"ފާޓިލިޓީ ކެއާ ފަންޑު" ގެ ދަށުން މިހާތަނަށް 15 މިލިއަނަށް ވުރެ ގިނަ ރުފިޔާ ދޫކޮށްފި

ދަރިމައިވުމުގައި ދަތިތައް ހުންނަ ފަރާތްތަކަށް އެހީތެރިކަން ފޯރުކޮށްދިނުމަށް ގާއިމުކުރި "ފާޓިލިޓީ ކެއާ ފަންޑު" ގެ ދަށުން މިހާތަނަށް 15 މިލިއަނަށް ވުރެ ގިނަ ރުފިޔާގެ އެހީ ދޫކޮށްފައިވާ ކަމަށް ސިއްހަތާއި އާއިލާއާއި އިޖްތިމާއީ އެހީއާ ބެހޭ ވަޒީރު ޑރ. ޤީލާ އަލީ ވިދާޅުވެއްޖެއެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު ވިދާޅުވީ، ދަރިމައިވުމުގެ ފަރުވާތަކަށް ދައުލަތުން މާލީ އެހީތެރިކަން ފޯރުކޮށްދިނުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެވަޑައިގެންނެވި ވައުދުފުޅާ އެއްގޮތަށް، ނޭޝަނަލް ފާޓިލިޓީ ކެއާ ޕްރޮގްރާމްގެ ހަރަދުތައް ހަމަޖެއްސުމަށްޓަކައި 2024 ވަނަ އަހަރުގެ ނޮވެމްބަރު މަހު ހާއްސަ ޓްރަސްޓް ފަންޑެއް އެކުލަވާލެވުނު ކަމަށެވެ.

ވަޒީރު ހާމަކުރެއްވި ތަފާސްހިސާބުތަކަށް ބަލާއިރު، މި ފަންޑުން 15,218,686.00 (ފަނަރަ މިލިއަން ދެ ލައްކަ އަށާރަ ހާސް ހަސަތޭކަ އަށްޑިހަ ހަ) ރުފިޔާ ހަރަދުކޮށް 105 ފަރާތަކަށް ފަރުވާގެ އެހީތެރިކަން ވަނީ ފޯރުކޮށްދީފައެވެ. އަދި ސަރުކާރުން ފޯރުކޮށްދިން މި އެހީތެރިކަމާއެކު މިހާތަނަށް ޖުމްލަ 38 ފަރާތެއް ދަރިމައިވެފައިވާ ކަމަށާއި، އޭގެ ތެރޭގައި ހިމެނެނީ ފަރުވާއަށްފަހު ވިހާފައިވާ 25 ފަރާތަކާއި، މިވަގުތު ބަލިވެއިނދެފައިވާ 13 ފަރާތެއް ކަމަށްވެސް ވަޒީރު ވިދާޅުވިއެވެ.

މީގެ އިތުރުން ރާއްޖޭގައި ފުރަތަމަ ފަހަރަށް އައިވީއެފް މެދުވެރިކޮށް ކުއްޖަކު އުފަންވެފައިވަނީ މި އަހަރުގެ ޖެނުއަރީ މަހުގައި ކަމަށާއި، މިއީ ދަރިމައިވުމުގެ ސިއްހަތާ ގުޅުންހުރި މައްސަލަތަކަށް ދާއިމީ ހައްލެއް ހޯދައިދެއްވުމަށް ރައީސް މުއިއްޒު ވެވަޑައިގެންނެވި ވައުދުފުޅުގެ ދަށުން ހުޅުވި ފާޓިލިޓީ ސެންޓަރުގެ ތާރީހީ ބޮޑު ކާމިޔާބީއެއް ކަމުގައި ވަޒީރު ފާހަގަކުރެއްވިއެވެ.

ދަރިމައިވުމުގެ ދަތިތައް ހުންނަ ފަރާތްތަކަށް އެހީތެރިވުމުގެ ގޮތުން 50 ދެމަފިރިއަކަށް އައިވީއެފް ހެދުމުގެ ފުރުސަތު ސަރުކާރުން ވަނީ ހަމަޖައްސައިދީފައި. އައިވީއެފް ޓްރީޓްމަންޓް ހިމެނޭހެން ދަރިމައިވުމާ ގުޅޭ އަގުބޮޑެތި ފަރުވާތައް އާސަންދަ މެދުވެރިކޮށް ލިބޭނެ އިންތިޒާމު ވެސް ސަރުކާރުން ވަނީ ހަމަޖައްސައިދީފައި،  

ވަޒީރު ޤީލާ އަލީ

ވަޒީރު އިތުރަށް ވިދާޅުވީ ދަރިމައިވުމުގެ ފަރުވާތައް ރާއްޖެއިން ލިބޭނެ މަގު ފަހިކޮށްދީ، އެކަމަށް ދައުލަތުން މާލީ އެހީތެރިކަން ދިނުމަކީ ރައީސް މުއިއްޒު ހާއްސަ އިސްކަމެއް ދެއްވައިގެން ކުރިއަށްގެންދަވާ، ދިވެހި އެތައް އާއިލާއަކަށް އުފާވެރިކަން ގެނެސްދެމުންދާ މުހިންމު ސިޔާސަތެއް ކަމަށެވެ.