ހުޅުމާލޭގައި އިސްރަށްވެހިންނަށް ހާއްސަ ޕްރޮގުރާމެއް ފަށައިފި

ހުޅުމާލޭގައި ދިރިއުޅޭ އިސްރަށްވެހިންގެ ދުޅަހެޔޮކަން އިތުރުކޮށް، އިޖުތިމާއީ ގުޅުންތައް ބަދަހިކުރުމުގެ މަގުސަދުގައި "ދުޅަހެޔޮ އިސްރަށްވެހިން" ގެ ނަމުގައި ހާއްސަ ޕްރޮގްރާމެއް މިއަދު ފަށައިފިއެވެ.

މިއަހަރުގެ ބައިނަލްއަޤްވާމީ އިސްރަށްވެހިންގެ ދުވަސް ފާހަގަކުރުމުގެ ގޮތުން މިއަދު ހެނދުނު ހުޅުމާލޭ ސެންޓްރަލް ޕާކުގައި ބޭއްވި ހާއްސަ ހަރަކާތެއްގައި މި ޕްރޮގްރާމް ރަސްމީކޮށް އިފްތިތާހުކޮށްދެއްވީ ސިއްހަތާއި އާއިލާއާއި އިޖުތިމާއީ އެހީއާ ބެހޭ ވަޒީރު ގީލާ އަލީއެވެ. މިއީ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއި ހެލްތު މިނިސްޓްރީ ގުޅިގެން ކުރިއަށްގެންދާ ޕްރޮގްރާމެކެވެ.

އެޗްޑީސީން މައުލޫމާތު ދެއްވާގޮތުގައި، މި ޕްރޮގްރާމްގައި ބައިވެރިވާން އެދޭ އިސްރަށްވެހިން ރަޖިސްޓަރ ކުރުމަށާއި ސެޝަންތަކުގައި ބައިވެރިވުމަށް އެއްވެސް ފީއެއް ދައްކާކަށް ނުޖެހޭނެއެވެ.

މި ޕްރޮގްރާމުގެ ދަށުން ކޮންމެ ހަފްތާއަކު ތިން ދުވަހު، އިސްރަށްވެހިންގެ އުމުރާ ގުޅޭގޮތަށް ރޭވިފައިވާ ލުއި ކަސްރަތުތަކާއި، ހިނގުމާއި، ސްޓްރެޗިންގ އަދި ނޭވާލުމުގެ ކަސްރަތުތައް ކުރިއަށްގެންދިއުމަށް ވަނީ ހަމަޖެހިފައެވެ. މީގެ އިތުރުން "ގޯލްޑަން އަވާ" ގެ ނަމުގައި ހަފްތާއަކު އެއްފަހަރު ނުވަތަ ކޮންމެ ދެ ހަފްތާއަކުން އެއް ދުވަހު، އިސްރަށްވެހިންނަށް ހާއްސަކޮށްގެން ބާއްވާ ހަވީރުގެ ސައެއް ވެސް ކުރިއަށްދާނެއެވެ.

ހަމައެއާއެކު، މަހަކު އެއްފަހަރު ކުޑަގިރި ނުވަތަ އެނޫންވެސް ހިތްފަސޭހަ ކައިރި ރަށަކަށް ދަތުރުގޮސް، އުފާވެރި މާހައުލެއްގައި އިސްރަށްވެހިންނަށް ވަގުތު ހޭދަކުރުމުގެ ފުރުސަތު ފަހިކޮށްދިނުމަށް ވަނީ ރޭވިފައެވެ. އަދި އަހަރުގެ ކޮންމެ ކުއާޓަރަކު އެއްފަހަރު، އިސްރަށްވެހިންގެ ލޭގެ ޕްރެޝަރު ބެލުން ފަދަ މެޑިކަލް ޗެކަޕްތައް ހެދުމާއި، ކުޑަކުދިންނާއި ޒުވާނުންނަށް އިސްރަށްވެހިންގެ ފަރާތުން ސަގާފީ މައުލޫމާތު ހިއްސާކުރުމުގެ ހާއްސަ ހަރަކާތްތަކެއް ވެސް މި ޕްރޮގްރާމުގެ ތެރޭގައި ހިމެނެއެވެ.

އެޗްޑީސީން ބުނީ، މި ޕްރޮގްރާމްގެ ހުރިހާ ހަރަކާތްތަކެއްގައިވެސް ބައިވެރިންގެ ރައްކާތެރިކަމާއި ސިއްހީ ހާލަތަށް ހާއްސަ ސަމާލުކަމެއް ދެވޭނެ ކަމަށެވެ. އެގޮތުން ބައިވެރިންނަށް ބޭނުންވާ ދަތުރުފަތުރުގެ އިންތިޒާމުތައް ހަމަޖައްސައިދިނުމުގެ އިތުރުން، ސެޝަންތައް ކުރިއަށްދާ ވަގުތު ފަސްޓްއެއިޑްގެ ޚިދުމަތާއި، ބޯފެނާއި އަރާމުކުރާނެ އިންތިޒާމުތައް ފުރިހަމައަށް ގާއިމުކޮށްފައި ހުންނާނެ ކަމަށް އެ ކޯޕަރޭޝަނުން މައުލޫމާތުދެއެވެ.

_{އިސްރަށްވެހިންނަށް ހާއްސަކޮށް ބޭއްވި ޕްރޮގުރާމް / ފޮޓޯ: އެޗްޑީސީ}

މި ޕްރޮގްރާމަކީ އެޗްޑީސީ އާއި މިނިސްޓްރީ އޮފް ހެލްތުގެ އިތުރުން، ހުޅުމާލެ ހޮސްޕިޓަލާއި، ދިވެހި ފުލުހުންގެ ޚިދުމަތާއި، ފިޒިއޯ ސޮލިއުޝަންސް، ޕެންޝަން އޮފީސް، އެމްޓީސީސީ، އުރީދޫ އަދި އެކިއެކި ޖަމިއްޔާތަކުގެ އެއްބާރުލުމާއެކު ކުރިއަށްގެންދާ ޕްރޮގްރާމެކެވެ.

އެޗްޑީސީގެ މައިގަނޑު އަމާޒަކީ މި ޕްރޮގްރާމްގެ ސަބަބުން އިސްރަށްވެހިންގެ ސިއްހީ އަދި ނަފްސާނީ ދުޅަހެޔޮކަން އިތުރުވެ، މުޅި ހުޅުމާލެއަކީ ހުރިހާ އުމުރެއްގެ ރައްޔިތުންނަށްވެސް އުފަލާއެކު ދިރިއުޅެވޭނެ ހިތްފަސޭހަ އަދި އެކުވެރި މުޖުތަމައަކަށް ހެދުންކަމަށް ވަނީ ހާމަކޮށްފައެވެ.