މުދަލު ޒަކާތުގެ ގޮތުގައި ލިބުނު ޢަދަދު މިދިޔަ އަހަރަށް ވުރެ އިތުރުވެއްޖެ

މި އަހަރުގެ މިހާތަނަށް މުދަލު ޒަކާތުގެ ގޮތުގައި ބަލައިގަތް ޢަދަދު، 2025ވަނަ އަހަރު މުޅި އަހަރަށް ލިބުނު ޖުމުލަ ޢަދަދަށް ވުރެ އިތުރުވެއްޖެއެވެ. އެގޮތުން 2026ވަނަ އަހަރުގެ ސެޕްޓެންބަރު މަހުގެ ނިޔަލަށް މުދަލު ޒަކާތުގެ ގޮތުގައި ޖުމުލަ 109.26 މިލިއަން ދިވެހި ރުފިޔާ ވަނީ ބަލައިގަނެފައެވެ.

1 ޖަނަވަރީ 2026 އިން ފެށިގެން 30 ސެޕްޓެންބަރު 2026 ގެ ނިޔަލަށް މުދަލު ޒަކާތުގެ ގޮތުގައި ޖުމުލަ 109,262,025.69 ރުފިޔާ ލިބިފައިވެއެވެ. މިއީ 2025 ވަނަ އަހަރު އެއްކޮށް ލިބުނު 106,456,071.00 ރުފިޔާއަށް ވުރެ 2,805,954.69 ރުފިޔާ އިތުރު ޢަދަދެކެވެ. މިއީ 2025 ވަނަ އަހަރު ބަލައިގަތް ޖުމުލަ ޢަދަދާ އަޅާބަލާއިރު ގާތްގަނޑަކަށް %2.64 ގެ ކުރިއެރުމެކެވެ.

މި އަހަރުގެ ސެޕްޓެމްބަރު 30 ގެ ނިޔަލަށް ބަލައިގަތް ފައިސާގެ ތަފްޞީލަށް ބަލާއިރު، ދިވެހި ރުފިޔާއިން ޖުމްލަ 108,739,116.62 ރުފިޔާ ލިބިފައިވާއިރު، ބޭރު ފައިސާގެ ގޮތުގައި 34,021.41 ޔޫ.އެސް ޑޮލަރު ވެސް ވަނީ ބަލައިގަނެފައެވެ.

މިދިޔަ އަހަރުގެ ޖުމުލަ ޢަދަދު ފަހަނަޅައި ގޮސްފައި މިވަނީ މި އަހަރު ނިމެން އަދި ތިން މަސްދުވަސް ބާކީ އޮއްވައެވެ. އެހެންކަމުން، އޮކްޓޫބަރު މަހުން ފެށިގެން ޑިސެންބަރު މަހުގެ ނިޔަލަށް ލިބޭ ފައިސާއާއެކު، މި އަހަރުގެ ޖުމުލަ ޢަދަދު އިތުރަށް ބޮޑުތަނުން އިތުރުވެގެންދާނެ ކަމަށް ބެލެވެއެވެ.