ދިވެހި ވަތަނީ ޚިދުމަތް: ޒުވާން ޖީލު ހަމަމަގަށް އަޅުވައި، ޤައުމު ބިނާކުރުމަށް އެޅުނު މުހިންމު ފިޔަވަޅެއް

ދިވެހިރާއްޖޭގެ މާޒީގެ ސަފުހާތަކަށް ނަޒަރު ހިންގާލާއިރު، 1980 ގެ ފަހުކޮޅުން ފެށިގެން ދިވެހި ޒުވާނުންގެ މެދުގައި މަސްތުވާތަކެތީގެ ނުރައްކާތެރި ވަބާ ވަނީ އިންތިހާއަށް ފެތުރިގެން ގޮސްފައެވެ. އަދި 2002 އާއި 2003 ވަނަ އަހަރާ ހަމައަށް ރާއްޖެ ދަތުރުކުރިއިރު، އެތައް ޒުވާނުންނެއްގެ ދިރިއުޅުން މި ނުބައި ވަބާގެ ސަބަބުން ހަލާކުވެގެން ދިޔައެވެ. ފަހުގެ ތާރީޚުގައި މި ހާލަތު އިތުރަށް ގޯސްވެ، ސްކޫލް މާހައުލުގައި އުޅޭ ޅަފުރާގެ ކުދިން ވޭޕްކުރުމާއި، ގޭންގު މާރާމާރީތަކާއި ކުށުގެ ވެއްޓަށް ޝާމިލުވާ މިންވަރު އަތުފަތު ނުޖެހޭ މިންވަރަށް އިތުރުވެ، މުޅި ޤައުމުގެ މުސްތަޤުބަލަށް ކަޅު ހިޔަންޏެއް އެޅިގެން ދިޔައެވެ.

މިފަދަ ހިތާމަވެރި ހާލަތެއްގައި ޒުވާނުން ތިބިއިރުވެސް، މީގެ ކުރީގެ ތާރީޚުގައި މިކަމަށް ދާއިމީ ހައްލެއް ހޯދުމަށް ފުޅާ ދާއިރާއެއްގައި އެކަށީގެންވާ މަސައްކަތެއް ކުރެވިފައެއް ނުވެއެވެ. 1990 ގެ އަހަރުތަކުގައި ރައީސް މައުމޫންގެ ޒައާމަތުގައި، ޚާއްސަކޮށް ނޮވެމްބަރު 3 ގެ ޢުދުވާނީ ހަމަލާއަށްފަހު ދިފާއީ ބާރު ވަރުގަދަކުރުމުގެ ގޮތުން ސްކޫލް ނިންމާ ކުދިން ފުލުސް އޮފީހަށް ވެއްދުމުގެ މަސައްކަތްތަކެއް ކުރެވުނު ނަމަވެސް، މުޅި ޒުވާން ޖީލު އިސްލާހުކޮށް، ދީނީ އަދި ވަތަނީ ރޫހުގައި ބައްޓަންކުރުމަށްޓަކައި އެއްވެސް ވެރިކަމެއްގައި އަދި އެއްވެސް ރަސްކަލެއްގެ ޒަމާނުގައިވެސް ނުކުރާ ފަދަ އިންގިލާބީ މަސައްކަތެއް ފެއްޓެވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ. އެމަނިކުފާނު ވެރިކަމާ ހަވާލުވެވަޑައިގެން ވެވަޑައިގެންނެވި ވައުދުފުޅާ އެއްގޮތަށް އަވަސްވެގަތީ ޒުވާނުން ކުށުގެ ވެށިން ސަލާމަތްކޮށް، ޤައުމު ދެކެ ލޯބިވާ ދީންވެރި ޒުވާނުން ބިނާކުރުމަށެވެ.

މި ތަސައްވުރު ހަގީގަތަކަށް ހެއްދެވުމުގެ ގޮތުން، "ދިވެހި ވަތަނީ ޚިދުމަތް" (މޯލްޑިވްސް ނެޝަނަލް ސާވިސް) ޕްރޮގްރާމް ރަސްމީކޮށް ފެށިގެން ދިޔައީ 1 އޮކްޓޫބަރު 2025 ގައެވެ. މި ޚިދުމަތް އިފްތިތާހު ކޮށްދެއްވީ ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުޙައްމަދު މުޢިއްޒު، ޅ. މާފިލާފުށީގައި ހުންނަ އެމްއެންޑީއެފް ކޮމްޕޮސިޓް ޓްރޭނިން ސެންޓަރުގައި ބޭއްވުނު ޚާއްސަ ރަސްމިއްޔާތެއްގައެވެ. މިއީ ޒުވާނުންގެ ކިބައިގައި އަސްކަރީ ތަރުބިއްޔަތާއި، ފަންނީ ހުނަރާއި، އިސްލާމީ އަޚްލާޤު އަށަގަންނުވައި، ޒިންމާދާރު ރައްޔިތެއްގެ ގޮތުގައި މުޖުތަމައަށް ނެރުމަށް އެޅުނު ވަރަށް މުހިންމު ބިންގަލެކެވެ.

މި ބިންގަލުގެ ކާމިޔާބީއަށް ބަލާއިރު، މިހާތަނަށް ވަނީ ތިން ބެޗެއްގެ ތަމްރީނު ފުރިހަމަކޮށްފައެވެ. އެގޮތުން ފުރަތަމަ ބެޗުން 63 ޒުވާނަކު ފަންނީ ތަމްރީނު ފުރިހަމަކުރިއިރު، އެންމެ ފަހުން 19 ސެޕްޓެމްބަރު 2026 ގައި ދަސްވެނިވި 3 ވަނަ ބެޗުން އެކަނިވެސް 341 ޒުވާނުން ވަނީ ދަސްވެނިވެފައެވެ. މިއާއެކު މި ޕްރޮގްރާމްގެ ތިން ބެޗުން ޖުމްލަ 1,028 ޒުވާނުން ވަނީ ވަތަނީ ޚިދުމަތުގެ އަސާސީ ތަމްރީނު ފުރިހަމަކޮށް، ޤައުމީ ޚިދުމަތަށް ތައްޔާރުވެފައިވާ ބައެއްގެ ގޮތުގައި މުޖުތަމައަށް ނުކުމެފައެވެ. މިއީ ޤައުމުގެ އިޖުތިމާއީ ފޭރާން ހެޔޮކުރުމަށް ލިބިގެންދިޔަ ވަރަށް ބޮޑު ކުރިއެރުމެކެވެ.

މި ޚިދުމަތަށް އެއް އަހަރު ފުރިގެން ދިޔައިރު، މިއަދު ފެންނަމުން މިދަނީ މުޅި ދިވެހި މުޖުތަމަޢު އުއްމީދުކުރި ފަދަ ހެޔޮ ބަދަލުތަކެކެވެ. ކުރިން މަގުމަތީގެ ނާމާންކަމާއި ކުށުގެ ވެށީގައި ތިބި އެތައް ޒުވާނުންނެއް، ވަތަނީ ޚިދުމަތުގެ ތަމްރީނުތަކަށްފަހު މިއަދު ވަނީ ދީނާއި ޤައުމަށް ލޯބިކުރާ، ޒިންމާދާރު ބަޔަކަށް ބަދަލުވެފައެވެ. މި ޕްރޮގްރާމުގެ އެންމެ ފާހަގަކޮށްލެވޭ އެއް ކާމިޔާބީއަކީ، ޒުވާނުންގެ ހިތްތަކުގައި އިސްލާމީ ރިވެތި އުސޫލުތަކަށް އޮތް ލޯބި އިތުރުވެ، ދީނީ ކަންކަމަށް ޒުވާނުންގެ ޝައުޤުވެރިކަން އިންތިހާއަށް އިތުރުވެގެން ދިއުމެވެ.

އޭގެ ނަތީޖާއެއްގެ ގޮތުން، މިއަދު ރާއްޖޭގެ އެކި ކަންކޮޅުތަކުގައި ނަމާދުތަކަށް އަރާ ޒުވާނުންގެ އަދަދު ވަނީ ވަރަށް ބޮޑަށް އިތުރުވެފައެވެ. އަދި މިސްކިތްތަކުގެ މިންބަރުތަކުގައި ހުކުރު ޚުޠުބާ ކިޔާނެ ހުނަރުވެރި، ޒުވާން ޚަޠީބުންތަކެއް އުފެދި، ދީނީ ޚިދުމަތުގައި އިސްނަގަމުންދާ މަންޒަރަކީ މުޅި ޤައުމަށް ލިބޭ ނުހަނު ބޮޑު ހިތްހަމަޖެހުމެކެވެ. މިއީ ޒުވާން ޚަޠީބުން ތަމްރީނުކުރުމުގެ ތެރެއިން ޒުވާނުންގެ ވިސްނުމާއި ފިކުރަށް ގެނެސްދިން ހެޔޮ ބަދަލުގެ އަލިގަދަ ހެއްކެކެވެ.

މިއަދު ދިވެހި ވަތަނީ ޚިދުމަތް ވެގެން ގޮސްފައިވަނީ ޒުވާނުންނަށް އައު އުއްމީދެއް ގެނެސްދީ، މައިންބަފައިންގެ ހިތްތަކަށް ބޮޑު ފިނިކަމެއް ގެނެސްދިން މުހިންމު ޕްރޮގްރާމަކަށެވެ. މިހާރު ގިނަ ބައެއްގެ އިންތިޒާރަކީ އަދި ޝައުޤުވެރިކަމަކީ މި ޕްރޮގްރާމްގެ 4 ވަނަ ބެޗަށް ކުރިމަތިލުމުގެ ފުރުސަތު ހުޅުވިގެންދާނެ ދުވަހެކެވެ. ދިވެހި ވަތަނީ ޚިދުމަތަކީ ހަމައެކަނި އަސްކަރީ ތަމްރީނެއް ނޫންކަމާއި، އެއީ ޒުވާނުންގެ ރޫޙާނީ އަދި އަޚްލާޤީ ދުޅަހެޔޮކަން ކަށަވަރުކޮށް، ޤައުމުގެ ދިފާއާއި ކުރިއެރުމުގެ އެންމެ ވަރުގަދަ ބާރަށް ޒުވާނުން ހެދުމަށްޓަކައި އެޅުނު ތާރީޚީ އަދި ނުހަނު އަގުހުރި ފިޔަވަޅެކެވެ.