މިއަހަރުގެ އުފެއްދުންތެރިކަމުގެ މައުރަޒުގައި ހާއްސަ ކުޅިވަރު މުބާރާތްތަކެއް ކުރިއަށްދާނެ

ދިވެހިންނަކީ ހަމައެކަނި ސަޤާފީ ހުނަރުތަކާއި އުފެއްދުންތެރިކަމުގެ އިތުރުން ކުޅިވަރުގެ ދާއިރާއިންވެސް ވަރަށް ގިނަ ހުނަރުތައް ހުރި ބަޔެކެވެ. މި ހުރިހާ ކަމެއް ޝާމިލްވާގޮތަށް ދިވެހީންގެ އުފެއްދުންތެރިކަމުގެ މައުރަޒުގެ ތެރެއިން ގެނެސްދިނުމަށްޓަކައި ކުޅިވަރު ތަފާތު އެސޯސިއޭޝަންތަކާއި ގުޅިގެން ގިނަ މުބާރާތްތަކެއް ރާވާފައިވާކަމަށް ބީސީސީން ވަނީ ވިދާޅުވެފައެވެ.

އެގޮތުން މިއަހަރުގެ މަޢުރަޒުގައި ބީސީސީއާއެކު ކުޅިވަރުގެ 5 އެސޯސިއޭޝަނެއް ބައިވެރިވުމަށް ވަނީ ހަމަޖެހިފައެވެ.

މައުރަޒުގައި ކުރިއަށްގެންދާ ކުޅިވަރު މުބާރާތްތަކުގައި ބައިވެރިވާ އެސޯސިއޭޝަންތައް:

• ނެޓްބޯލް އެސޯސިއޭޝަން އޮފް މޯލްޑިވްސް
• ކެރަމް އެސޯސިއޭޝަން އޮފް މޯލްޑިވްސް
• ބާސްކެޓްބޯލް އެސޯސިއޭޝަން އޮފް މޯލްޑިވްސް
• ބެޑްމިންޓަން އެސޯސިއޭޝަން އޮފް މޯލްޑިވްސް
• ބަށިބޯޅަ އެސޯސިއޭޝަން އޮފް މޯލްޑިވްސް

މި ހަރަކާތްތަކުގައި ބައިވެރިވުމުގެ ފުރުސަތު ހުރިހާ ފަރާތްތަކަށްވެސް ވަރަށް އަވަހަށް ހުޅުވާލާނެ ކަމަށް ބީސީސީއިން ވިދާޅުވެއެވެ. ބީސީސީއިން ވިދާޅުވީ، އުންމީދަކީ ބޮޑުބެރު މުބާރާތާއި ސަޤާފީ ވާދަޔަށް ލިބުނު ތަރުހީބަށްވުރެ ބޮޑު ތަރުހީބެއް މި މުބާރާތްތަކަށްވެސް ލިބިގެންދިޔުން ކަމަށެވެ. 

އެންމެންގެ ބައިވެރިވުމާއެކު ދިވެހި އުފެއްދުންތެރިކަމުގެ މައުރަޒު ބީސީސީން އުންމީދުކުރާ ބްރޭންޑް ލެވެލްގައި ގެނެވޭނެކަމަށް ޤަބޫލުކުރާކަމަށް ބީސީސީން ވިދާޅުވެއެވެ. ބީސީސީން ވިދާޅުވީ، އެންމެންގެ އެއްބާރުލުން ލިބޭނެ ކަމަށް އުންމީދުކުރާ ކަމަށެވެ.

"ދިވެހީންގެ އުފެއްދުންތެރިކަމުގެ މަޢުރަޒު 2026" ބޭއްވުމަށް ހަމަޖެހިފައިވަނީ، މިމަހުގެ 25 އިން ނޮވެމްބަރު މަހުގެ 2 ވަނަ ދުވަހުގެ ނިޔަލަށް ހުޅުމާލެ ސެންޓްރަލް ޕާކުގައެވެ. މި މައުރަޒުގައި 16 ދާއިރާއަކުން 73 ގިންތިއެއްގެ އުފެއްދުންތަކާއި، ޚިދުމަތްތައް ދައްކާލުމަށް ހަމަޖެހިފައިވެއެވެ. މި މައުރަޒުގެ ވާދަކުރުމުގެ ބައިގައި 6،000 އަށްވުރެ ގިނަ ދިވެހި އުފެއްދުން މިހާތަނަށް ރަޖިސްޓަރީ ކޮށްފައިވާއިރު، 1000 އަށްވުރެ ގިނަ އުފެއްދުންތެރިންގެ އުފެއްދުންތައް މައުރަޒުގައި ފެނިގެންދާނެއެވެ.

މިދިޔަ އަހަރު ބޭއްވި ދިވެހީންގެ އުފެއްދުންތެރިކަމުގެ މައުރަޒަށްވެސް އާންމުންގެ ފުރިހަމަ އެއްބާރުލުން ވަނީ ލިބިގެން ގޮސްފައެވެ. އެގޮތުން މިދިޔަ އަހަރުވެސް 600 އަށްވުރެ ގިނަ އެގްޒިބިޓަރސް ވަނީ ބައިވެރިވެފައެވެ.