ތިލަފުށީ ވިޔަފާރި ބަނދަރާއެކު ކާބޯތަކެތި 24 ގަޑިއިރު ތެރޭގައި ކްލިއާ ކުރެވޭނެ: ވަޒީރު ސައީދު

ރާއްޖޭގެ ވިޔަފާރި ބަނދަރު (ކޮމާޝަލް ޕޯޓް) ތިލަފުށްޓަށް ބަދަލުކުރުމުގެ މަޝްރޫއަކީ، 2040 ވަނަ އަހަރު އަންނަންވާއިރަށް ރާއްޖެއަކީ ތަރައްގީވެފައިވާ ގައުމަކަށް ހެދުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންގުޅުއްވާ ތަސައްވުރު ހަގީގަތަކަށް ހެދުމަށް އެޅޭ އެންމެ ވަރުގަދަ އެއް ބިންގާ ކަމަށް އިގްތިސާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ. ވަޒީރު މިހެން ވިދާޅުވީ، ރައީސުލްޖުމްހޫރިއްޔާގެ އަރިހުގައި ތިލަފުށީގެ ޕޯޓް މަޝްރޫއުގެ މަސައްކަތްތައް ބައްލަވާލެއްވުމަށް އެ ރަށަށް ކުރެއްވި ޒިޔާރަތުގައެވެ.

ވަޒީރު ސައީދު ފާހަގަކުރެއްވި ގޮތުގައި، މި މަޝްރޫއު ނުހިނގާ އެތައް އަހަރެއް ވޭތުވެދިޔުމަކީ މުޅި ގައުމުގެ ވިޔަފާރިއާއި އިގްތިސާދީ ކުރިއެރުމަށް އެޅިފައި އޮތް ބޮޑު ހުރަހެކެވެ. ނަމަވެސް މި ސަރުކާރުން މި މަސައްކަތް ހަލުވި ދުވެއްޔެއްގައި ފަށާފައިވާކަން ފާހަގަކުރައްވަމުން ވަޒީރު ވިދާޅުވީ، ސަރުކާރުގެ އަމާޒަކީ އަންނަ އަހަރުގެ ނޮވެމްބަރު މަހުގެ ނިޔަލަށް ފުރަތަމަ ފިޔަވަހި ނިންމުމަށްފަހު، 2028 ވަނަ އަހަރުގެ ނޮވެމްބަރަށް މުޅި މަޝްރޫއު އެއްކޮށް ނިންމާލުން ކަމަށެވެ.

ރާއްޖޭގެ ޕްރައިވެޓް ސެކްޓަރުގައި، ހާއްސަކޮށް ޓޫރިޒަމް ދާއިރާއާ ގުޅުންހުރި ކޮންސްޓްރަކްޝަންގެ 11 ބިލިއަން ޑޮލަރުގެ އިންވެސްޓްމަންޓް މިހާރުވެސް ހިނގަމުންދާކަން ފާހަގަކުރައްވަމުން ވަޒީރު ވިދާޅުވީ، މި މަޝްރޫއުގެ ސަބަބުން ވިޔަފާރިވެރިންނާއި އިންވެސްޓަރުންނަށް މުދާ ލިބުމުގައި ދިމާވާ ދަތިތަކަށް ދާއިމީ ހައްލެއް ލިބޭނެ ކަމަށެވެ. އަދި މި މަޝްރޫއުގެ ސަބަބުން އާންމު ރައްޔިތުންގެ ދިރިއުޅުމުގެ ހަރަދުތަކަށްވެސް ބޮޑު ލުޔެއް ލިބިގެންދާނެ ކަމަށް ވިދާޅުވިއެވެ.

މީގެއިތުރުން، ކާބޯތަކެއްޗާއި ތަރުކާރީ އަދި މޭވާ ފަދަ ނާޒުކު ތަކެތި ކްލިއާކުރުމަށް މިހާރު ހަތް ދުވަސް ނުވަތަ އަށް ދުވަސް ނެގި ނަމަވެސް، އައު ބަނދަރުގެ ހިދުމަތް ފެށުމުން ބޯޓުފަހަރުން މުދާ ބާލާތާ 24 ގަޑިއިރު ނުވަތަ އެއް ދުވަހުގެ ތެރޭގައި ކްލިއާކުރެވި، ތާޒާކަންމަތީ ފިހާރަތަކަށް މުދާ ފޯރުކޮށްދެވޭނެ ކަމަށް ވަޒީރު ފާހަގަކުރެއްވިއެވެ.

ވަޒީރު ސައީދު ވިދާޅުވީ "މި މަޝްރޫއު ނިމޭއިރު އިންޓަނޭޝަނަލް ކީވޯލްއާއި އިންޓަރނޭޝަނަލް ބަނދަރާއި ސްޓޯރޭޖް ވެއާހައުސް އަދި އަތޮޅު ފިހާރަތައް ފަދަ ބާޒާރުމަތީގައި ހުރި ހުރިހާ އޮޕަރޭޝަންސްތައް ބަދަލުވެ، ގޯޑައުންނާއި ފިރީޒޯންތަކާއި އަދި ބްރިޖްއިން ގުޅި ކާގޯ ދެވޭނެ ގޮތަށް އިންތިޒާމްތައް ހަމަޖެހިގެންދާނެ. އަދި ހުޅުމާލެއިންވެސް އިންބައުންޑް ކާގޯ ދެވޭނެ ގޮތަށް ، އެއަޕޯޓަށް ސީޓު އެއާ ކާގޯގެ ހިދުމަތްވެސް ދެވޭނެ ގޮތަށް ހައްލެއް ގެނެވޭނެ" ކަމަށެވެ.

މި ބިޔަ މަޝްރޫއު ނިމިގެންދާއިރު ބައިނަލްއަގުވާމީ ފެންވަރުގެ ކީވޯލްތަކާއި ޒަމާނީ ބަނދަރެއް ގާއިމުވެ، ބާޒާރުމަތީގައި ހުރި އަތޮޅު ފިހާރަތަކާއި ގުދަންތައް ފަދަ ވިޔަފާރީގެ މުހިންމު ހިދުމަތްތައް ތިލަފުށްޓަށް ބަދަލުވެގެންދާނެއެވެ. އަދި ބްރިޖް މެދުވެރިކޮށް އެއްގަމު މަގުން ކާގޯ އުފުލުމާއި، ވެލާނާ އިންޓަނޭޝަނަލް އެއާޕޯޓަށް ސީ-ޓު-އެއާ ކާގޯގެ ހިދުމަތް ފުޅާ ދާއިރާއެއްގައި ދިނުމަށް މަގުފަހިވެގެންދާނެއެވެ.