3 ވަނަ ޒަކާތު ކޮންފަރެންސްގައި ބައިވެރިވުމަށް ހުޅުވާލައިފި

މޯލްޑިވްސް ޒަކާތު ހައުސްއިން ވިދިވިދިގެން ތިންވަނަ އަހަރަށް ބާއްވާ "އިންޓަރނޭޝަނަލް ޒަކާތު ކޮންފަރެންސް މޯލްޑިވްސް (އިންޒެކް) 2026" ގައި ބައިވެރިވުމުގެ ފުރުޞަތު ހުޅުވާލައިފިއެވެ.

މި މަހުގެ 28 ވަނަ ދުވަހު ބޭއްވުމަށް ހަމަޖެހިފައިވާ މި ކޮންފަރެންސްގައި ބައިވެރިވުމަށް ޝައުޤުވެރިވާ ފަރާތްތަކަށް މިހާރު ރަސްމީ ރަޖިސްޓްރޭޝަން ފޯމު މެދުވެރިކޮށް ރަޖިސްޓަރީ ކުރެވޭނެއެވެ.

ޒަކާތު ކޮންފަރެންސްއަކީ މާލީ އަދި އިޖުތިމާޢީ ނާޒުކު ޙާލަތްތަކާ ގުޅިގެން ކުރިމަތިވާ ގޮންޖެހުންތަކާއި، ވިލުންވެރި މުޖުތަމަޢުތަކެއް ބިނާކުރުމުގައި ޒަކާތުގެ ދައުރާ ގުޅޭގޮތުން މަޝްވަރާކުރުމަށް ބާއްވަމުން އަންނަ މުހިންމު ބައްދަލުވުމެކެވެ. މިއަހަރުގެ ކޮންފަރެންސްގެ ޝިޢާރަކީ "ރެޒިލިއަންޓް ފައުންޑޭޝަންސް: ޑިސައިފަރިންގ ވަލްނަރަބިލިޓީ، އިކޮނޮމިކް އިމްޕެކްޓް، އެންޑް ކޮލާބޮރޭޓިވް ސޭފްޓީ ނެޓްސް އިން މޮޑަން ސޮސައިޓީޒް" އެވެ.

މި ކޮންފަރެންސްގައި ޢިލްމުވެރިންނާއި، އިޤުތިޞާދީ މާހިރުންނާއި، ޒަކާތުގެ ކަންކަން ބަލަހައްޓާ ފަރާތްތަކާއި، ސިޔާސަތު ކަނޑައަޅާ ފަރާތްތަކުގެ އިތުރުން މާލީ އިދާރާތަކާއި މަދަނީ ޖަމްޢިއްޔާތަކުގެ މަންދޫބުން ބައިވެރިވާނެއެވެ. އަދި ކީނޯޓް އެޑްރެސްތަކާއި ތަޖުރިބާކާރުންގެ ޕެނަލް ޑިސްކަޝަންތައް ކުރިއަށްދާނެ ކަމަށް ޒަކާތު ހައުސްއިން މަޢުލޫމާތުދެއެވެ.

ކޮންފަރެންސްގައި މައިގަނޑު ގޮތެއްގައި މަޝްވަރާކުރެވޭނެ މައުޟޫޢުތަކުގެ ތެރޭގައި ގޭބިސީތަކުގެ ނާޒުކު ޙާލަތަށް އަންނަމުންދާ ބަދަލުތަކާއި، މާލީ ދަތިކަމުގެ ސަބަބުން ކުރާ އިޤުތިޞާދީ އަސަރުތަކާއި، އެކި ދާއިރާތަކުގެ މެދުގައި މަޢުލޫމާތު ޙިއްޞާކުރުމާއި ގުޅިފައިވާ ރައްކާތެރިކަމުގެ ނިޒާމުތައް ހިމެނެއެވެ. މީގެއިތުރުން ނާޒުކު ޙާލަތްތަކުގައިވާ ޢާއިލާތަކަކީ އަމިއްލަ ފައިމައްޗަށް ތެދުވެވިފައިވާ މާލީ މިނިވަންކަން ލިބިފައިވާ ބަޔަކަށް ހެދުމަށް ބޭރު ޤައުމުތަކުގައި ބޭނުންކުރާ މޮޑެލްތަކާ ގުޅޭގޮތުންވެސް ފުޅާ ދާއިރާއެއްގައި މަޝްވަރާކުރެވޭނެއެވެ.

ރާއްޖޭގައި ޒަކާތުގެ ދާއިރާ ހަރުދަނާ ކުރުމަށްޓަކައި މުހިންމު މަސައްކަތްތަކެއް ކުރެވެމުންދާއިރު، ޒަކާތުގެ ފުރަތަމަ ޤާނޫނު މިދިޔަ އަހަރުގެ ޑިސެމްބަރު މަހު ވަނީ ތަސްދީޤު ކުރައްވާފައެވެ. އަދި ޒަކާތުގެ މަސައްކަތްތައް ފުޅާކުރުމަށް މޯލްޑިވްސް ޒަކާތު ހައުސް އުފައްދާފައިވާއިރު، ޒަކާތު ފަންޑަކީ ބޭސްފަރުވާއާއި ތަޢުލީމު ފަދަ މުހިންމު ދާއިރާތަކުން ބޭނުންޖެހިފައިވާ ފަރާތްތަކަށް ބޮޑެތި އެހީތަކެއް ފޯރުކޮށްދެމުން އަންނަ ފަންޑެކެވެ.