ބައިނަލްއަގްވާމީ ޖޫނިއަރ ޓެނިސް މުބާރާތެއް ރާއްޖޭގައި ފަށައިފި

އޭޝިއަން ޓެނިސް ފެޑެރޭޝަން (އޭޓީއެފް)ގެ ޖޫނިއަރ މުބާރާތެއް ހޯމަ ދުވަހު ރާއްޖޭގައި ފަށައިފިއެވެ. މި މަހުގެ 9-14 އަށް މާލޭ ޓެނިސް ކޯޓުގައި ކުރިޔަށް ގެންދިއުމަށް ހަމަޖެހިފައިވާ، އޭޓީއެފް މޯލްޑިވްސް ޖޫނިއަރ އޯޕަން 2024 ގައި ވާދަކުރާނީ 16 އަހަރުން ދަށުގެ ކުޅުންތެރިންނެވެ.

މި މުބާރާތަކީ ރާއްޖޭގައި މިހާތަނަށް ބޭއްވޭ އެންމެ ބޮޑު ބައިނަލްއަގްވާމީ ޓެނިސް މުބާރާތަށްވާއިރު، މިއީ ވަރަށް ގިނަ ދުވަހުގެ މަސައްކަތުން ހާސިލް ކުރެވުނުކަމެއް ކަމަށް ޓެނިސް އެސޯސިއޭޝަން އޮފް މޯލްޑިވްސްއިން ވަނީ ހާމަކޮށްފައެވެ. އަދި މީގެ ކުރިން ރާއްޖޭގައި ބައިނަލްއަގްވާމީ ބޮޑު މުބާރާތެއް ބޭއްވިފައި ނުވަނީ، އިންޓަނޭޝަނަލް މުބާރާތްތައް ކުޅެވޭނެ ފެންވަރުގެ ކޯޓެއް ނެތުމުން ކަމަށް ވެސް އެ އެސޯސިއޭޝަނުން ވަނީ ހާމަކޮށްފައެވެ.

އޭޓީއެފް މޯލްޑިވްސް ޖޫނިއަރ އޯޕަން 2024 ފެށުމުގެ ގޮތުން މިއަދު ހަވީރު ވަނީ ހާއްސަ ރަސްމިއްޔާތެއް ވެސް ބާއްވާފައެވެ. މި ރަސްމިޔާތު ޝަރަފުވެރިކޮށްދެއްވީ މޯލްޑިވްސް އޮލިމްޕިކް ކޮމެޓީގެ ރައީސް، މުހައްމަދު އަބްދުއް ސައްތާރެވެ.

މި މުބާރާތުގައި ރާއްޖޭގެ އިތުރުން ކަޒަކިސްތާން، ޗައިނާ، އިންޑިއާ، އިންގްލެންޑް އަދި ބްރެޒިލްގެ ކުޅުންތެރިން ފެނިގެން ދާނެއެވެ. 

މި މުބާރާތުގައި ރާއްޖޭގެ 17 ކުޅުންތެރިއަކު ވާދަކުރާނެއެވެ. އެ ކުޅުންތެރިންނަކީ:

1. ލޫތު އަގްލީމް އަހުމަދު 
2. އާރާ އާސާލް އާޒިމް
3. އައިޝާ ޔަމިން
4. ކައިސާން އިއްޒަތު ރަޝީދު 
5. އައިޝަތު ލިވިއާ
6. ޒަފްޔާން މުހައްމަދު ސަލާމް
7. މަލްޝާ މުހައްމަދު
8. މަންހާ މުހައްމަދު އަލީ
9. މުހައްމަދު ނޫހް ނާޒިހް
10. އާދަމް އާލް ނިޔާޒް
11. ސާރާ ސާމީ މުހައްމަދު
12. ދާއޫދް ޝަހީބް
13. ނީމް އަހުމަދު ސަލީމް
14. ކިޔާރާ އުސާމާ އަލީ
15. ނަޔާރާ އުސާމާ އަލީ
16. ލާރާ އަހުމަދު ޔަޒީލް 
17. ޒަހްރާ ލިލީ ޝިހާމް 

ރާއްޖޭގެ ޓެނިސް ކުޅުންތެރިން ފަހަކަށް އައިސް ބައިނަލް އަގުވާމީ މުބާރާތްތަކުގައި ފާހަގަކޮށްލެވޭ ނަތީޖާތައް ހޯދަމުން އަންނަ އިރު، އޭޓީއެފް މޯލްޑިވްސް ޖޫނިއަރ އޯޕަން 2024 ބައިނަލްއަގުވާމީ ބޮޑެތި ޓެނިސް މުބާރާތްތައް ރާއްޖެއަށް ގެންނަން ފުރުސަތުތައް ތަނަވަސްކޮށްދޭނެ މުބާރާތެކެވެ.