މާލެ އުތުރު ފަރާތުގައި އަޅާ ޖެޓީތަކުގެ މަސައްކަތަށް އެ ސަރަހައްދު ހުސްކުރަން އެދެފި

މާލެ އުތުރު ފަރާތު ބަނދަރު ބޭނުންކުރުމުގައި ދިމާވާ ދަތިތަކަށް ދާއިމީ ހައްލެއް ހޯދައިދިނުމުގެ ގޮތުން، އެ ސަރަހއްދުގެ ޖެޓީތައް ތަރައްގީކުރުމުގެ އަމަލީ މަސައްކަތް ފެށުމަށްޓަކައި އެ ސަރަހައްދުގައި އަޅާފައިވާ އުޅަނދުތައް ނަގައިދިނުމަށް މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓް އިން އެދިވަޑައިގެންފިއެވެ.

އެ މިނިސްޓްރީން ކުރި އިއުލާނެއްގައި އެދިފައި ވަނީ، މާލޭގެ އުތުރު ފަރާތު ބަނދަރުގެ ޖެޓީތައް ޒަމާނީ ފެންވަރަށް ތަރައްގީކުރުމަށް ހަމަޖެހިފައިވާތީ، މަސްވެރިންގެ ޕާކު ސަރަހައްދުން ފެށިގެން ނާދީ ގޯޅިއާ ހަމައަށް އަޅާފައިވާ އެންމެހައި އުޅަނދުފަހަރު ނަގައި އެ ސަރަހައްދު ހުސްކުރުމަށެވެ.

އެހެންކަމުން، އެ ސަރަހައްދުގައި އަޅާފައިވާ އުޅަނދުފަހަރުގެ ވެރިފަރާތްތަކުން 02 އޮކްޓޫބަރު 2026 ވާ ހުކުރު ދުވަހުގެ ރޭގަނޑު 11:00 ގެ ކުރިން އެ އުޅަނދުތައް އެ ސަރަހައްދުން ނެންގެވުމަށް މިނިސްޓްރީން ވަނީ އިލްތިމާސްކުރައްވާފައެވެ.

މީގެއިތުރުން، ދީފައިވާ މުއްދަތުގެ ފަހުން ނުނަގައި ހުންނަ އުޅަނދުފަހަރު، އެ މިނިސްޓްރީގެ ފަރާތުން ނަގައި އެ ސަރަހައްދުން ބޭރުކުރާނެ ކަމަށްވެސް އިއުލާނުގައި ބަޔާންކޮށްފައިވެއެވެ.

މި މަޝްރޫއަކީ މާލޭގެ އުތުރު ފަރާތު ފަޅު ތެރެއާއި ޖެޓީތައް ބޭނުންކުރާ ފަރާތްތަކަށް ލުއިފަސޭހަ ކޮށްދިނުމަށާއި، ބަނދަރުގެ ޖާގަ އިތުރުކޮށް ދަތުރުފަތުރުގެ ނިޒާމު ހަރުދަނާކުރުމަށް ސަރުކާރުން ކުރިއަށްގެންދާ މުހިންމު މަސައްކަތެކެވެ.