"‎މަޢުރިފާ 2026" ފޮތް މަޢުރަޒު ފަށައިފި

ދީނީ އަދި ޢިލްމީ ފޮތްތަކަށް އާންމުން އަހުލުވެރިކުރުވުމުގެ މަޤްޞަދުގައި އިސްލާމީ ކަންތައްތަކާއި އަޢުޤާފާ ބެހޭ ވުޒާރާއިން ސިލްސިލާކޮށް ބާއްވަމުން އަންނަ "މަޢުރިފާ 2026" ފޮތް މަޢުރަޒު ފަށައިފިއެވެ. 

އިސްލާމީ ކަންތައްތަކާ ބެހޭ ވުޒާރާގެ އިސްނެންގެވުމަކަށް، ދިވެހި ބަހުގެ އެކެޑަމީއާ ގުޅިގެން ކުރިއަށްގެންދާ މި މަޢުރަޒު ކުރިއަށްދާނީ މިއަދުން ފެށިގެން މިމަހުގެ 3 ގެ ނިޔަލަށް އިސްލާމީ މަރުކަޒުގައެވެ. މި މަޢުރަޒު އާންމުންނަށް ހުޅުވިފައި ހުންނާނީ ކޮންމެ ދުވަހެއްގެ ހަވީރު 4:00އިން 6:00 އަށް އަދި ރޭގަނޑު 8:00 އިން 10:00 އަށެވެ.

 އަގުހެޔޮކޮށް ފޮތްތައް ލިބެން ހުންނާނެ މި މަޢުރަޒުން ދިވެހި، އަރަބި އަދި އިނގިރޭސި ބަހުގެ ފޮތްތަކުގެ އިތުރުން، އަރަބި އިސްލާމީ ފޮތްތަކާއި ދިވެހި ބަހާ ގުޅުންހުރި ގިނަ އަދަދެއްގެ ފޮތްތައް ލިބެން ހުންނާނެކަމަށް ބަހުގެ އެކަޑަމީއިން މަޢުލޫމާތުދެއްވައެވެ.

މި އަހަރުގެ މަޢުރަޒަށް ޒިޔާރަތްކުރާ ފަރާތްތަކަށް ހާއްސަ ހަރަކާތްތަކެއްގެ ގޮތުގައި މަޢުރަޒު ކުރިއަށްދާ ކޮންމެ ދުވަހަކު ނަސީބުވެރި 1 ފަރާތަކަށް 1,000 (އެއްހާސް) ރުފިޔާގެ ފައިސާގެ އިނާމެއް ލިބޭނެކަމަށް އިސްލާމިކް މިނިސްޓްރީން ވިދާޅުވެއެވެ. 

މި ގުރުއަތުލުން ކުރިއަށްދާނީ ކޮންމެ ރެއެއްގެ މަޢުރަޒު ނިންމުމުގެ ކުރިން ރޭގަނޑު 10:00 ގައެވެ.

އިސްލާމީ ކަންތައްތަކާއި އަޢުޤާފާ ބެހޭ ވުޒާރާއިން މިދިޔަ އަހަރުވެސް މި މަޢުރަޒު ބާއްވާފައިވާއިރު، އެ އަހަރުވެސް އާންމުންގެ ފަރާތުން ބޮޑު ތަރުޙީބަކާއި އެއްބާރުލުމެއް މި މަޢުރަޒަށް ލިބިފައިވާކަން އެ ވުޒާރާއިން ފާހަގަކުރައްވައެވެ.