މި އަހަރަކީ ތާރީޚުގައި އެންމެ ގިނައިން ޒަކާތް ދެއްކި އަހަރު: ޑރ. ޝަހީމް

މި އަހަރަކީ ދިވެހިރާއްޖޭގެ ތާރީޚުގައި އެންމެ ގިނައިން ޒަކާތް ދެއްކި އަހަރު ކަމަށް އިސްލާމީކަންތައްތަކާއި އައުޤާފާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

ވަޒީރު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ދިވެހިރާއްޖޭގެ ޒަކާތުގެ ނިޒާމަކީ ހަރުދަނާ އުޞޫލުތަކެއްގެ މައްޗަށް ބިނާކުރެވިފައިވާ ނިޒާމެއް ކަމަށާއި، އެއީ ޤާނޫނަކުން ރައްކާތެރިކަން ލިބިފައިވާ ނިޒާމެއް ވެސް ކަމަށެވެ.

ޒާކާތު ފައިސާ ބަލަހައްޓަމުންދަނީ މަރުކަޒީ ބޭންކުންކަން ފާހަގަކުރައްވާ ވަޒީރު ވިދާޅުވީ، ޒަކާތުން ލިބޭ ފައިސާ ހޭދަކުރަމުން ދަނީ އިސްލާމީ ޝަރީޢަތުގައިވާ ގޮތުގެ މަތިން، ޝަރީޢާ ގައިޑްލައިނެއް އާއްމުކޮށް އޭގައިވާ ގޮތުގެ މަތިން ކަމަށެވެ. މި ޚަރަދުތައް މަހުން މަހަށް ޢާއްމުކުރަމުންދާ ކަމާއި، ޒަކާތުގެ ކަންކަމާއި ގުޅޭ ގޮތުން، ޒަކާތު ކައުންސިލާއި ޝަރީޢާ ކޮމިޓީގެ ލަފާ ހޯދާކަން ވެސް ވަޒީރު ފާހަގަކުރެއްވިއެވެ. 

މީގެ އިތުރުން ވަޒީރު ވަނީ މި ދިޔަ 2 އަހަރަކީ ރާއްޖޭގެ ޒަކާތުގެ ނިޒާމަށް ވަރަށް ހެޔޮ ބަދަލުތަކެއް ގެނެވުނު 2 އަހަރު ކަމަށް ވިދާޅުވެފައެވެ. އެގޮތުން، ތާރީޚަށް ބަލާއިރު، އެންމެ ގިނައިން ޒަކާތް ލިބުނު 2 އަހަރަކީ އެއީކަން ވަޒީރު ފާހަގަކުރެއްވިއެވެ.

އަދި މި އަހަރަކީ ދިވެހިރާއްޖޭގެ މުޅި ތާރީޚުގައި އެންމެ ގިނައިން ޒަކާތް ދެއްކި އަހަރުކަމަށާއި، އެންމެ ގިނައިން ފަޤީރުންގެ ދަފުތަރުގައި ޖެހިފައިވާ ފަރާތްތަކަށް ހޭދަކުރެވުނީ ވެސް މި ދެ އަހަރުގައި ކަމަށް ވަޒީރު ވިދާޅުވިއެވެ. 

ފަޤީރުންނަށް މާލީ އެހީތެރިކަން ދިނުމުގެ އިތުރުން ފަޤީރުންގެ ތައުލީމާއި ޞިއްޙަތަށް ވެސް ހޭދަކުރެވުނު ކަމަށާއި، ޝަރީޢާ ހުއްދަކުރާ މަގުން ޒަކާތު ފަންޑު އިތުރުކުރަން ގިނަ މަސައްކަތްތަކެއް މި ދެ އަހަރުގެ ތެރޭގައި ފެށި، ޒަކާތަށް ވަކި އިދާރާއެއް ޤާއިމުކުރެވިގެން ދިޔަކަން ވެސް ޑރ. ޝަހީމް ފާހަގަކުރެއްވިއެވެ.

މީގެ އިތުރުން ވަޒީރު ވަނީ، ރައްޔިތުން ރާއްޖޭގެ ޒަކާތުގެ ނިޒާމަށް ދެއްވަމުން ގެންދަވާ އިތުބާރަށް ޝުކުރު ދަންނަވާފައެވެ. އަދި ޤާނޫނަކުން ޒަކާތުގެ ނިޒާމު ތަރައްޤީކޮށްދެއްވި ކަމަށްޓަކައި ރައީސުލްޖުމްހޫރިއްޔާ ޑރ މުޙައްމަދު މުޢިއްޒަށް ވެސް ޝުކުރު ދަންނަވާފައެވެ.

ދިވެހިރާއްޖޭގެ ޒަކާތުގެ ނިޒާމަކީ ހަރުދަނާ އުޞޫލުތަކެއްގެ މައްޗަށް އާރާސްތުކުރެވިފައިވާ ނިޒާމެއް. ޤާނޫނަކުން ރައްކާތެރިކަން ލިބިފައިވާ ނިޒާމެއް. ޒާކާތު ފައިސާ ބަލަހައްޓަމުންދަނީ މަރުކަޒީ ބޭންކުން. ޒަކާތުން ލިބޭ ފައިސާ ހޭދަކުރަމުން ދަނީ އިސްލާމީ ޝަރީޢަތުގައިވާ ގޮތުގެ މަތިން ޝަރީޢާ… https://t.co/jKhkjBbjqs

— Mohamed Shaheem Ali Saeed (@Mohamedshaheem1) October 3, 2026

ޒަކާތު ހައުސްގެ ހިސާބުތައް ދައްކާ ގޮތުން މި އަހަރުގެ ޖެނުއަރީން ފެށިގެން މިދިޔަ މަހުގެ ނިޔަލަށް މުދަލު ޒަކާތުގެ ގޮތުގައި ވަނީ 109 މިލިއަނަށްވުރެ ގިނަ ރުފިޔާ ލިބިފައެވެ. އެއީ މިދިޔަ އަހަރު ލިބުނު އަދަދަށްވުރެ 2.64  އިންސައްތައިގެ އިތުރުވުމެކެވެ.