ޓެކްސް އާމްދަނީ 23.3 ބިލިއަނަށް އަރައިފި

މިދިޔަ މަހުގެ 24 ވަނަ ދުވަހުގެ ނިޔަލަށް ޓެކުހުގެ ގޮތުގައި ދައުލަތަށް ލިބުނު އާމްދަނީ 23.3 ބިލިޔަން ރުފިޔާއަށް އަރައި، މިދިޔަ އަހަރުގެ އެ މުއްދަތާ އަޅާބަލާއިރު ބޮޑު ކުރިއެރުމެއް ހޯދާފައިވާ ކަމަށް މާލީ ކަންކަމާއި ސަރުކާރު ކުންފުނިތަކާ ބެހޭ ވުޒާރާގެ ތަފާސްހިސާބުތަކުން ދައްކައިފިއެވެ.

މާލީ ވުޒާރާއިން އެންމެ ފަހުން އާންމުކުރި ވީކްލީ ފިސްކަލް ޑިވެލޮޕްމަންޓްސް ރިޕޯޓުގައިވާ ގޮތުން، މިދިޔަ މަހުގެ 24 ގެ ނިޔަލަށް އާމްދަނީއާއި ހިލޭ އެހީގެ ގޮތުގައި ދައުލަތަށް ޖުމްލަ 30.2 ބިލިޔަން ރުފިޔާ ލިބިފައިވެއެވެ. މިއީ ވޭތުވެދިޔަ އަހަރުގެ މި މުއްދަތުގައި ލިބުނު 28.7 ބިލިޔަން ރުފިޔާއާ އަޅާބަލާއިރު ފަސް އިންސައްތައިގެ ކުރިއެރުމެކެވެ. ދައުލަތުގެ އާމްދަނީ އިތުރުވުމުގެ މައިގަނޑު ސަބަބަކީ ޓެކުހުގެ އާމްދަނީ 9.4 އިންސައްތަ އިތުރުވުމެވެ. އެގޮތުން ވޭތުވެދިޔަ އަހަރުގެ މި މުއްދަތުގައި ޓެކުހުގެ ގޮތުގައި 21.3 ބިލިޔަން ރުފިޔާ ލިބިފައިވާއިރު، މި އަހަރު މި އަދަދު ވަނީ 23.3 ބިލިޔަނަށް އަރާފައެވެ.

ޓެކުހުގެ މައިގަނޑު ދާއިރާތަކުން ލިބުނު ކުރިއެރުން
ތަފާސްހިސާބުތަކުން ދައްކާގޮތުގައި ޓީޖީއެސްޓީގެ ގޮތުގައި ލިބުނު އާމްދަނީ 7.6 ބިލިޔަން ރުފިޔާއިން 7.8 ބިލިޔަން ރުފިޔާއަށް ވަނީ އިތުރުވެފައެވެ. މިއީ 2.7 އިންސައްތައިގެ ކުރިއެރުމެކެވެ. މީގެއިތުރުން އާންމު މުދަލާއި ޚިދުމަތުގެ ޓެކްސް (ޖީއެސްޓީ) 3.6 ބިލިޔަން ރުފިޔާއިން 4.1 ބިލިޔަން ރުފިޔާއަށް އިތުރުވެފައިވާއިރު، މިއީ 10.7 އިންސައްތައިގެ ކުރިއެރުމެކެވެ. ހަމައެއާއެކު އިމްޕޯޓް ޑިއުޓީގެ އާމްދަނީވެސް 13 އިންސައްތައިގެ ކުރިއެރުމަކާއެކު 2.1 ބިލިޔަން ރުފިޔާއިން 2.4 ބިލިޔަން ރުފިޔާއަށް ވަނީ އުފުލިފައެވެ.

ޓެކްސް އާމްދަނީ އިތުރުވި ނަމަވެސް، ޓެކްސް ނޫން އާމްދަނީގެ ގޮތުގައި ލިބުނު އަދަދު ވަނީ ދަށަށް ގޮސްފައެވެ. މިދިޔަ އަހަރުގެ މި މުއްދަތުގައި ޓެކްސް ނޫން އާމްދަނީގެ ގޮތުގައި 7.1 ބިލިޔަން ރުފިޔާ ލިބުނު ނަމަވެސް، މި އަހަރުގެ މި މުއްދަތުގައި ލިބިފައިވަނީ 6.3 ބިލިޔަން ރުފިޔާއެވެ. އެއީ 11.5 އިންސައްތައިގެ ދަށްވުމެކެވެ.

ދައުލަތުގެ ޖުމްލަ ޚަރަދުތައް
މި މުއްދަތުގައި ދައުލަތުގެ ޖުމްލަ ޚަރަދު ހުރީ 33.5 ބިލިޔަން ރުފިޔާގައެވެ. މިއީ މިދިޔަ އަހަރުގެ މި މުއްދަތުގައި ޚަރަދުކުރި 28.2 ބިލިޔަން ރުފިޔާއާ އަޅާބަލާއިރު 18.8 އިންސައްތަ އިތުރު އަދަދެކެވެ. ޚަރަދުތަކުގެ ތަފްސީލަށް ބަލާއިރު، ރިކަރަންޓް ޚަރަދު 18.6 އިންސައްތަ އިތުރުވެ 24.3 ބިލިޔަނުން 28.8 ބިލިޔަން ރުފިޔާއަށް އަރާފައިވާއިރު، ކެޕިޓަލް ޚަރަދު ވަނީ 18.7 އިންސައްތަ އިތުރުވެ 3.9 ބިލިޔަނުން 4.6 ބިލިޔަން ރުފިޔާއަށް އުފުލިފައެވެ.