ގުރައިދޫ މަރުކަޒުގައި 80 އެނދުގެ އައު ޢިމާރާތެއް އަޅަނީ

ކ. ގުރައިދޫގައި ހުންނަ ޚާއްޞަ އެހީއަށް ބޭނުންވާ މީހުންގެ މަރުކަޒު ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ ދަށުން، އެތަނުގައި 80 އެނދުގެ އައު ޢިމާރާތެއް އެޅުމަށް ބަޖެޓު ހަމަޖެހި، އެ މަސައްކަތް ބަޔަކާ ޙަވާލުކުރެވިފައިވާ ކަމަށް ސިއްހަތާއި، އާއިލާއާއި އިޖްތިމާއީ އެހީއާ ބެހޭ ވަޒީރު ޤީލާ ޢަލީ ވިދާޅުވެއްޖެ އެވެ.

 އެކަމަނާ މިކަން ހާމަކުރެއްވީ ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައެވެ.

ވަޒީރު ޤީލާ ޢަލީ ވިދާޅުވީ، ގުރައިދޫ މަރުކަޒުގެ ޖާގަ އިތުރުކޮށް ޚިދުމަތްތައް ހަރުދަނާކުރުމަށް އަޅާ އައު ޢިމާރާތުގެ މަސައްކަތް ކުރިއަށްދާއިރު، މުޅި މަރުކަޒު އެއްކޮށް ތަރައްޤީކުރުމަށްޓަކައި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާ ގުޅިގެން މާސްޓަރ ޕްލޭން އެކުލަވާލުމުގެ މަސައްކަތް ވެސް ބާރަށް ކުރިއަށްދާ ކަމަށެވެ.

މަރުކަޒީ ފަރުވާ ފުރިހަމަކުރާ ފަރާތްތައް އަނބުރާ މުޖުތަމަޢަށް ނެރެ ބާރުވެރިކުރުވުމަށް ކުރެވޭ މަސައްކަތްތަކަށް އަލިއަޅުއްވާލައްވަމުން ވަޒީރު ވިދާޅުވީ، އެ ފަރާތްތަކަށް ހުނަރު ތަރައްޤީކުރުމާއި ވަޒީފާގެ ފުރުޞަތުތައް ފަހިކޮށްދިނުމަށްޓަކައި ވެމްކޯ އަދި މޯލްޑިވްސް ޕޮލިޓެކްނިކާއެކު ފަހުމުނާމާއެއްގައި ސޮއިކުރެވިފައިވާ ކަމަށެވެ.

އަދި އެ ފަރާތްތައް މުޖުތަމަޢަށް ޝާމިލުކުރުން ހަރުދަނާކުރުމުގެ ގޮތުން ރާއްޖޭގެ އެކި ސަރަޙައްދުތަކުގައި ހޭލުންތެރިކުރުމުގެ 12 ސެޝަނެއް ބާއްވައި، 440 މީހުން ހޭލުންތެރިކޮށްފައިވާ ކަމަށް ވެސް ވަޒީރު ފާހަގަކުރެއްވި އެވެ. މި މަސައްކަތްތަކުގެ ދަށުން ނޮވެމްބަރު 2023 އިން ފެށިގެން މިހާތަނަށް މަރުކަޒީ ފަރުވާ ފުރިހަމަކުރި 66 ފަރާތެއް ވަނީ އަނބުރާ ޢާއިލާތަކާ ގުޅުވައިދީ، މުޖުތަމަޢުގެ ތެރެއަށް ނެރެދީފައެވެ.

ސަރުކާރުގެ މައިގަނޑު އަމާޒަކީ ޚާއްޞަ އެހީއަށް ބޭނުންވާ ފަރާތްތަކަށް އެކަށީގެންވާ ފަރުވާއާއި އަޅާލުން ދިނުމަށްފަހު، އެމީހުންނަކީ މުޖުތަމަޢުގައި އަބުރުވެރިކަމާއެކު އުޅެވޭނެ ބަޔަކަށް ހެދުން ކަމަށް ސިއްޙަތާއި ބެހޭ ވުޒާރާއިން ހާމަކުރެއެވެ.