ރާއްޖެއާއި ރަޝިޔާއާ، ޤާނޫނީ ގޮތުން ގުޅުންބަދަހިކުރުމުގެ އެއްބަސްވުމެއްގައި ސޮއިކޮށްފި

ދިވެހިރާއްޖެއާއި ރަޝިޔާއާ ދެމެދު ޤާނޫނީ ގޮތުން ގުޅުން ބަދަހިކުރުމުގެ މުހިންމު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި ސޮއިކުރައްވާފައިވަނީ ޕްރޮސިކިއުޓަރ ޖެނެރަލް އަލްއުސްތާޛު އައްބާސް ޝަރީފާއި އެ އޮފީހުގެ ވަފުދެއް ރަޝިޔާއަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިންނެވެ.

ޕީޖީ އައްބާސް ޝަރީފާއި ވަފުދުގެ ބޭފުޅުން ރަޝިޔާގެ ކަޒާންއަށް ވަޑައިގެންނެވީ އެ ސިޓީގައި ކުރިއަށްދާ "ޝަންހާއީ ކޯޕަރޭޝަން އޯގަނައިޒޭޝަން" (އެސްސީއޯ) ގެ މެންބަރު ޤައުމުތަކުގެ ޕްރޮސިކިއުޓަރ ޖެނެރަލުންގެ 24 ވަނަ ބައްދަލުވުމުގައި ބައިވެރިވެވަޑައިގަތުމަށެވެ. މި ބައްދަލުވުމުގެ ހަވާސާގައި ޕީޖީ އައްބާސް ވަނީ ރަޝިޔާގެ ޕްރޮސިކިއުޓަރ ޖެނެރަލް އެލެގްޒެންޑަރ ގުޓްސާންއާ ބައްދަލުކުރައްވައި ރަސްމީ މަޝްވަރާތައް ބާއްވަވާފައެވެ. ދެ ޤައުމުގެ ޕްރޮސިކިއުޓަރ ޖެނެރަލްގެ އޮފީހުގެ ދެމެދުގައި އެއްބާރުލުން އިތުރުކުރުމުގެ އެއްބަސްވުމުގައި ސޮއިކުރެއްވީ މި މަޝްވަރާތަކަށް ފަހުގައެވެ.

މި އެއްބަސްވުމުގެ ދަށުން ދެ އޮފީހުގެ މެދުގައި ފަންނީ ދިރާސާތައް ކުރުމާއި، ތަމްރީނު ދިނުމާއި، މަސައްކަތުގެ ތަޖުރިބާއާއި ޢިލްމު ހިއްސާކުރުމުގެ އޮނިގަނޑެއް އެކުލަވާލެވޭނެއެވެ. އަދި ދެ ފަރާތުން އެއްބަސްވާ އެކި ދާއިރާތަކުން އެހީތެރިކަން ފޯރުކޮށްދިނުމާއި ގުޅިގެން މަސައްކަތް ކުރުމަށްވެސް މި އެއްބަސްވުމުގައި ވަނީ ކަނޑައަޅާފައެވެ.

މީގެ އިތުރުން، ބޯޑަރު ހުރަސްކޮށް ހިންގާ ކުށްތަކާ ދެކޮޅަށް މަސައްކަތް ކުރުމުގައި ދެ އޮފީހުގެ މެދުގައި އޮންނަ ޤާނޫނީ ގުޅުން ވަރުގަދަވެ، އިތުރު ދާއިރާތަކުން ގުޅިގެން މަސައްކަތް ކުރުމަށް މި އެއްބަސްވުމުގެ ސަބަބުން މަގުފަހިވެގެންދާނެ ކަމަށް ޕީޖީ ވަނީ ފާހަގަކުރައްވާފައެވެ.

ޕީޖީ އައްބާސް ވިދާޅުވީ، ދެ ޤައުމުގެ ދެމެދުގައި ބޭއްވި ރަސްމީ މަޝްވަރާތަކުގައި ޕްރޮސިކިއުޓަރ ޖެނެރަލްގެ އޮފީހުގެ މަސައްކަތްތަކުގެ ހަލުވިމިން 60 އިންސައްތައަށްވުރެ އިތުރުކުރުމަށް އަމާޒުކޮށްގެން ކުރިއަށްގެންދާ "ޕީޖީއޯ 2.0" އިސްނެގުމާ ބެހޭ މައުލޫމާތު ޙިއްސާކުރައްވާފައިވާނެ ކަމަށެވެ. އަދި މި ނިޒާމަކީ މަސައްކަތްތައް އަވަސްކުރުމަށް ފަރުމާކޮށްފައިވާ ނިޒާމެއް ނަމަވެސް، މީގެ މައިގަނޑު އަސާސަކީ ކަންކަމުގައި ގޮތް ނިންމުމުގެ ބާރު އިންސާނުންގެ އަތްމަތީގައި ބޭއްވުން ކަމަށްވެސް އެމަނިކުފާނު ވިދާޅުވިއެވެ.

ރަޝިއާގެ ޕްރޮސިކިއުޓަރ ޖެނެރަލް އެލެގްޒެންޑަރ ގުޓްސާން ދެއްވި ފުރިހަމަ މެހެމާންދާރީއަށް ޝުކުރު އަދާކުރައްވަމުން، ޕީޖީ އައްބާސް ވަނީ ކުރިއަށް އޮތްތަނުގައި ދެ އޮފީހުގެ މެދުގައި އޮންނަ ގުޅުން އިތުރަށް ބަދަހިވެގެންދާނެ ކަމަށް އުންމީދު ކުރައްވާ ކަމަށް ވިދާޅުވެފައެވެ.