އެފްއޭއެމް އެވޯޑްސް: މުޅިން އަލަށް އެންމެ މޮޅު ފުޓްސަލް ކުޅުންތެރިޔާ ހޮވާނެ

ބުރާސްފަތި ދުވަހުގެރޭ ބޭއްވުމަށް ހަމަޖެހިފައިވާ "އެފްއޭއެމް އެވޯޑްސް 2026" ގައި މުޅިން އަލަށް އެންމެ މޮޅު ފުޓްސަލް ކުޅުންތެރިޔާ ހޮވުމަށް ނިންމައިފިއެވެ. ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ހާމަކުރި ގޮތުގައި މިއީ ގައުމީ ފެންވަރުގައި އެންމެ މޮޅު ފުޓްސަލް ކުޅުންތެރިޔާ ހޮވާ ފުރަތަމަ ފަހަރެވެ.

ދިވެހިރާއްޖޭގައި މިވަގުތު އެންމެ މަގުބޫލު ކުޅިވަރަކީ ފުޓްސަލް ކަމަށްވާއިރު، ރާއްޖޭގެ ފުޓްސަލް އިތުރަށް ކުރިއެރުވުމަށްޓަކައި އެފްއޭއެމްއިން ވަނީ ހާއްސަ މަސައްކަތްތަކެއް ފަށާފައެވެ. އެގޮތުން މުޅި ރާއްޖެއަށް ހުޅުވާލައިގެން ކުރިއަށްގެންދިޔަ "އެފްއޭއެމް ފުޓްސަލް އެޓޯލް ޗެމްޕިއަންޝިޕް 2026" ނިމިފައިވާއިރު، މިހާރު ކުރިއަށްދަނީ ޒޯން ބުރުގެ ފޯރިގަދަ މެޗުތަކެވެ. އަދި ޒޯން ބުރަށްފަހު އޮންނަ ރީޖަނަލް ބުރުގެ މެޗުތަކުން މޮޅުވާ ޓީމުތައް ކޮލިފައިވާނީ ގައުމީ ފުޓްސަލް ލީގަށެވެ.

އެފްއޭއެމްއިން ކުރިން ބުނެފައިވާ ގޮތުގައި ފުޓްސަލްގެ ގައުމީ އެވޯޑަށް ކުޅުންތެރިން ނޮމިނޭޓު ކުރުމާއި ހޮވުމުގައި މި މުބާރާތްތަކަކީ ވަރަށް މުހިންމު ދައުރެއް އަދާކުރާނެ މުބާރާތްތަކެކެވެ. މީގެއިތުރުން މި މުބާރާތްތަކަކީ ގައުމީ ފުޓްބޯޅަ މުބާރާތްތަކުގެ ތެރޭގައި ހިމެނޭ މުބާރާތްތަކަށް ހެދުމާއެކު، ވަކި ހާއްސަ އޮނިގަނޑެއްގެ ތެރެއިން އެހެން ކުޅިވަރުތަކުގެ ގައުމީ ޓީމުތަކުގެ ކުޅުންތެރިންނެކޭ އެއްފަދައިން ފުޓްސަލް ގައުމީ ޓީމުގެ ކުޅުންތެރިންނަށްވެސް އެލަވަންސް ހަމަޖެހިގެންދާނެއެވެ.

މި ފަހަރުގެ އެފްއޭއެމް އެވޯޑްސް 2026 ގައި ފާހަގަކޮށްލެވޭ ގިނަ އެވޯޑުތަކެއް ދިނުމަށް ވަނީ ހަމަޖެހިފައެވެ. އޭގެ ތެރޭގައި ހިމެނެނީ:

• އެންމެ މޮޅު ފުޓްބޯޅަ ކުޅުންތެރިޔާ (ފިރިހެން)
• އެންމެ މޮޅު ފުޓްބޯޅަ ކުޅުންތެރިޔާ (އަންހެން)
• އެންމެ މޮޅު ފުޓްސަލް ކުޅުންތެރިޔާ
• އެންމެ މޮޅު ބިދޭސީ ކުޅުންތެރިޔާ
• އެންމެ އުންމީދީ ކުޅުންތެރިޔާ
• އެންމެ މޮޅު ގޯލްކީޕަރު
• މިދިޔަ ސީޒަންގައި އެންމެ ގިނަ ލަނޑު ޖެހި ކުޅުންތެރިޔާ
• އެންމެ މޮޅު ކޯޗު
• އެންމެ މޮޅު ރެފްރީ
• އެންމެ މޮޅު ކްލަބް
• އެންމެ މޮޅު ރީޖަނަލް ކްލަބް
• ސަޕޯޓަރުންގެ މެދުގައި އެންމެ މަގުބޫލު ކުޅުންތެރިޔާ

ބުރާސްފަތި ދުވަހުގެރޭ ބާއްވާ މި ހަފްލާއަކީ ރާއްޖޭގެ ކުޅިވަރު ތާރީހުގައި، ހާއްސަކޮށް ފުޓްސަލް ކުޅުންތެރިންގެ އަގު ވަޒަންކުރުމުގެ ގޮތުން އެޅިގެންދާނެ ވަރަށް މުހިންމު ފިޔަވަޅެކެވެ.