ރޮށި ފިހާ ފުށް ބަހަމުންދިޔަ ކިޔޫއެއްގައި މަޑުކޮށްގެން ތިބި ބަޔަކަށް އަމާޒުކޮށް އިޒްރާއިލުން ހަމަލާދީފި

ޣައްޒާގައި ރޮށި ފިހާ ފުށް ބަހަމުންދިޔަ ކިޔޫއެއްގައި ފުށްލިބެންދެން މަޑުކޮށްގެން ތިބި ބަޔަކަށް އަމާޒުކޮށް އިޒްރާއިލްގެ ޢަސްކަރިއްޔާއިން ހަމަލާދީފިއެވެ.

ޣައްޒާގެ ޞިއްޙީ އިދާރާއަށް ހަވާލާދީ އަލްޖަޒީރާގައި ބުނެފައިވަނީ ފުށް ލިބެންދެން ތިބި ކިޔޫއަށް ދިން ހަމަލާގައި 10 މީހަކު ޝަހީދު ވެފައިވެއެވެ. އޭގެތެރޭގައި ކުޑަކުދިންނާއި އަންހެނުންވެސް ހިމެނޭކަމަށް އަލްޖަޒީރާގައި ވަނީ ބުނެފައެވެ.

ޣައްޒާގެ ޞިއްޙީ ވުޒާރާއިން މިއަދު ބުނެފައި ވަނީ އިޒްރާއީލު ސިފައިން ޣައްޒާގެ ތިން ސަރަހައްދެއްގައި ތިން "ޤަތުލުއާންމެއް" މިއަދުވެސް ހިންގައިފައިވާ ކަމަށެވެ. އަދި އާދީއްތަ ދުވަހު ޣައްޒާގައި ދިން ހަމަލާތަކުގައި 50 މީހުން ޝަހީދުކޮށްލައި 84 މީހުން ޒަޚަމްކޮށްލައިފައިވާކަމަށެވެ.

ޣައްޒާގެ އުތުރުގައި އޮންނަ ޖަބަލިއްޔާ ރެފިއުޖީ ކޭމްޕަށް ހޯމަ ދުވަހުގެ ހެނދުނު އިސްރާއީލުގެ ޑްރޯން ހަމަލާއެއްދީފައިވާއިރު މިހަމަލާގައި ތިން މީހަކު ޝަހީދުވެފައިވެއެވެ. 

ޣައްޒާގެ މެދުތެރޭގައި އޮންނަ ދެއިރް އަލް ބަލްޙް އިން ރިޕޯޓް ކުރަމުން އަލްޖަޒީރާގެ ނޫސްވެރިޔާ ހާނީ މަޙްމޫދު ވިދާޅުވެފައިވަނީ ހަމަލާތަކުގެ އަމާޒަކަށްވި މީހުން ހަމަލާގެ އަމާޒަކަށްވީ ކާބޯތަކެތި ހޯދުމަށް ގެއިން ނުކުތްވަގުތު ކަމަށެވެ. 

 އިޒްރާއީލުގެ ސިފައިން ޖަބަލިއްޔާ ވަށާލެވިފައިވާތާ 65 ދުވަސް ވެފައިވާއިރު، ފަލަސްޠީނުގެ އެތައް ހާސް ބަޔަކަށް ކާބޯތަކެއްޗާއި ފެން ނުލިބުމުގެ ސަބަބުން ގިނަ ބަޔަކު ބަނޑުހައިހޫނުކަމުގެ ތެރެއަށް ވެއްޓިފައިވާ ކަމަށް އަލްޖަޒީރާގައި ބުނެފައިވެއެވެ. 

ހާނީ މަޙްމޫދު އިތުރަށް ބުނެފައިވަނީ ޖަބަލިއްޔާ މިހާރު ޤަބުރުސްތާނަކަށް ބަދަލުވެފައިވާ ކަމަށެވެ. އަދި ދެކުނު ބޯޑަރުން އިންސާނީ އެހީ ފޯރުކޮށްދޭ މިންވަރު މަދުވުމުގެ ސަބަބުން އުތުރު ޣައްޒާއާ އެއްފަދައިން ބަނޑުހައިހޫނުކަމުގެ މަންޒަރުތައް ދެކުނުގައި ވެސް ފެންނަމުންދާ ކަމަށެވެ.

އިޒްރާއިލްގެ ހަމަލާތަކުގައި ޝަހީދުވި ފަލަސްޠީނުގެ ރައްޔިތުންގެ ޢަދަދު މިހާރު ވަނީ 44،758 އަކަށް އަރައިފައެވެ.