އެފްޑީސީ ފްލެޓު ކުއްޔަށް ދިނުމާއި، ކުލި ނުދައްކާ 564 ޔުނިޓްގެ މައްސަލައެއް

ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭ ދެވަނަ ފިޔަވަހީގައި ތަރައްގީކޮށްފައިވާ ހައުސިންގ ޔުނިޓުތަކާ ގުޅިގެން ހުއްދަނެތި ކުއްޔަށް ދިނުމުގެ 16 މައްސަލައެއް ބަލަމުންދާ ކަމަށާއި، ގަވާއިދުން ކުލި ނުދައްކާ 564 ޔުނިޓެއް ހުރި ކަމަށް އެ ކުންފުނިން ހާމަކޮށްފިއެވެ.

އެފްޑީސީން ހިއްސާކޮށްފައިވާ ތަފާސްހިސާބުތަކަށް ބަލާއިރު، މިދިޔަ މަހުގެ 21 ވަނަ ދުވަހާ ހަމައަށް އެ ކުންފުނީގެ 4000 ހައުސިންގ ޔުނިޓާ ގުޅޭ 49 މައްސަލައެއް ވަނީ ހުށަހެޅިފައެވެ. މި މައްސަލަތަކުގެ ތެރޭގައި ހުއްދަނެތި އެޕާޓްމަންޓަށް ބަދަލު ގެނައުމާއި، ކުއްޔަށް ދިނުމާއި، ކުނި އެޅުމުގެ ގަވާއިދާ ޚިލާފުވުމުގެ އިތުރުން އަޑުގަދަވުމުގެ ޝަކުވާތައް ހިމެނެއެވެ.

ހުށަހެޅިފައިވާ މައްސަލަތަކުގެ ތެރެއިން އެންމެ ގިނައީ ހުއްދަ ނެތި ޔުނިޓުތަކަށް ބަދަލު ގެނައުމުގެ މައްސަލަތަކެވެ. މިގޮތުން ހުށަހެޅުނު 28 މައްސަލައިގެ ތެރެއިން 5 މައްސަލައެއްގައި ވެރިފަރާތް ވަނީ ޖޫރިމަނާކޮށްފައެވެ. އަދި ހުއްދަނެތި ކުއްޔަށް ދޫކުރުމުގެ 16 މައްސަލައިގެ ތެރެއިން 5 ޔުނިޓެއްގެ ވެރިފަރާތް ޖޫރިމަނާކޮށް، 2 ޔުނިޓަކަށް ނޯޓިސް ފޮނުވާފައިވާއިރު، އިތުރު 9 މައްސަލައެއް ބަލަމުން އަންނަ ކަމަށް އެފްޑީސީން ބުނެއެވެ.

މީގެ އިތުރުން ގަވާއިދާ ޚިލާފަށް ކުނި އެޅުމުގެ 3 މައްސަލައެއް ފާހަގަކުރެވި 2 ފަރާތެއް ޖޫރިމަނާކޮށްފައިވާއިރު، އެންގުންތަކަށް އަމަލުނުކުރުމުގެ 2 މައްސަލައަކާއި އަޑުގަދަވުމުގެ 2 މައްސަލައެއްވެސް ވަނީ ބަލާފައެވެ.

ކުލި ދެއްކުމުގެ ކަންކަމަށް އަލިއަޅުވާލަމުން އެފްޑީސީން ބުނީ، މަހުން މަހަށް ގަވާއިދުން ކުލި ދައްކަމުންދަނީ 3،362 ޔުނިޓުން ކަމަށެވެ. އަދި ގަވާއިދުން ކުލި ނުދައްކާ 564 ޔުނިޓު ވާކަމަށް އެ ކުންފުނިން ވަނީ ފާހަގަކޮށްފައެވެ.