ތުރުކީގެ ހަލާލް އެގްޒިބިޝަނުން ދިވެހި ވިޔަފާރިތަކަށް ފުރުސަތު

ތުރުކީވިލާތުގެ އިސްތަންބޫލުގައި ބޭއްވުމަށް ހަމަޖެހިފައިވާ 11 ވަނަ އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ހަލާލް އެގްޒިބިޝަން އަދި 12 ވަނަ ވޯލްޑް ހަލާލް ސަމިޓުގައި ބައިވެރިވުމުގެ ފުރުސަތު ރާއްޖޭގެ ވިޔަފާރިތަކަށް ހުޅުވާލައިފިއެވެ. މި މައުރަޒުތައް ބޭއްވުމަށް ތާވަލުކުރެވިފައިވަނީ 2026 ވަނަ އަހަރުގެ ނޮވެންބަރު 25 އިން 28 އަށެވެ.

މި މައުރަޒުގައި ރާއްޖޭގެ ކުންފުނިތަކާއި ހަލާލް ވިޔަފާރީގެ ދާއިރާގައި ހަރަކާތްތެރިވާ ފަރާތްތަކުން ބައިވެރިވުމަށް، މައުރަޒު އިންތިޒާމުކުރާ ފަރާތުން ދަޢުވަތު އަރުވާފައިވާކަން ތުރުކީވިލާތުގެ ސަރުކާރުން ވަނީ ހާމަކޮށްފައެވެ. އެހެންކަމުން މި އިވެންޓުގައި ބައިވެރިވާން ޝައުގުވެރިވާ ފަރާތްތަކުން، ރަސްމީ ވެބްސައިޓް މެދުވެރިކޮށް އޮންލައިން އެޕްލިކޭޝަން ފުރިހަމަކުރުމަށްފަހު، އެ މައުލޫމާތު [email protected] އަށް އީމެއިލް ކުރެއްވުމަށް އިގުތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއިން ވަނީ އެދިވަޑައިގެންފައެވެ.

ވިޔަފާރިއާ ބެހޭ ވުޒާރާއިން ވިދާޅުވި ގޮތުގައި، މި ސިނާއަތުގައި ހަރަކާތްތެރިވާ ވިޔަފާރިވެރިންނާއި، އިންވެސްޓަރުން، އަދި ސަރުކާރާއި އަމިއްލަ ފަރާތްތަކަށް ވިޔަފާރީގެ ގުޅުން ބަދަހިކުރުމުގެ ޕްލެޓްފޯމެއް ފޯރުކޮށްދިނުމަކީ މި ހަރަކާތުގެ މުހިންމު ލަނޑުދަނޑިއެކެވެ. މި މަޢުރަޒުގައި ހަލާލް ކާބޯތަކެތި، ކޮސްމެޓިކްސް، ފައިނޭންސް، ފެޝަން، ޓޫރިޒަމް އަދި ހެލްތްކެއާ ފަދަ ސިނާއަތްތަކުގެ އައު އުފެއްދުންތައް ދައްކާލުމުގެ ފުރުސަތު ލިބިގެންދާނެއެވެ.

މީގެއިތުރުން، މި މައުރަޒުގެ ސަބަބުން އިންވެސްޓްމަންޓާއި އެކްސްޕޯޓް އަދި އިޤްތިޞާދީ ކުރިއެރުން އިތުރުވެގެންދާނެ ކަމަށްވެސް އެ ވުޒާރާއިން ފާހަގަކުރައްވައެވެ. އަދި މި ސިނާއަތުގެ މުހިންމު މައުޟޫތަކާ ގުޅޭގޮތުން ކޮންފަރެންސްތަކާއި، ޕެނަލް ޑިސްކަޝަންތައް ބާއްވައި، މައުލޫމާތާއި ތަޖުރިބާ ބަދަލުކުރުމުގެ ގިނަ ފުރުސަތުތަކެއް ފަހިވާނެ ކަމަށްވެސް ބަޔާންކޮށްފައިވެއެވެ.

އިގުތިޞާދީ ތަރައްޤީއާއި ވިޔަފާރިއާއި ދަތުރުފަތުރާބެހޭ ވުޒާރާއިން އަބަދުވެސް އަންނަނީ ރާއްޖެއިން ބޭރުގައި ބާއްވާ އެކިއެކި މައުރަޒުތަކުގައި ދިވެހި ވިޔަފާރިތަކަށް ބައިވެރިވުމުގެ ފުރުސަތުތައް ފަހިކޮށްދެމުންނެވެ. އަދި ޚާއްސަކޮށް ކުދި އަދި މެދު ފަންތީގެ ވިޔަފާރިތަކަށް ބޭރުގެ މާކެޓްތަކަށް ތަކެތި ވިއްކޭނެ އިންތިޒާމުތައް ހަމަޖައްސައިދިނުމަށް އެ ވުޒާރާއިން ދަނީ މަސައްކަތް ކުރަމުންނެވެ.