ނިވާކަން ކުޑަކޮށް ހެދުން އަޅައިގެން އުޅޭ ބިދޭސީންނާއި ފަތުރުވެރިންނަށް ގާނޫނީ ފިޔަވަޅު އަޅަނީ

ދިވެހިރާއްޖޭގައި ދިރިއުޅޭ ބައެއް ބިދޭސީންނާއި ފަތުރުވެރިން އާންމު އިޖުތިމާއީ މިންގަނޑުތަކާ ހިލާފަށް ނިވާކަން ކުޑަކޮށް ހެދުން އަޅައިގެން އުޅޭ މައްސަލައިގައި ގާނޫނީ ފިޔަވަޅު އަޅާނެ ކަމަށް ދިވެހި ފުލުހުންގެ ހިދުމަތުން އިންޒާރު ދީފިއެވެ.

ފުލުހުން ނެރުނު ނޫސްބަޔާނެއްގައި ފާހަގަކޮށްފައިވާ ގޮތުގައި، މިހާރަކަށް އައިސް ރާއްޖޭގައި ދިރިއުޅޭ ބައެއް ބިދޭސީން އާންމު އިޖުތިމާއީ މިންގަނޑުތަކާ ހިލާފަށް، ނިވާކަން ކުޑަކޮށް ހެދުން އަޅައިގެން މަގުމައްޗާއި އާންމު ތަންތަނުގައި އުޅޭކަން ވަނީ ފާހަގަކުރެވިފައެވެ. އަދި މިއީ މުޖުތަމައުގެ އާންމު ސުލޫކީ އަދި އަހުލާގީ މިންގަނޑުތަކާ ހިލާފު، މުޖުތަމައުގެ އަމާންކަމާއި ސުލްހަ މަސަލަސްކަމަށް ނޭދެވޭ އަސަރުކޮށްފާނެ ކަމެއް ކަމަށް ވެސް ފުލުހުން ބުނެފައިވެއެވެ.

މިފަދަ ކަންކަން ހުއްޓުވުމަށް ފުލުހުންނަށް މަތިކޮށްފައިވާ ގާނޫނީ ޒިންމާގެ ދަށުން، ގާނޫނު ނަންބަރު 2010/11 (އާންމު އިޖްތިމާއީ މިންގަނޑުތަކާ ހިލާފު އަމަލުތައް ހުއްޓުވުމުގެ ގާނޫނު) ގެ ދަށުން އެޅެންހުރި ފިޔަވަޅުތައް އަޅާނެ ކަމަށް ފުލުހުންގެ ބަޔާނުގައި ވެއެވެ. އެހެންކަމުން، ބިދޭސީން ބަލަހައްޓާ ފަރާތްތަކުން ވެސް މިފަދަ އަމަލުތައް ނުފެންނާނެ ގޮތަށް ސަމާލުކަން ދިނުމަށް ވަނީ އިލްތިމާސްކޮށްފައެވެ.

މީގެއިތުރުން، ފަތުރުވެރިންނަށް ހާއްސަކޮށް ކަނޑައަޅާފައިވާ ސަރަހައްދުތައް ފިޔަވައި އެހެނިހެން އާންމު ތަންތަނާއި މަގުތަކުގައި އުޅޭއިރު، ދިވެހި މުޖުތަމައުގެ ސަގާފަތާއި އާދަކާދައަށް އިހުތިރާމުކޮށް، އާންމު އިޖުތިމާއީ މިންގަނޑުތަކާ އެއްގޮތަށް ހެދުން އެޅުމަށް ފަތުރުވެރިންނަށް ހިދުމަތްދޭ ފަރާތްތަކުން ހަނދާންކޮށްދިނުމަށް ވެސް ފުލުހުން ވަނީ އެދިފައެވެ. އަދި މި މިންގަނޑުތަކާ ހިލާފުވާ ފަރާތްތަކާމެދު ގާނޫނީ ފިޔަވަޅު އަޅަމުންދާނެ ކަމަށް ވެސް ފުލުހުން ވަނީ ހާމަކޮށްފައެވެ.