ދަތުރުފަތުރުގެ އާ ގާނޫނަށް އަމަލުކުރަން ފަށައިފި

ބޮޑެތި އަދަދުތަކުން ޖޫރިމަނާކުރެވޭ ގޮތަށް ރައްޔިތުންގެ މަޖިލީހުން ފާސްކޮށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތަސްދީގު ކުރެއްވި އެއްގަމު ދަތުރުފަތުރުގެ އާ ގާނޫނަށް އަމަލު ކުރަން ފަށައިފިއެވެ.

މި ގާނޫނަށް ގެނެވުނު މައިގަނޑު އިސްލާހުތަކުގެ ތެރޭގައި އުޅަނދުތައް އިންޝުއަރ ނުކޮށް ދުއްވުން މަނާކުރުމާއި، އެކަމާ ހިލާފުވާ ފަރާތްތަކާމެދު ފިޔަވަޅު އެޅުމަށް ޑީމެރިޓް ޕޮއިންޓްގެ ނިޒާމެއްގެ އިތުރުން، ތަކުރާރުވާ ނިސްބަތުން ޖޫރިމަނާ ބޮޑުވާނެ ހަރުދަނާ އުސޫލުތަކެއް ވަނީ އެކުލަވާލާފައެވެ.

އާ ގާނޫނުގެ ދަށުން، ގަވާއިދާ ހިލާފަށް ބާރު ސްޕީޑުގައި ނުރައްކާތެރިކޮށް ދުއްވާ ފަރާތްތަކާއި، އާންމުންގެ ފުރާނައާއި މުދަލަށް ގެއްލުންވާ ފަދަ ގޮތްގޮތަށް އަމަލުކުރާ ޑްރައިވަރުން ބޮޑެތި އަދަދުތަކުން ޖޫރިމަނާ ކުރެވޭނެ އިންތިޒާމުތައް ވަނީ ހަމަޖައްސާފައެވެ.

 އެގޮތުން ދުއްވާފައިދާ އުޅަނދެއްގެ ކޮންޓްރޯލް ލައިސަންސް ނެތް މީހަކަށް ނުވަތަ ކުޑަކުއްޖަކަށް ހަވާލުކުރުމާއި، ފަސިންޖަރު ސީޓުގައި އިންނަ މީހަކާ ހުންގާނު ހަވާލުކުރުމަކީ ކުށެއް ކަމަށް ކަނޑައަޅައި، ކުށުގެ ކުޑަބޮޑުމިނަށް ބަލައި 25,000 އާއި 50,000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.

 އަދި އެ އަމަލުގެ ސަބަބުން މީހަކަށް އަނިޔާއެއް ލިބިއްޖެނަމަ ޖޫރިމަނާ 50,000 އިން 100,000 ރުފިޔާއަށް ބޮޑުވާނެއެވެ. އުޅަނދުގެ ކޮންޓްރޯލް ހަވާލުކުރީ ކުޑަކުއްޖަކާ ނަމަ ސީދާ 50,000 ރުފިޔާއިން ޖޫރިމަނާކުރާއިރު، އަނިޔާއެއް ލިބިއްޖެނަމަ 100,000 ރުފިޔާއިން ޖޫރިމަނާ ކުރާނެއެވެ. މީގެއިތުރުން ކުށް ސާބިތުވާ ފަރާތްތަކުގެ ލައިސަންސް 2 އަހަރާއި 5 އަހަރާ ދެމެދުގެ މުއްދަތަކަށް ހިފެހެއްޓުމާއި، މީހެއްގެ ފުރާނަ ގެއްލިއްޖެނަމަ ގާނޫނުލްއުގޫބާތުގެ ދަށުން ޖިނާއީ ދައުވާ ކުރުން ވެސް ހިމެނެއެވެ.

ގާނޫނުގެ 128 ވަނަ މާއްދާގެ ދަށުން، އިންޝުއަރ ނުކޮށް އުޅަނދު ދުއްވައިފިނަމަ ދުއްވި މީހާ އާއި އުޅަނދުގެ ވެރިފަރާތް ވަކިވަކިން ބޮޑެތި އަދަދުތަކުން ޖޫރިމަނާ ކުރެވޭނެއެވެ. އެގޮތުން ދުއްވި މީހާ 1،000 ރުފިޔާއިން ފެށިގެން ތަކުރާރުވާ ކޮންމެ ފަހަރަކު އިތުރުވާ އުސޫލުން ޖޫރިމަނާކޮށް ޑީމެރިޓް ޕޮއިންޓް ކަނޑައަޅާއިރު، އުޅަނދުގެ ވެރިފަރާތް 3،000 ރުފިޔާއިން ފެށިގެން ތަކުރާރުވާ ނިސްބަތުން ޖޫރިމަނާ ކުރެވޭނެއެވެ.

 އަދި އުޅަނދުގައި ހާއްސަ ނަންބަރެއް ނުވަތަ އަކުރުތަކެއް ޖެހުމުގެ ފީ، ކުރިން ބިލުގައި އޮތް 5 ލައްކަ ރުފިޔާގެ ބަދަލުގައި، ގާނޫނުގެ ޖަދުވަލު 1 ގައިވާ ގޮތުގެމަތިން ހަތަރު ފުރޮޅުލީ އުޅަނދަށާއި އެނޫން އުޅަނދުފަހަރަށް ވަކިވަކިން ކަނޑައެޅޭ ގޮތަށް ވަނީ އިސްލާހުކޮށްފައެވެ.

އުޅަނދު ބޭނުންކުރެވޭ މުއްދަތާ ގުޅޭގޮތުން ގާނޫނަށް އިތުރުކުރި 23 ވަނަ މާއްދާގައިވާ ގޮތުން، ތާރީހީ އުޅަނދުތައް ފިޔަވައި އެއްގަމު ދަތުރުފަތުރުގެ ނިޒާމުގައި އުޅަނދު ބޭނުންކުރެވޭނީ އުފެއްދި ތާރީހުން ފެށިގެން އެންމެ ގިނަވެގެން 20 އަހަރުގެ މުއްދަތަށެވެ. އަދި ގާނޫނަށް އަމަލުކުރަން ފަށާއިރު 18 އަހަރާއި 20 އަހަރާ ދެމެދުގެ އުމުރުގެ އުޅަނދުތައް 3 އަހަރުގެ ތެރޭގައި ރަޖިސްޓަރީ ބާތިލުކުރެވޭނެއެވެ. މީގެއިތުރުން 70 ވަނަ މާއްދާއިން އުޅަނދުގެ ވެރިފަރާތުގެ މައުލޫމާތު އެނގޭނޭ ލިޔުމެއް ހަރުކުރުމާއި، މުވައްޒަފުންގެ ނަމާއި މަގާމު އެނގޭ ބެޖެއް ޔުނީފޯމުގައި ހަރުކުރުން ލާޒިމުކޮށްފައިވާއިރު، 82 ވަނަ މާއްދާގެ ދަށުން ފުލުހުންގެ ބެލުމުގެ ދަށަށް ގެންދާ އުޅަނދުތަކަށް ގަސްދަކާ ނުލައި ލިބޭ ގެއްލުމަކަށް ފުލުހުން ޒިންމާވާން ނުޖެހޭނެ ކަމަށް ވަނީ ކަނޑައަޅާފައެވެ.

މާލޭގެ ޓްރެފިކް ތޮއްޖެހުން ކުޑަކުރުމަށްޓަކައި ގާނޫނުގައި ހިމެނޭ 8 ވަނަ ބާބުގެ ދަށުން ގިނަވެގެން 3 އަހަރުގެ މުއްދަތަކަށް ހާއްސަ އުސޫލުތަކަކަށް އަމަލުކުރުމަށް ވަނީ ނިންމާފައެވެ. މިގޮތުން "ގްރޭޓަރ މާލެ ޓްރާންސްޕޯޓް އެންޑް މޮބިލިޓީ އޮފީސް" އެއް އުފެއްދުމާއި، މާލޭގައި ރަޖިސްޓަރީކުރެވޭނެ އުޅަނދުގެ އަދަދު ކަނޑައެޅުމާއި، މަލްޓިޕަލް އޯނަޝިޕް ފީ ތައާރުފުކުރުމާއި، ފުލުހުން ހިންގާ ޓްރެފިކް މެނޭޖްމަންޓް ސެންޓަރެއް ގާއިމުކުރުމުގެ އިތުރުން "ލޭންޑް ޓްރާންސްޕޯޓް މޮބިލިޓީ ފަންޑް" އެއް ގާއިމުކުރުމަށް ވަނީ ހަމަޖެހިފައެވެ.