މ. މުލަކު ގޮނޑުދޮށް ހިމާޔަތްކުރުމުގެ ދެވަނަ ފިޔަވަހީގެ މަސައްކަތް ބާރަށް ކުރިއަށް

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ކުރިއަށްގެންދާ މ. މުލަކު ގޮނޑުދޮށް ހިމާޔަތްކުރުމުގެ މަޝްރޫޢުގެ ދެވަނަ ފިޔަވަހީގެ މަސައްކަތްތައް ބާރަށް ކުރިއަށްދާ ކަމަށް އެ ކުންފުނިން ހާމަކޮށްފިއެވެ.

މި މަޝްރޫޢުގެ ތެރެއިން މިހާރު ކުރިއަށްދަނީ ރިވެޓްމަންޓް ޕްރޮފައިލިންގގެ މަސައްކަތްތަކެވެ.

މި މަޝްރޫޢުގެ އެންމެ ފަހުގެ މަޢުލޫމާތު ހިއްސާކުރަމުން އެމްޓީސީސީން ބުނީ، ދެވަނަ ފިޔަވަހީގެ ދަށުން ޤާއިމުކުރުމަށް ހަމަޖެހިފައިވާ 4 "ވައި" ގްރޮއިން ހެދުމުގެ މަސައްކަތް މިހާރު މުޅިން ނިންމާލެވިފައިވާ ކަމަށެވެ. އަދި މިހާރު ކުރިއަށްދާ ރިވެޓްމަންޓް ޕްރޮފައިލިންގ މަސައްކަތްތަކާއެކު، އައްސޭރިފަށުގެ އެހެނިހެން ސްޓްރަކްޗަރަލް ޕްރޮފައިލިންގ މަސައްކަތްތައްވެސް އެއްފަސްކޮށް ކުރިއަށްދާ ކަމަށް އެ ކުންފުނިން މަޢުލޫމާތުދެއެވެ.

މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން އެމްޓީސީސީއާ ހަވާލުކޮށްފައިވާ މި މަޝްރޫޢަކީ ޖުމްލަ 38.96 މިލިއަން ރުފިޔާގެ މަޝްރޫޢެކެވެ. 440 ދުވަހުގެ ތެރޭގައި ނިންމުމަށް ކަނޑައެޅިފައިވާ މި ފިޔަވަހީގެ ދަށުން 539 މީޓަރުގެ ބޭރުތޮށި ލުމާއި، 343 މީޓަރުގެ ރިވެޓްމަންޓް ޖެހުމާއި، 4 ގްރޮއިން ޤާއިމުކުރުމުގެ އިތުރުން 14,548.25 ކިއުބިކް މީޓަރުގެ ވެލި ގޮނޑުދޮށަށް އެޅުން ހިމެނެއެވެ.

މުލަކުގެ ގިރާ ސަރަޙައްދު ހިމާޔަތްކުރުމަށް ފެށުނު މި މަޝްރޫޢުގެ ފުރަތަމަ ފިޔަވަހި ވަނީ 2021 ވަނަ އަހަރުގެ ޑިސެމްބަރު 23 ގައި ކާމިޔާބުކަމާއެކު ނިންމާލާފައެވެ. 17.66 މިލިއަން ރުފިޔާގެ އެ ފިޔަވަހީގެ ދަށުން އެ ރަށުގައި ވަނީ 411.90 މީޓަރުގެ ޖިއޯބޭގް ރިވެޓްމަންޓެއް ޤާއިމުކޮށްފައެވެ.

Project Update: Construction of Shore Protection Structures at M. Mulah -Phase 2 Revetment profiling works are currently ongoing at the project site. Follow more updates at: https://t.co/RjAFCf3rnI #MTCCProjects #TeamMTCC #RayyithungeKunfuni #GaumuBinaakurumugaaMTCC https://t.co/ZNtQzuzOKT

— MTCC Plc (@MTCCPlc) October 4, 2026

މުލަކުގެ އައްސޭރިފަށް ގިރުމުގެ މައްސަލައަށް ދާއިމީ ހައްލެއް ހޯދުމަށް ސަރުކާރުން ކުރިއަށްގެންދާ މި މަޝްރޫޢުގެ ދެވަނަ ފިޔަވަހި ނިމުމުން، ރަށުގެ ގޮނޑުދޮށަށް ދިގުމުއްދަތުގެ ރައްކާތެރިކަމެއް ލިބިގެންދާނެއެވެ.