މަނަދޫގައި އެފްއެސްއެމްގެ ފިއުލް ސްޓޭޝަނެއް ގާއިމުކޮށްފި

ރާއްޖޭގެ ކޮންމެ އަތޮޅެއްގައި އެސްޓީއޯ ރޭޓްގައި ތެޔޮ ލިބޭނެ އިންތިޒާމް ހަމަޖެއްސުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެވަޑައިގެންފައިވާ ވައުދުފުޅުގެ ދަށުން، ނ. މަނަދޫގައި ފިއުލް ސަޕްލައިސް މޯލްޑިވްސް (އެފްއެސްއެމް)އިން ފިއުލް ސްޓޭޝަނެއް ގާއިމުކޮށް ޚިދުމަތް ދޭން ފަށައިފިއެވެ.

މަނަދޫގައި ތަރައްޤީކުރި މި ފިއުލް ސްޓޭޝަން ރަސްމީކޮށް ހުޅުވާފައިވަނީ އެކަމަށް ޓަކައި އެ ރަށުގައި ބޭއްވި ހާއްސަ ރަސްމިއްޔާތެއްގައި، ރައްޔިތުންގެ މަޖިލީހުގެ މަނަދޫ ދާއިރާގެ މެންބަރު ޙުސްނީ މުބާރިކެވެ. މި ރަސްމިއްޔާތުގައި އެ ރަށުގެ ކައުންސިލް މެންބަރުންނާއި، މުއައްސަސާތަކުގެ އިސްވެރިންނާއި، ގިނަ އަދަދެއްގެ އާންމު ރައްޔިތުން ވަނީ ބައިވެރިވެފައެވެ.

މަނަދޫގައި މި ސްޓޭޝަން ގާއިމުކޮށް ހިދުމަތްދޭން ފެށުމާއެކު، ކޮންމެ އަތޮޅެއްގައި އެސްޓީއޯ ރޭޓްގައި ތެޔޮ ލިބޭނެ އިންތިޒާމް ހަމަޖެއްސުމުގެ މަޝްރޫއުގެ ދަށުން ޖުމްލަ 8 ސްޓޭޝަނެއް ވަނީ ގާއިމުކުރެވިފައެވެ. 

ފިއުލް ސްޓޭޝަން އިފްތިތާހުކުރެވިފައިވާ ރަށްރަށް:

1. ރ. ދުވާފަރު
2. ހއ. އިހަވަންދޫ
3. ހދ. ހަނިމާދޫ
4. ށ. މިލަންދޫ
5. ބ. އޭދަފުށި
6. ފ. ނިލަންދޫ
7. ދ. މީދޫ
8. ނ. މަނަދޫ 

މި މަޝްރޫއުގެ ދަށުން އެންމެ ފުރަތަމަ ފިއުލް ސްޓޭޝަނެއް ގާއިމްކޮށްފައިވަނީ މިދިޔަ ޑިސެމްބަރު މަހު ރ. ދުވާފަރުގައެވެ. 2026 ވަނަ އަހަރުގެ ފަހުކޮޅު އިފްތިތާހު ކުރި މި ބޮޑު މަޝްރޫއުގެ ދަށުން ރާއްޖޭގެ އެކި ސަރަހައްދުތަކަށް އަމާޒުކޮށް ޖުމްލަ 19 ރަށެއްގައި ފިއުލް ސްޓޭޝަން ހެދުމަށް ވަނީ ހަމަޖެހިފައެވެ. މިއީ އަތޮޅުތެރޭގައި ދިރިއުޅޭ ރައްޔިތުންނަށް ފަސޭހަކަމާއެކު ތެޔޮ ލިބޭނެ މަގު ފަހިކޮށްދިނުމަށް ކުރިއަށްގެންދާ މަސައްކަތެކެވެ.

ސަރުކާރުގެ އަމާޒަކީ ރައްޔިތުންނަށް ބޭނުންވާ މުހިންމު ހިދުމަތްތައް އަތްފޯރާފަށުގައި ފޯރުކޮށްދިނުމެވެ. މި އަމާޒު ހާސިލްކުރުމަށްޓަކައި ސަރުކާރުގެ ކުންފުނިތައް މެދުވެރިކޮށް އެކި ދާއިރާތަކުން ތަރައްގީގެ ގިނަ މަސައްކަތްތަކެއް އަންނަނީ ކުރަމުންނެވެ.