އަންނަ އަހަރުގެ ބޮޑު ބަންދު ޑިސެންބަރު 10 ގައި: މުޅި އަހަރު 3 މަސް ދުވަހުގެ ބަންދެއް

އަންނަ އަހަރުގެ ބޮޑު ބަންދު ޑިސެންބަރު 10 ގައި ފެށި، މުޅި އަހަރު 3 މަސް ދުވަހުގެ ބަންދެއް ލިބޭ ގޮތަށް، ތަޢުލީމާއި މަތީ ތަޢުލީމާއި ހުނަރުތައް ތަރައްޤީކުރުމާ ބެހޭ ވުޒާރާއިން އަންނަ އަހަރުގެ އެކަޑެމިކް ކަލަންޑަރު އާއްމުކޮށްފިއެވެ.

އެ ވުޒާރާއިން އާއްމުކުރި ކަލަންޑަރުގައިވާ ގޮތުން، އަންނަ އަހަރުގެ ތައުލީމީ އައު އަހަރު ފެށި ސުކޫލުތަކުގެ ކިޔެވުން ފެށޭނީ 17 ޖެނުވަރީގައެވެ. 

އެންމެ ފުރަތަމަ ބަނދެއްގެ ގޮތުން ލިބެނީ 26 ފެބުރުވަރީއިން 11 މާރިޗުގެ ނިޔަލަށް ހިމެނޭ މުއްދަތެވެ. މިއީ ރޯދަ މަހުގެ ފަހު 10 އާއި ޢީދާއި ގުޅިގެން ލިބިގެންދާ ބަންދެކެވެ. އެއަށް ފަހު، މިޑްޓާމް ބްރޭކް މެއި މަހުގެ 16 އިން 20 އަށް ލިބިގެންދާނެއެވެ. 

ފުރަތަމަ ޓާމްގެ ކިޔެވުން ނިމި ބަންދުވާ ގޮތަށް ތައުލީމާއި ބެހޭ ވުޒާރާއިން އާއްމުކޮށްފައިވާ ކަލަންޑަރުގައި ކަނޑައަޅާފައި ވަނީ ޖުލައި 16 އިން 31 އަށެވެ.

ދެވަނަ ޓާމުގެ ކިޔެވުން އޮގަސްޓު 1 ގައި ފެށިގެންދާއިރު، މި ޓާމުގެ މިޑް ޓާމު ބްރޭކް ލިބިގެންދާނީ 19 ސެޕްޓެމްބަރުން ފެށިގެން 25 ސެޕްޓެމްބަރުގެ ނިޔަލަށެވެ. 

ތައުލީމީ އަހަރު 9 ޑިސެމްބަރުގައި ނިމިގެންދާއިރު، 10 ޑިސެމްބަރުން 8 ޖެނުވަރީއަށް ބޮޑު ބަންދު ލިބިގެންދާނެއެވެ.

ދިވެހިރާއްޖޭގެ ތައުލީމީ އައު އަހަރު ފެށޭ ދުވަސްވަރު ޖެނުއަރީ މަހަށް ބަދަލުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވީ ކެބިނެޓުގެ ލަފާފުޅާއެކު ޖެނުއަރީ 2024 ގައެވެ. މިއީ ރިޔާސީ އިންތިހާބުގައި އެމަނިކުފާނު ވެވަޑައިގެންނެވި ވައުދުފުޅެކެވެ.