ހަތްދިހައަށް ވުރެ ގިނަ ރަށުގައި މިނިމަމް ޓެސްޓިންގެ ހިދުމަތް ގާއިމްކޮށްފި

ރާއްޖޭގެ އެކި ކަންކޮޅުތަކުގައި ލެބޯޓްރީގެ ޚިދުމަތް ފުޅާކުރުމަށް ސަރުކާރުން ކުރަމުންދާ މަސައްކަތުގެ ދަށުން، މިހާތަނަށް 77 ރަށެއްގައި މިނިމަމް ޓެސްޓިންގެ ޚިދުމަތް ޤާއިމުކޮށްފައިވާ ކަމަށް ސިއްހަތާއި އާއިލާއާއި އިޖުތިމާއީ އެހީއާ ބެހޭ ވުޒާރާއިން ހާމަކުރައްވައިފިއެވެ.

މިކަން ހާމަކުރެއްވީ ބުދަ ދުވަހު ރައީސުލްޖުމްހޫރިއްޔާގެ އޮފީހުގައި ނޫސްވެރިންނަށް މަޢުލޫމާތު ދެއްވުމަށް ބޭއްވި ބައްދަލުވުމުގައި، ސިއްހަތާއި އާއިލާއާއި އިޖުތިމާއީ އެހީއާ ބެހޭ ވަޒީރު ގީލާ އަލީއެވެ.

އެ ބައްދަލުވުމުގައި ވާހަކަފުޅު ދައްކަވަމުން ވަޒީރު ވިދާޅުވީ، ރަށްރަށުގެ ސިއްހީ ނިޒާމު ހަރުދަނާކުރުމަށް ކުރެވޭ މަސައްކަތްތަކުގެ ތެރެއިން، މުޅިން އަލަށް 22 ރަށެއްގައި ލެބޯޓްރީގެ ޚިދުމަތް މިހާރު ޤާއިމުކުރެވިފައިވާ ކަމަށެވެ. އަދި އިތުރު 52 ރަށެއްގައި ލެބޯޓްރީ ޤާއިމުކުރުމުގެ ޢަމަލީ މަސައްކަތް ބާރަށް ކުރިއަށްދާ ކަމަށްވެސް އެކަމަނާ ވިދާޅުވިއެވެ.

މީގެ އިތުރުން، ކިޑްނީގެ ބަލިތަކަށް ފަރުވާ ހޯދަމުންދާ ފަރާތްތަކަށް ލުއިފަސޭހަކޮށްދިނުމުގެ ގޮތުން 11 ރަށެއްގައި އަލަށް ޑަޔަލިސިސްގެ ޚިދުމަތް ފަށާފައިވާ ކަމަށާއި، އިތުރު 9 ރަށެއްގައި މި ޚިދުމަތް ފެށުމަށްޓަކައި ވާންޖެހޭ ތައްޔާރީތައް ވަމުންދާ ކަމަށް ވަޒީރު ފާހަގަކުރެއްވިއެވެ. އަދި ދަތުގެ ފަރުވާގެ ޚިދުމަތް ހޮސްޕިޓަލަކާއި ސިއްޙީ މަރުކަޒެއްގައި އަލަށް ފަށާފައިވާއިރު، 12 ހޮސްޕިޓަލެއްގެ މެޝިންތައް އައުކޮށް، އިތުރު 2 ރަށެއްގައި ދަތުގެ ފަރުވާގެ ޚިދުމަތް ފެށުމުގެ މަސައްކަތް ކުރެވެމުންދާ ކަމަށްވެސް ވިދާޅުވިއެވެ.

މީގެއިތުރުން ވެސް، ރާއްޖޭގެ މުޅި ސިއްހީ ނިޒާޏު ކުރިއެރުވުމަށާއި، ރާއްޖޭގެ ހުރިހާ ހިސާބަކުން ރަނގަޅު ފެންވަރެއްގެ ސިއްހީ ފަރުވާ ހޯދުމުގައި މިހާތަނަށް ހާސިލްކުރެވުނު ގިނަ ކަންކަން އެ ކަމަނާ ހާމަކުރެއްވިއެވެ.

އެގޮތުން ވަޒީރު ވިދާޅުވީ، ސިއްޙީ ދާއިރާއިން ރައްޔިތުންނަށް ވެފައިވާ 478 ވަޢުދުގެ ތެރެއިން %67 ވަޢުދު މިހާރުވެސް ފުރިހަމަކުރެވިފައިވާ ކަމަށެވެ.

އަދި ސިއްޙީ ޚިދުމަތްތައް ތަރައްޤީކޮށް ފުޅާކުރުމަށް ސަރުކާރުން މިހާތަނަށް 244 ނިންމެވުމެއް ނިންމަވާފައިވާ ކަމަށާއި، މި ދާއިރާގެ 835 މަޝްރޫޢެއްގެ މަސައްކަތް އެކި މަރުހަލާތަކުގައި ކުރިއަށްދާކަން ވަޒީރު ފާހަގަކުރެއްވިއެވެ. އެކަމަނާ ވިދާޅުވި ގޮތުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މިހާތަނަށް ޖުމްލަ 5.98 ބިލިއަން ރުފިޔާގެ މަޝްރޫޢު ސިއްޙީ ދާއިރާގެ ކުރިއެރުމަށްޓަކައި ދަނީ ހިންގަމުންނެވެ.