މިހާތަނަށް 28 ތެލެސީމިއާ ކުދިން ބޯންމެރޯ ޓްރާންސްޕްލާންޓް ހެދުމަށް ބޭރަށް ފޮނުވިއްޖެ: ވަޒީރު ޤީލާ

ސަރުކާރުގެ ހާއްސަ އެހީތެރިކަމާއެކު މިހާތަނަށް 28 ތެލެސީމިއާ ކުދިން ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ބޭރަށް ފޮނުވިފައިވާ ކަމަށް ސިއްހަތާއި އާއިލާއާއި އިޖްތިމާއީ އެހީއާ ބެހޭ ވަޒީރު ޑރ. ގީލާ އަލީ ވިދާޅުވެއްޖެއެވެ. އެކަމަނާ މިކަން ހާމަކުރެއްވީ ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ.

ވަޒީރު ގީލާ ވިދާޅުވީ ތެލެސީމިއާ ކުދިންނަށް ދާއިމީ ޝިފާއެއް ހޯދައިދިނުމަށްޓަކައި ޒަކާތު ފަންޑުން އެހީތެރިކަން ފޯރުކޮށްދިނުމާ ގުޅޭގޮތުން މިނިސްޓްރީ އޮފް އިސްލާމިކް އެފެއާޒާއި މިނިސްޓްރީ އޮފް ހެލްތާ ދެމެދު 2024 ވަނަ އަހަރުގެ ފެބުރުއަރީ 21 ގައި ފަހުމުނާމާއެއްގައި ސޮއިކުރެވިފައިވާ ކަމަށެވެ. އެ އެއްބަސްވުމުގެ ދަށުން، ކޮންމެ އަހަރަކު 10 ކުއްޖަކަށް، ބޮލަކަށް އެއް މިލިއަން ރުފިޔާއަށް ވުރެ އިތުރުނުވާނެ ގޮތުގެ މަތީން ޖުމްލަ 10 މިލިއަން ރުފިޔާ ހަރަދުކުރުމަށް ހަމަޖެހިފައިވާ ކަމަށާއި، މި އިންތިޒާމުގެ ތެރެއިން 28 ކުއްޖަކު ބޭރަށް ފޮނުވި ފަރުވާގެ ކަންކަން ކުރިއަށްދާ ކަމަށް ވިދާޅުވިއެވެ.

މީގެ އިތުރުން، ތެލެސީމިއާ ބަލި ތަހައްމަލުކުރަމުންދާ ކުދިންނަށް ދައުލަތުން ދެމުން އަންނަ މާލީ އިނާޔަތް މަހަކު 2،000 ރުފިޔާއަށް ބޮޑުކޮށްފައިވާ ކަމަށާއި، މިހާރު 500 އަށް ވުރެ ގިނަ ކުދިންނަށް އެ އެލަވަންސް ލިބެމުންދާ ކަމަށް ވަޒީރު ފާހަގަކުރެއްވިއެވެ.

ތެލެސީމިއާ ތަހައްމަލުކުރާ ފަރާތްތަކަށް ހާއްސަ އެލަވަންސެއް ހަމަޖައްސައިދެއްވުމަކީ ރައީސް މުއިއްޒުގެ މުހިންމު ވައުދުފުޅެއް. އެގޮތުން މި އަހަރުގެ ޖެނުއަރީ އިން ފެށިގެން މި ބަލި ތަހައްމަލުކުރާ ކޮންމެ ފަރާތަކަށް މާލީ އިނާޔަތުގެ ގޮތުގައި 1،000 ރުފިޔާ ދޭން ފެށުނު ނަމަވެސް، ރައީސްގެ ހާއްސަ ނިންމެވުމުގެ ދަށުން އެ އަދަދު މިހާރު ވަނީ 2،000 ރުފިޔާއަށް ބޮޑުކޮށްދެއްވާފައި. އެ ބަދަލާއެކު ރާއްޖޭގައި ތިބި 500 އަށް ވުރެ ގިނަ ތެލެސީމިއާ ކުދިންނަށް އެ އެލަވަންސް ގަވައިދުން ލިބެމުންދޭ،   

ޞިއްޙީ ވަޒީރު ޤީލާ އަލީ

ވަޒީރު އިތުރަށް ވިދާޅުވީ ތެލެސީމިއާ ކުދިންނާއި އެ ކުދިންގެ އާއިލާތަކުގެ ހާލަތު ރަނގަޅުކޮށް، އެކުދިންނަށް އުފާވެރި ދިރިއުޅުމެއް ހޯދައިދިނުމަށް ސަރުކާރުން އަންނަނީ ވަރަށް ބޮޑު އިސްކަމެއް ދީގެން ފުޅާ ދާއިރާއެއްގައި މަސައްކަތް ކުރަމުން ކަމަށެވެ.