ހިތްތަކުގެ ހަމަޖެހުމާއި ފަރުވާއަކީ ގިނަގިނައިން ﷲ ހަނދުމަކުރުން: ހުކުރު ޚުތުބާ

މިއަދުގެ ދުނިޔޭގައި ދިމާވާ ހާސްކަމާއި ނަފުސާނީ ގޮންޖެހުންތަކާއި ދިރިއުޅުމުގެ އެންމެހައި ދަތިތަކަށް އޮތް އެންމެ މަތިވެރި ފަރުވާއަކީ ގިނަގިނައިން މާތް ﷲ ހަނދުމަކުރުން ކަމަށް މިއަދުގެ ހުކުރު ޚުތުބާގައި ހަނދާންކޮށްދީފިއެވެ.

ޚުތުބާގައި ފާހަގަކުރި ގޮތުގައި، މާތް ﷲ ހަނދުމަކުރުމަކީ ހިތްތަކުގެ ދިރުން ކަމަށާއި އެކަލާނގެ މަތިވެރި ޙަޟްރަތާ ކުއްތަންވުމަށް އޮތް އެންމެ ފަސޭހަ މަގެވެ.

މާތް ﷲ ހަނދުމަކުރުން މައިގަނޑު ތިން ބަޔަކަށް ބެހިގެންވާކަން ޚުތުބާގައި ވަނީ ތަފްޞީލުކޮށްދީފައެވެ. އެއީ ހިތުގެ އިޚްލާޞްތެރިކަމާއެކު ކާއިނާތުގެ އުފެއްދުންތަކާމެދު ފިކުރުކޮށް ހަނދުމަކުރުމާއި، ކީރިތި ޤުރްއާން ކިޔެވުމާއި ތަސްބީޙަ ކިޔުން ފަދަ ދުލުން ކުރެވޭ ޛިކުރުތަކުގެ އިތުރުން، ފަރުޟު ނަމާދުތަކާއި އެހެނިހެން އަޅުކަންތައް އަދި މައިންބަފައިންނަށް އޯގާތެރިވުން ފަދަ ޢަމަލީ ގޮތުން ނުވަތަ ގުނަވަންތަކުގެ ޒަރީޢާއިން ހަނދުމަކުރުމެވެ.

ޛިކުރުކުރުމުން ހިތްތަކަށް ލިބޭ ހަމަޖެހުން ބަޔާންކުރައްވައި ކީރިތި ޤުރްއާނުގެ އާޔަތެއްގެ މާނަ ޚުތުބާގައި ގެނެސްދީފައިވެއެވެ. އެ އާޔަތުގެ މާނައިގައިވަނީ، "އެއުރެންނީ، އީމާންވި މީހުންނެވެ. އަދި ﷲ ހަނދުމަކުރުމުން، އެއުރެންގެ ހިތްތައް ހަމަޖެހޭ މީހުންނެވެ. ހިތްތައް ހަމަޖެހެނީ، ﷲ ހަނދުމަކުރުމުން ނޫންހެއްޔެވެ؟" މިފަދައިންނެވެ.

ހަމައެއާއެކު، ޛިކުރުކުރާ މީހާއާއި ޛިކުރުނުކުރާ މީހާގެ ތަފާތު ބަޔާންކުރައްވައި ކީރިތި ރަސޫލާ ޞައްލަﷲ ޢަލައިހި ވަސައްލަމް ޙަދީޘްކުރައްވާފައިވާ ބަސްފުޅެއްގެ މާނަ ޚުތުބާގައި ވިދާޅުވިއެވެ. އެކަލޭގެފާނު ޙަދީޘްކުރެއްވިއެވެ. "އެ މީހެއްގެ ވެރިރަސްކަލާނގެ ހަނދުމަކުރާ މީހާއާއި، އެކަލާނގެ ހަނދުމަނުކުރާ މީހާގެ މިސާލަކީ، ދިރިހުރި މީހަކާއި މަރުވެފައިވާ މީހެއްގެ މިސާލެވެ." މީގެ އިތުރުން، އަޅަކު ހެޔޮ ޢަމަލުކޮށް ﷲއާ ކުއްތަންވާ މިންވަރަކަށް، އެކަލާނގެ ދަރުމައާއި ރަޙުމަތް އެ އަޅާއަށް ދެއްވުމުގައި އަވަސްވެވޮޑިގަންނަވާކަން ޤުދުސިއްޔަ ޙަދީޘުން ވަނީ ހަނދާންކޮށްދީފައެވެ.

ޛިކުރުކުރުމަކީ ވަކި ތަނެއްގައި ނުވަތަ ހަމައެކަނި މިސްކިތުގައި އިނދެގެން ކުރަންޖެހޭ ކަމެއް ނޫން ކަމަށާއި، ހިނގާފައި ދާއިރު، ދަތުރުމަތީގައި، އޮށޯވެ އޮންނައިރު އަދި މަސައްކަތުގެ މައިދާނުގައި ވެސް ޛިކުރު ކުރެވޭނެ ކަމަށް ޚުތުބާގައި ބަޔާންކުރިއެވެ. އަދި ކީރިތި ރަސޫލާ  ޞައްލައްﷲ ޢަލައިހި ވަސައްލަމް ޙަދީޘްކުރައްވާފައިވާ ބަސްފުޅެއްގެ މާނައިގައި، "މާތްﷲ ހަނދުމަކުރުމުން ތިބާގެ ދޫ އަބަދުވެސް ތެތްކަންމަތީ ބާއްވާށެވެ،" އޮންނަ ކަމަށްވެސް ފާހަގަކުރިއެވެ.

ޚުތުބާ ނިންމާލަމުން ވަނީ ޙަޤީޤީ ޛިކުރަކީ ދުލުން ކިޔާ ކަލިމަތަކާއެކު ހިތް ހާޒިރުކޮށް، ފާފަތަކާ ދުރުހެލިވުން ކަމަށް ބުނެދީފައެވެ. އަދި ހެނދުނާއި ހަވީރުގެ ދުޢާތަކަށާއި ނަމާދުގެ ފަހުގައި ކުރާ ޛިކުރުތަކަށް ފަރުވާތެރިވުމަށް އެންމެހައި މުސްލިމުންނަށް ވަނީ ނަސޭހަތްތެރިވެފައެވެ.