ސްޓެލްކޯ އިން އައްޑޫގެ ކަރަންޓުގެ ހިދުމަތާ ރަސްމީކޮށް ހަވާލުވެއްޖެ

އައްޑޫ ސިޓީގައި ދެމުންދިޔަ ކަރަންޓުގެ ހިދުމަތަށް ދިމާވެފައިވާ މައްސަލަތަކަށް ހައްލެއް ހޯދައިދިނުމުގެ ގޮތުން، އެ ސިޓީގެ ކަރަންޓު ހިދުމަތް ދިނުމުގެ މަސްއޫލިއްޔަތާ ސްޓެލްކޯއިން  ރަސްމީކޮށް ހަވާލުވެއްޖެއެވެ. މިއީ އައްޑޫގެ ކަރަންޓުގެ ހިދުމަތާ އެ ކުންފުނިން ހަވާލުވި ދެވަނަ ފަހަރެވެ.

މާލެ ފިޔަވައި އެންމެ ބޮޑު އާބާދީއެއް އޮތް ސިޓީގެ ކަރަންޓުގެ ހިދުމަތާ ސްޓެލްކޯ އިން ހަވާލުވުމާ ހަމައަށް އެ ސިޓީ އަށް އެ ހިދުމަތް ދެމުން އައީ ފެނަކަ ކުންފުނިންނެވެ. އައްޑޫގެ ކަރަންޓުގެ ހިދުމަތާ ހަވާލުވުމަށް ސްޓެލްކޯގެ މެނޭޖިން ޑިރެކްޓަރު އަލީ އަޒުވަރު އެ ސިޓީއަށް ކުރައްވަމުން ގެންދަވާ ޒިޔާރާތުގެ ތެރެއިން ވަނީ އައްޑޫގެ މައި އިންޖީނުގެއަށް ވަޑައިގެން އެ އިމާރާތުގައި ސްޓެލްކޯގެ ދިދަ ނަންގަވައި ދެއްވައިފައެވެ. އަދި މަރަދޫފޭދޫ އޮފީހަށް ވަޑައިގެން، އެ ތަނުގައި ވެސް ސްޓެލްކޯގެ ދިދަ ވަނީ ނަންގަވައި ދެއްވައިފައެވެ.

މި ޒިޔާރަތުގެ ތެެރެއިން މަރަދޫ ފޭދޫ އޮފީހުގެ މުވައްޒަފުންނާ ބައްދަލުކުރައްވައި އަޒުވަރު ވިދާޅުވީ، މިއީ އައްޑޫގެ ރައްޔިތުންނަށް ލިބިގެންދިޔަ އައު އުއްމީދެއް ކަމަށެވެ. އަދި ޒަމާނީ ވަސީލަތްތައް ބޭނުންކޮށްގެން، އިތުބާރު ހުރި އަދި ފެންވަރު ރަނގަޅު ހިދުމަތެއް ރައްޔިތުންނަށް ފޯރުކޮށްދިނުމަށް ކުންފުނިން އިސްކަންދޭނެ ކަމަށްވެސް ފާހަގަކުރެއްވިއެވެ.

ކަރަންޓުގެ ހިދުމަތަށް އައި ބަދަލުގެ އިތުރުން، އައްޑޫގެ ފެނާއި ނަރުދަމާގެ ހިދުމަތް އެމްޑަބްލިއުއެސްސީގެ ދަށަށް ބަދަލުކުރުމަށް ވަނީ ހަމަޖެހިފައެވެ.

ރާއްޖޭގެ ރަށްރަށަށް ފެނާއި ނަރުދަމާގެ ހިދުމަތް ދެމުން އަންނަ ކުންފުނި، ފެނަކަ ކޯޕަރޭޝަން އުވާލައި ސްޓެލްކޯގެ ބެލުމުގެ ދަށަށް ރާއްޖޭގެ ހުރިހާ ރަށެއްގެ ކަރަންޓުގެ ހިދުމަތް ދިނުން ބަދަލުކުރެއްވުމަށް ނިންމާފައިވާކަމަށް ރައީސް ޑރ. މުހައްމަދު މުއިއްޒު ވަނީ މީގެކުރިން އިއުލާނުކުރައްވާފައެވެ.