ފޮތެއްގައި ލިޔެވިފަ ނެތް ނަމަވެސް ރޮނާލްޑޯއަށް އެހެން ހެދިގެން ނުވާނެ!

ދުނިޔޭގެ ފުޓުބޯޅައިގައި ލިޔެވިފައި ނެތް ނަމަވެސް ގަބޫލުކުރަންޖެހޭ ހަމަތަކެއް ހުރެއެވެ. އެއީ ޕެލޭ، ޑިއެގޯ މަރަޑޯނާ، ލިއޮނެލް މެސީ އަދި ކްރިސްޓިއާނޯ ރޮނާލްޑޯ ފަދަ ޝަހުސިއްޔަތަކާމެދު ކަންކަން ކުރަންވާނީ ވަކި އުސޫލަކުންނެވެ. އެފަދަ ހުނަރުވެރި، އަދި މުޅި ދުނިޔެ އިހުތިރާމްކުރާ ކުޅުންތެރިން މެޗެއްގައި އެއްވެސް ވަރަކަށް ބޭނުންނުކޮށް ބެންޗުގައި ބައިންދާ، އެ ކުޅުންތެރިންގެ ހުނަރާމެދު ސުވާލުކުރަން ޖެހޭފަދަ ގޮތަކަށް ކަންކަން ކުރުމަކީ ފުޓުބޯޅައިގެ އާދަކާދައާ މުޅިން ޚިލާފު ކަމެކެވެ.

މި މައުޟޫ ބޮޑު ބަހުސަކަށް ވެފައި މިވަނީ، މިދިޔަ މަހުގެ 27ވަނަ ދުވަހު ނޯވޭއާ ދެކޮޅަށް ކުޅެ ޕޯޗުގަލް 2-1 އިން މޮޅުވި މެޗުގައި ރޮނާލްޑޯ އެއްވެސްވަރަކަށް ބޭނުންނުކޮށް ބެންޗުގައި ބައިންދާފައިވާއިރު، އޭގެ ފަހުން ގައުމީ ޓީމުގެ ކޭމްޕު ދޫކޮށް ރޮނާލްޑޯ ދިއުމުންނެވެ. 

ނޯވޭ މެޗުގައި ރޮނާލްޑޯ ބޭނުން ކޮށްފައި ނުވާއިރު، މިއީ 2008 ވަނަ އަހަރަށް ފަހު ގައުމީ ޓީމުގެ މެޗެއްގައި އޭނާ ބެންޗުގައި އިނދެ، ނުކުޅެ ހުންނަން ޖެހުނު ފުރަތަމަ ފަހަރެވެ. އޭގެ ފަހުން ރޭ ޑެންމާކް އަތުން ޕޯޗުގަލް މޮޅުވި މެޗަށް ފަހު އެ މައުޟޫގައި ވާހަކަ ދައްކަމުން، އުމުރުން 72 އަހަރުގެ ކޯޗު ޖޯޖް ޖީސޫސް ބުނީ، ވަކި ހާއްސަ ހައިސިއްޔަތެއް އޮންނަ ކުޅުންތެރިން ޕޯޗުގަލްގައި ތިބޭކަން ގަބޫލުކުރާ ކަމަށާއި ނަމަވެސް އުސޫލުތައް އެންމެންނަށް ވެސް ހަމަހަމަ ވާނެ ކަމަށެވެ. އަދި އޭނާގެ ކޯޗިން ކެރިއަރުގައި އަބަދުވެސް ހިފަހައްޓާފައިވަނީ އެ އުސޫލު ކަމަށް ވެސް ޖީސޫސް ބުންޏެވެ.

މި މައްސަލައިގައި ރޮނާލްޑޯގެ ކޮއްކޮ އެލްމާ އަވޭރޯ މީސްމީޑިއާގައި ބުނެފައިވަނީ "ބޭވަފާތެރިކަމަކީ ފިނިކޮށް ހުއްޓާ ކާން އެންމެ މީރު ކެއުން" ކަމަށެވެ.

ގައުމީ ޓީމަށް 234 މެޗުން 146 ލަނޑު ޖަހައިދީފައިވާ ރޮނާލްޑޯ އަކީ އެތައް އަހަރެއް ވަންދެން ޓީމުން ބާކީ ނުކުރެވޭނެ ކަމަށް ބެލެވުނު ކުޅުންތެރިއެކެވެ. ކޯޗު ޖީސޫސް އާއި ރޮނާލްޑޯއާ ދެމެދު މައްސަލައެއް ނެތް ކަމަށް ބުނި ނަމަވެސް، ރޮނާލްޑޯ ވަނީ ގައުމީ ޓީމުގެ ކޭމްޕު ދޫކޮށް ގޮސްފައެވެ. އަދި ޓީމު ދޫކޮށް ދިޔަ ސަބަބު ފަހުން ހާމަކުރާނެ ކަމަށް އޭނާ ވަނީ ބުނެފައެވެ.

ރޮނާލްޑޯއަކީ ޕޯޗުގަލްގެ ތާރީޚު ދުށް އެންމެ މޮޅު ކުޅުންތެރިޔާ ކަމަށްވާއިރު، ޖީސޫސް އަކީ ދުނިޔޭގެ އެންމެ މޮޅު ކޯޗު ކަމަށް އޭނާ އަމިއްލައަށް ދެކޭ މީހެކެވެ. އަލް ހިލާލްގައި ހުރެ ނޭމާއަކީ އޭރު ޕްރޮފެޝަނަލް ފުޓުބޯޅަ ކުޅެވޭ ފެންވަރުގެ ކުޅުންތެރިއެއް ނޫންކަމަށް ބުނެ އަދި ޕޯޗުގަލްގެ ދަށް ޑިވިޝަނެއްގައި ކުޅޭ ބެލެނެންސެސްގެ ކޯޗަކަށް ހުރިއިރު، މަޝްހޫރު ރެޕަރ "50 ސެންޓް" ގެ ސައުންޑްޗެކް ހުއްޓުވި ޖީސޫސް އަކީ އެއްވެސް މީހަކަށް ޖެހިލުންވާ ކޯޗެއް ނޫނެވެ. މިއީ ކުރީގެ ކޯޗު ރޮބާޓޯ މާޓިނޭޒްގެ މަޑުމައިތިރި އުސޫލާ މުޅިން ތަފާތު ގޮތެކެވެ.

ނަމަވެސް މި މަންޒަރުން ފެންނަނީ ހިތާމަވެރި ހަގީގަތެކެވެ. ޕޯޗުގަލްގެ ފަހުގެ ފަސް ކޯޗުންގެ ތެރެއިން ހަތަރު ކޯޗުންނާ (ކާލޯސް ކުއިރޯޒް، ޕައުލޯ ބެންޓޯ، ފެނާންޑޯ ސަންޓޯސް އަދި މިހާރު ޖީސޫސް) ރޮނާލްޑޯ ވަނީ މައްސަލަ ޖެހިފައެވެ. މިއީ ތާރީޚުގައި ވެސް އެ ގައުމަށް ލިބުނު އެންމެ މޮޅު ޖީލުގެ ކުޅުންތެރިން ތިބި ވަގުތެއްގައި ޓީމުގެ ސަމާލުކަން ގެއްލޭ ކަމެކެވެ. އަދި މިއީ ކެޕްޓަނެއްގެ ފަރާތުން ފެންނަންވާނެ ފަދަ ޒިންމާދާރު އަމަލެއް ނޫން ކަމަށާއި، ދުވަހަކު "ނޫނެކޭ" އަޑުއަހަން އާދަވެފައި ނެތް ކުޑަކުއްޖެއްގެ މިޒާޖު ދައްކުވައިދޭ ކަމެއް ކަމަށް ގިނަ ބަޔަކު ދެކެއެވެ.

ޔޫރޯ 2016 ކާމިޔާބުކޮށްދީ، ބެލޮންޑިއޯ ފަސް ފަހަރު ހޯދާފައިވާ ރޮނާލްޑޯއަކީ ޔޫރަޕް މުބާރާތްތަކުގެ ތާރީޚުގައި އެންމެ ގިނަ ލަނޑު ޖެހި އަދި ވޯލްޑް ކަޕްގެ ހަ މުބާރާތެއްގައި ލަނޑު ޖެހި ހަމައެކަނި ކުޅުންތެރިޔާއެވެ. އެހެންނަމަވެސް، އޭނާގެ ސަބަބުން މިހާރު ޕޯޗުގަލްގެ ކުރިއެރުމަށް ހުރަސްއެޅެމުންދާ ކަމަށް ގިނަ ބަޔަކު ދަނީ ބުނަމުންނެވެ.