ދިވެހީންގެ އުފެއްދުންތެރިކަމުގެ މައުރަޒު 2026 އިފްތިތާޙުކުރުމުގެ ހަރަކާތްތަކެއް މިއަދު ހުޅުމާލޭގައި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރާއްޖޭގެ އިޤްތިޞާދު ސިންދަފާދުކޮށް، ދިވެހި އުފެއްދުންތެރިންނާއި ވިޔަފާރިތައް ކުރިއެރުވުމަށް ގެންގުޅުއްވާ ޚާއްޞަ ސިޔާސަތުގެ ދަށުން ބާއްވާ "ދިވެހީންގެ އުފެއްދުންތެރިކަމުގެ މައުރަޒު 2026" (މޯލްޑިވްސް އެކްސްޕޯ 2026) އާ ގުޅޭ ޚާއްޞަ ހަރަކާތްތަކެއް މިއަދު ހުޅުމާލޭގައި ކުރިއަށްދާނެ ކަމަށް ބިޒްނަސް ސެންޓަރ ކޯޕަރޭޝަން (ބީސީސީ) އިން ވިދާޅުވެއްޖެއެވެ.

މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑުން އިންތިޒާމުކޮށް، ބީސީސީން އިމްޕްލިމެންޓްކުރާ މި މައުރަޒުގެ ހަރަކާތްތައް ފެށުމުގެ ގޮތުން މިއަދު ހަވީރު ހުޅުމާލެ ފޭސް 1 ގެ ބީޗް ސަރަޙައްދުގައި ކުޑަކުދިންނަށް ޚާއްޞަ ތަފާތު ކުޅިވަރުތަކާއި މުނިފޫހިފިލުވުމުގެ ހަރަކާތްތައް ކުރިއަށްދާނެއެވެ. އަދި އެކި ބާވަތްތަކުގެ ކާބޯތަކެތި ދައްކާލުމާއި، އޭގެ ރަހަބަލާލުމުގެ ފުރުޞަތުވެސް އާންމުންނަށް ލިބިގެންދާނެ ކަމަށް ބީސީސީން މަޢުލޫމާތުދެއެވެ.

މީގެއިތުރުން، މިރޭ 9:00 އިން 10:00 އަށް ބޭއްވުމަށް ހަމަޖެހިފައިވާ ޚާއްޞަ ރަސްމިއްޔާތުގައި، މިހާތަނަށް މައުރަޒަށް ކަށަވަރުވެފައިވާ ސްޕޮންސަރުންނާއި ޕާޓްނަރުން ތަޢާރަފުކުރުމާއި، މައުރަޒުގެ ތެރެއިން ކުރިއަށްގެންދިއުމަށް ރޭވިފައިވާ މުބާރާތްތަކާ ބެހޭ ތަފްޞީލު މަޢުލޫމާތުތައް ޢާންމުކުރުން އޮންނާނެއެވެ. މި ހަފްލާގައި އިކޮނޮމިކް މިނިސްޓަރު މުޙައްމަދު ސަޢީދާއި، ބީސީސީގެ އިސްވެރިންގެ އިތުރުން ސަރުކާރު ހިއްސާވާ ކުންފުނިތަކާއި އަމިއްލަ ވިޔަފާރިތަކުގެ އިސްވެރިން ބައިވެރިވެވަޑައިގަންނަވާނެއެވެ.

"ފިއުޗަރ މޯލްޑިވްސް – އިނޮވޭޝަން، ކްރިއޭޓިވިޓީ އެންޑް ގްލޯބަލް ކަނެކްޝަންސް" މި ޝިޢާރުގެ ދަށުން ބާއްވާ މި މައުރަޒު ބޭއްވުމަށް ތާވަލުކޮށްފައިވަނީ 2026 ވަނަ އަހަރުގެ އޮކްޓޫބަރު 25 އިން ނޮވެމްބަރު 02 ގެ ނިޔަލަށް ހުޅުމާލެ ސެންޓްރަލް ޕާކުގައެވެ.

މި މައުރަޒު މައިގަނޑު 6 ދާއިރާއަކަށް ބަހާލެވިފައިވާއިރު، އޭގެ ތެރޭގައި ހިމެނެނީ:

• ކްރިއޭޓިވް އިކޮނޮމީ
• ޑިޖިޓަލް އެންޑް އިނޮވޭޝަން
• އެންޓަޓެއިންމަންޓް
• މާކެޓްޕްލޭސް
• ވިޒިޓަރ އިކޮނޮމީ
• އިންޓަރނޭޝަނަލް އެގްޒިބިޓާސް (ބައިނަލްއަޤްވާމީ ފަރާތްތަކަށް ޚާއްޞަ)

މީގެއިތުރުން، ސަރުކާރުގެ އިސްނެންގެވުމުގެ ދަށުން މިފަހަރުގެ މައުރަޒުގައި ދީނީ ހޭލުންތެރިކަން އިތުރުކުރުމުގެ ކޮންޓެންޓް އުފައްދާ ފަރާތްތަކަށް ޚާއްޞަ އައު ކެޓަގަރީއަކާއި، ލާމަރުކަޒީ ނިޒާމުގެ ތެރެއިން ރަށްރަށުގެ އުފެއްދުންތެރިކަން ދައްކާލުމަށް ރަށު ކައުންސިލްތަކަށް ވާދަކުރެވޭ ބައިތައްވެސް ވަނީ ހިމަނާފައެވެ.

މައުރަޒަށް ތަކެތި ބަލައިގަތުމާއި އިންސާފުކުރުމުގެ މަރުޙަލާތައް މިހާރު ފެށިގެން ކުރިއަށްދާއިރު، މިއީ ރާއްޖޭގެ އެކި ކަންކޮޅުތަކުގައި ތިބި އުފެއްދުންތެރިންނާއި ކުދި އަދި މެދުފަންތީގެ ވިޔަފާރިތަކަށް ބޮޑެތި ފުރުޞަތުތަކެއް ފަހިކޮށްދިނުމަށް ސަރުކާރުން ކުރިއަށްގެންދާ ވަރަށް މުހިންމު ޤައުމީ މަސައްކަތެކެވެ.

މިއަދު މި ފެށިގެން ކުރިއަށްދާ އިވެންޓް ކުރިއަށްދާނީ މިއަދު ހަވީރު 4 އިން ފެށިގެން މިރޭގެ 11 އާއި ހަމައަށް ކަން ބީސީސީއިން މައުލޫމާތު ދެއްވައެވެ.