އޭޓީއެމްއިން ޑޮލަރު ނެގޭ ލިމިޓު މަހަކު 3،500 އަށް!

އޭޓީއެމްތަކުން މަހެއްގެ މައްޗަށް ޑޮލަރު ނެގޭ މިންވަރު 3،500 ޑޮލަރަށް ބޭންކް އޮފް މޯލްޑިވްސް (ބީއެމްއެލް) އިން ހަމަޖައްސައިފިއެވެ.

ބީއެމްއެލްއިން ހާމަކުރި ގޮތުގައި މި ބަދަލު ގެނެސްފައިވަނީ ނަގުދު ފައިސާއަށް ބަރޯސާވާ މިންވަރު ކުޑަކުރުމަށް ކުރަމުންދާ މަސައްކަތުގެ ދަށުންނެވެ.

"ޑިޖިޓަލް-ފަސްޓް" ބޭންކިންގ ޚިދުމަތް ފުޅާކުރުމަށް ކުރަމުންދާ މަސައްކަތުގެ ތެރެއިން، މިހިނގާ އޮކްޓޯބަރު މަހުގެ 1 ވަނަ ދުވަހުން ފެށިގެން މި ބަދަލަށް އަމަލުކުރަން ފަށާފައިވާ ކަމަށް ބޭންކުން ބުނެއެވެ. މީގެ ކުރިން އޮންނަނީ ދުވާލެއްގެ މައްޗަށް ޑޮލަރު ނެގޭ ލިމިޓެއް ކަމަށްވީ ނަމަވެސް، މިހާރު މަހެއްގެ މައްޗަށް އެންމެ ގިނަވެގެން ނެގޭނީ 3،500 ޑޮލަރެވެ. ނަމަވެސް، ކާޑަކުން ދުވާލަކަށް ނެގޭ 1،600 ޑޮލަރުގެ ލިމިޓަށް އެއްވެސް ބަދަލެއް ނާންނާނެ ކަމަށް ބީއެމްއެލްއިން ވަނީ ވިދާޅުވެފައެވެ.

ބީއެމްއެލްއިން ފާހަގަކުރި ގޮތުގައި، މި ނިންމުމަކީ އަވަސް، ރައްކާތެރި އަދި ލުއިފަސޭހަ ޑިޖިޓަލް މާލީ ނިޒާމެއް ކުރިއެރުވުމަށް އެ ބޭންކުން ގެންގުޅޭ ދުރުރާސްތާ ސިޔާސަތުގެ ދަށުން ނިންމި ނިންމުމެކެވެ. އާންމު ގޮތެއްގައި ކަސްޓަމަރުން ބޭންކަށް ޑޮލަރު ޖަމާކުރަނީ ބޭންކު ޓްރާންސްފަރ މެދުވެރިކޮށް ކަމަށް ވިޔަސް، ނިސްބަތުން ގިނަ އަދަދެއްގެ ކަސްޓަމަރުން އޭޓީއެމްތަކުން ނަގުދު ފައިސާގެ ގޮތުގައި ޑޮލަރު ނަގާ ކަމަށް އެ ބޭންކުން ވަނީ ބުނެފައެވެ.

ނަގުދު ފައިސާ ބޭނުންކުރަން ނުޖެހި، ދުވަހުން ދުވަހަށް ބޭނުންވާ ބޭންކިންގ ޚިދުމަތްތައް ފަސޭހަކަމާއެކު ހޯދޭނެ ޑިޖިޓަލް ވަސީލަތްތައް ޤާއިމުކުރުމަށްޓަކައި ބޮޑެތި އިންވެސްޓްމަންޓްތަކެއް ކޮށްފައިވާ ކަމަށް ބީއެމްއެލްއިން ބުނެއެވެ. އެގޮތުން ބީއެމްއެލް މޮބައިލް ބޭންކިންގ އަދި އިންޓަރނެޓް ބޭންކިންގ މެދުވެރިކޮށް، ކޮންމެ ވަގުތަކު ކޮންމެ ތަނެއްގައި ހުރެގެންވެސް ބިލުތަކަށް ފައިސާ ދެއްކުމާއި، ފައިސާ ޓްރާންސްފަރ ކުރުމުގެ އިތުރުން އެކައުންޓުގެ މުޢާމަލާތްތައް ބެލެހެއްޓޭނެއެވެ.

މީގެ އިތުރުން، ރާއްޖެއާއި ރާއްޖެއިން ބޭރުގެ ވިޔަފާރިތަކަށް ކާޑު މެދުވެރިކޮށް އަދި ކޮންޓެކްޓްލެސްކޮށް ފައިސާ ދެއްކުމާއި، އެކައުންޓުތަކަށް ވަގުތުން ފައިސާ ފޮނުވުމުގެ ޚިދުމަތްވެސް ލިބެމުންދާނެއެވެ. އަދި ބޭންކުގެ ޚިދުމަތްތައް ޑިޖިޓަލައިޒު ކުރުމުގެ ސިޔާސަތުގެ ދަށުން، އެކައުންޓު ހުޅުވުމާއި އެހެނިހެން ޚިދުމަތްތަކަށް މިހާރު އޮންލައިންކޮށް އެދެވޭނެ އިންތިޒާމުވެސް ވަނީ ހަމަޖައްސާފައެވެ.