ރަސްމީ ދަތުރުފުޅެއްގައި މަޖިލީހުގެ ރައީސް ޓެންޒޭނިއާއަށް ފުރާވަޑައިގަންނަވައިފި

ރައްޔިތުންގެ މަޖިލީހުގެ ރައީސް، އޮނަރަބަލް ޢަބްދުއްރަޙީމް ޢަބްދުالله ރަސްމީ ދަތުރުފުޅެއްގައި ޓެންޒޭނިއާގެ އަރޫޝާއަށް ފުރާވަޑައިގަންނަވައިފިއެވެ.

ރައްޔިތުންގެ މަޖިލީހުން ހާމަކުރެއްވި ގޮތުގައި، މަޖިލީހުގެ ރައީސް ޓެންޒޭނިއާއަށް ފުރާވަޑައިގެންނެވީ، މިމަހުގެ 5 އިން 9 އަށް ކުރިއަށްދާ އިންޓަރ-ޕާލިމެންޓަރީ ޔުނިއަންގެ 153 ވަނަ އެސެމްބްލީގައި ބައިވެރިވެވަޑައިގަތުމަށެވެ.

މި އެސެމްބްލީގައި، މަޖިލީހުގެ ރައީސް "އެންމެންގެ ޝާމިލުވުމާއި، އިތުބާރާއި، އަދި ފުރުޞަތުތައް ފަހިކޮށްދީގެން ހެޔޮވެރިކަން ކުރިއެރުވުމާއި މުޖުތަމަޢުތައް ބާރުވެރިކުރުވުން" މި މަޢުޟޫއަށް ވާހަކަފުޅުދެއްކެވުމަށް ހަމަޖެހިފައިވާ ކަމަށް ރައްޔިތުންގެ މަޖިލީހުން ވިދާޅުވިއެވެ.

މި ދަތުރުފުޅުގައި ރައްޔިތުންގެ މަޖިލީހުގެ ރައީސްގެ އަރިހުގައި ހުޅުދޫ ދާއިރާގެ މެންބަރު މުޙައްމަދު ޝާހިދު، ބާރަށު ދާއިރާގެ މެންބަރު އިބްރާހީމް ޝުޖާޢު، މާފަންނު މެދު ދާއިރާގެ މެންބަރު  އަސްމާ ރަޝީދު، ހުރާ ދާއިރާގެ މެންބަރު ޑޮކްޓަރ އަނާރާ ނަޢީމް، ނިލަންދޫ ދާއިރާގެ މެންބަރު ފާޠިމަތު ސަޢުދާ، ގައްދޫ ދާއިރާގެ މެންބަރު މުޙައްމަދު ޢަލީ، ތޮއްޑޫ ދާއިރާގެ މެންބަރު ޙުސައިން ސަމީރު، ކައުންސެލް ޖެނެރަލް އަލްއުސްތާޛާ ފާތިމަތު ފިލްޒާ، މަޖިލީހުގެ އިދާރާގެ ޗީފް އޮފް ބިއުރޯ، އަޙްމަދު ނިހާން ޙުސައިން މަނިކު އަދި ފޮރިން ރިލޭޝަންސް ޑިޕާޓްމަންޓުގެ އެސިސްޓެންޓް ޑިރެކްޓަރ ޖެނެރަލް ޒުއްޔިނާ ބަދުރީ ބައިވެރިވެވަޑައިގަންނަވައެވެ.

އިންޓަރ-ޕާލިމެންޓަރީ ޔުނިއަން އަކީ ދުނިޔޭގެ އެކި ޤައުމުތަކުގެ ޤާނޫނުހަދާ މަޖިލިސްތައް އެކުލެވޭ، ދުނިޔޭގެ ފެންވަރުގައި ހަރަކާތްތެރިވާ ބައިނަލްއަޤްވާމީ ޖަމްޢިއްޔާއެކެވެ. 1889 ވަނަ އަހަރު އުފެދުނު މި ޖަމްޢިއްޔާގެ މައިގަނޑު މަޤްޞަދަކީ ޤައުމުތަކުގެ ޕާލިމެންޓްތަކުގެ މެދުގައި ގުޅުން ބަދަހިކުރުމާއި، ސުލްޙަމަސަލަސްކަން ޤާއިމުކުރުމާއި، ޑިމޮކްރަސީގެ އުޞޫލުތައް ކުރިއެރުވުމުގެ އިތުރުން އިންސާނީ ޙައްޤުތައް ޙިމާޔަތްކުރުމެވެ.