"މި އަހަރު ސިއްހީ ދާއިރާގެ 33 މަޝްރޫއެއް ނިމޭނެ"

މި އަހަރުގެ ތެރޭގައި ސިއްހީ ދާއިރާއިން 33 މަޝްރޫއެއް ނިމޭނެ ކަމަށް ސިއްހަތާއި އާއިލާއާއި އިޖުތިމާއީ އެހީއާ ބެހޭ ވަޒީރު ގީލާ އަލީ ވިދާޅުވެއްޖެއެވެ.

ވަޒީރު މިހެން ވިދާޅުވީ، ސަރުކާރުން ކުރިއަށްގެންދާ ސިއްހީ މަޝްރޫއުތަކާ ގުޅޭގޮތުން މައުލޫމާތު ދެއްވުމަށް ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު ވިދާޅުވީ، ސިއްހީ ދާއިރާގެ އުމްރާނީ ތަރައްގީއަށް މިވަގުތު ޖުމްލަ 5.98 ބިލިއަން ރުފިޔާގެ 168 މަޝްރޫއެއް އެކި މަރުހަލާތަކުގައި ކުރިއަށްދާ ކަމަށެވެ. މީގެ ތެރޭގައި މުޅިން އަލަށް އިމާރާތްކުރާ 40 ހޮސްޕިޓަލާއި، 22 ސިއްހީ މަރުކަޒުގެ އިތުރުން، ފެންވަރު މަތިކުރުމަށް ހިންގާ 89 މަޝްރޫއެއް ހިމެނެއެވެ.

މިހާތަނަށް 22 މަޝްރޫއެއްގެ މަސައްކަތް އެއްކޮށް ނިމިފައިވާއިރު، 151 މަޝްރޫއެއްގެ އަމަލީ މަސައްކަތް މިހާރުވެސް ދަނީ ކުރިއަށެވެ. އަދި މި އަހަރުގެ ތެރޭގައި އަލަށް 17 މަޝްރޫއެއް ފެށުމަށް ހަމަޖެހިފައިވާއިރު، މިއަހަރުގެ ތެރޭގައި 33 މަޝްރޫއެއްގެ މަސައްކަތް އެއްކޮށް ނިންމާލެވޭނެ ކަމަށްވެސް ވަޒީރު ފާހަގަކުރެއްވިއެވެ.

ރާއްޖޭގެ އެކި ކަންކޮޅުތަކުގައި ސިއްހީ ހިދުމަތްތައް ފުޅާކުރުމަށް ކުރެވެމުންދާ މަސައްކަތްތަކުގެ ތަފްސީލު ހާމަކުރައްވަމުން ވަޒީރު ވިދާޅުވީ:

• އެމްއާރުއައިގެ ހިދުމަތް:  އުނގޫފާރު ރީޖަނަލް ހޮސްޕިޓަލުގައި މި ހިދުމަތް މިހާރު ފަށާފައިވާއިރު، ގދ. އަތޮޅާއި، ލ. އަތޮޅު އަދި ފުވައްމުލަކު ހޮސްޕިޓަލުގައި މި ހިދުމަތް ފެށުމުގެ މަސައްކަތް ދަނީ ކުރެވެމުންނެވެ.
• ސީޓީ ސްކޭންގެ ހިދުމަތް:  ފުވައްމުލަކު ހޮސްޕިޓަލުގައި ސީޓީ ސްކޭންގެ ހިދުމަތް ފަށާފައިވާއިރު، އިތުރު 8 ރަށެއްގައި މި ހިދުމަތް ގާއިމުކުރުމުގެ މަސައްކަތް ދަނީ ކުރެވެމުންނެވެ. އެއީ ހއ. ދިއްދޫ، ބ. އޭދަފުށި، ޅ. ނައިފަރު، އދ. މަހިބަދޫ، ފ. ނިލަންދޫ، ދ. ކުޑަހުވަދޫ، ލ. ފޮނަދޫ އަދި ތ. ވޭމަންޑޫގައެވެ.
• މެމޮގްރަފީގެ ހިދުމަތް:  ފުވައްމުލަކު އަދި ބ. އަތޮޅު ހޮސްޕިޓަލުގައި މި ހިދުމަތް ގާއިމުކުރެވިފައިވާއިރު، ގއ، ހއ. އަދި ށ. އަތޮޅު ހޮސްޕިޓަލުގައި މި ހިދުމަތް ގާއިމުކުރުމުގެ މަސައްކަތް ދަނީ ކުރެވެމުންނެވެ.
• އެކްސްރޭ އަދި އަލްޓްރާ ސައުންޑް ސްކޭން:  މިހާތަނަށް 17 ސިއްހީ މަރުކަޒެއްގައި އަލްޓްރާ ސައުންޑް ސްކޭންގެ ހިދުމަތް އަދި 4 ސިއްހީ މަރުކަޒެއްގައި އެކްސްރޭގެ ހިދުމަތް ވަނީ ގާއިމުކުރެވިފައެވެ. މީގެ އިތުރުން އިތުރު 16 ސިއްހީ މަރުކަޒެއްގައި އެކްސްރޭގެ ހިދުމަތް ގާއިމުކުރުމުގެ މަސައްކަތް ދަނީ ކުރިއަށެވެ.

ވަޒީރު އިތުރަށް ފާހަގަކުރެއްވި ގޮތުގައި، ސަރުކާރުން ސިއްހީ ދާއިރާއިން ވެފައިވާ 478 ވައުދުގެ ތެރެއިން 244 ވައުދެއް މިހާރު ވަނީ ފުއްދައިދެވިފައެވެ. އެއީ ޖުމްލަ ވައުދުތަކުގެ 67 އިންސައްތައެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ އަމާޒަކީ ރައްޔިތުންނާ ވީހާވެސް ގާތުން، ފެންވަރު ރަނގަޅު ސިއްހީ ހިދުމަތްތައް ފޯރުކޮށްދިނުން ކަމަށްވެސް ވަޒީރު ވިދާޅުވިއެވެ.