އަންނަ މަހު އެމްޕަވަމަންޓް ހަބު ހުޅުވަނީ

ނުކުޅެދުންތެރިކަން ހުންނަ ފަރާތްތަކުގެ ހުނަރުތައް ތަރައްޤީކޮށް ކުރިއެރުވުމަށް ޕްރޮގްރާމްތައް ހިންގުމަށް ތަރައްޤީ ކުރާ "ކޮމިއުނިޓީ އެމްޕަވަމަންޓް ހަބް" އަންނަ އޮކްޓޫބަރު މަހު ހުޅުވުމަށް ތައްޔާރުވަމުންދާކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ހާމަކުރައްވައިފިއެވެ. މިކަން ހާމަކުރެއްވީ ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.

މި މަރުކަޒަކީ އިސްލާމީ ކަންތައްތަކާ ބެހޭ ވުޒާރާގެ ޒަކާތު ފަންޑުން ޚަރަދުކޮށް، އިޖުތިމާޢީ ތަރައްޤީއާއި ބެހޭ ވުޒާރާއާއި އެފްޑީސީ ގުޅިގެން ހުޅުމާލެ ފޭސް 2 ގައި 5500 އަކަފޫޓުގެ ޖާގައެއްގައި ތަރައްޤީ ކުރަމުންދާ ތަނެކެވެ. މި މަރުކަޒުގެ މައިގަނޑު އަމާޒަކީ އުމުރުން 18 އަހަރާއި 40 އަހަރާ ދެމެދުގެ ނުކުޅެދުންތެރިކަން ހުންނަ ފަރާތްތަކަށް ބޭނުންވާ ހުނަރާއި ޢިލްމު ފަހިކޮށްދީ، މަސައްކަތުގެ ތަޖުރިބާއާއި އިޤުތިޞާދީ މިނިވަންކަން ހޯދައިދިނުމެވެ.

 "މި މަރުކަޒު އޮކްޓޫބަރު މަހު ހުޅުވުމަށް ދަނީ ތައްޔާރުވަމުން. މި މަރުކަޒުގެ ބޭނުމަކީ ނުކުޅެދުންތެރިކަން ހުންނަ ފަރާތްތަކަށް ބޭނުންވާ ހުނަރާއި ޢިލްމު ފަހިކޮށްދިނުން. އަދި މިހާރުވެސް ކުރިއަށް އެބަގެންދެވޭ ސައިން ލޭންގުއޭޖް ޕްރޮގްރާމެއް. ވޮކެބްލަރީއެއް ތައާރަފްކުރުމުގެ މަސައްކަތް އެފަދަ ވޯކްޝޮޕެއްގެ މަސައްކަތް އެބަދޭ،" ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަޒީރު ވިދާޅުވިއެވެ.

 މީގެއިތުރުން، މި ސަރުކާރުން މިހާތަނަށް ނުކުޅެދުންތެރިކަން ހުންނަ 416 ފަރާތަކަށް ވަޒީފާގެ ފުރުސަތު ފަހިކޮށްދީފައިވާ ކަންވެސް ފާހަގަކުރެއްވިއެވެ.

މި އެމްޕަވަމަންޓް ހަބުގައި ހިމެނޭ ވަސީލަތްތަކުގެ ތެރޭގައި ހޮސްޕިޓަލިޓީ އަދި ކަލިނަރީ ތަމްރީނާއި މަސައްކަތުގެ ތަޖުރިބާ ފޯރުކޮށްދިނުމަށް ޚާއްސަ އިންކްލޫސިވް ކެފޭއަކާއި، ނުކުޅެދުންތެރިކަން ހުންނަ ފަރާތްތަކުން އުފައްދާ ތަކެތި ވިއްކުމަށް ޢާންމުންނަށް ހުޅުވާލެވިފައިވާ ފިހާރައެއް ހިމެނެއެވެ.

ހަމައެއާއެކު، ހުނަރު ތަރައްޤީ ކުރުމަށް 3 ވޯކްޝޮޕް ޖާގައާއި، ކޮމްޕިއުޓަރ އަދި އިންފޮމޭޝަން ޓެކްނޮލޮޖީގެ ތަމްރީން ދޭ ތަނެއްގެ އިތުރުން އިޖުތިމާޢީ ގުޅުން ބަދަހިކުރުމުގެ ހަރަކާތްތަކަށް ޚާއްސަ އެކްޓިވިޓީ ރޫމަކާއި މަލްޓި މީޑިއާ ރޫމެއްވެސް މި ހަބުގައި ގާއިމުކުރެވިގެންދާނެއެވެ.