ ކުރެވިފައިވާ ބިމެއް ކަމަށްވާއިރު، މިއީ ޖުމްލަ 65،000 ހައުސިންގ ޔުނިޓު ތަރައްޤީކުރެވޭނެ ބޮޑު ސަރަޙައްދެކެވެ.