ދިއްފުށީ ފުޓްބޯޅަ ދަނޑުގެ ނުނިމި ހުރި މަސައްކަތްތައް ފަށައިފި

ކ. ދިއްފުށީ ފުޓްބޯޅަ ދަނޑުގެ ނުނިމި ހުރި މަސައްކަތްތަކުގެ ތެރެއިން، ދަނޑުގެ ވަށާފާރުގައި ފެންސް ޖެހުމަށް ބޭނުންވާ ގެލްވަނައިޒްޑް އަޔަން (ޖީއައި) ހޮޅި ހަރުކުރުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ފަށައިގެން ކުރިއަށް އެބަގެންދެއެވެ.

އެމްޓީސީސީން ހާމަކޮށްފައިވާ ގޮތުގައި މި މަޝްރޫޢުގެ ދަށުން މިހާރު ކުރިއަށްދަނީ ވަށާފާރުގައި ފެންސް އެޅުވުމަށްޓަކައި ޖީއައި ހޮޅިތައް ހަރުކުރުމުގެ މަރުޙަލާއެވެ. މީގެކުރިން މި މަސައްކަތުގެ ތެރެއިން ކޮންކްރީޓް ބީމް އެޅުމުގެ މަސައްކަތް ވަނީ 90 އިންސައްތަ ނިމިފައެވެ. އަދި އޭގެ އިތުރުން ފާރުތައް ތަޅާބުރި ޖެހުމާއި ސިމެންތި ޖެހުމުގެ މަސައްކަތްތައް ވެސް ވަނީ ކާމިޔާބުކަމާއެކު ކުރިއަށް ގެންގޮސްފައެވެ.

Project Update: K. Dhiffushi Football Ground remaining works GI pipe installation is currently ongoing to build wall fence. Follow more updates at: https://t.co/RjAFCf3rnI #MTCCProjects #TeamMTCC #RayyithungeKunfuni #GaumuBinaakurumugaaMTCC https://t.co/VrIt2yZGco

— MTCC Plc (@MTCCPlc) October 4, 2026

މި މަޝްރޫޢުގެ ފުރަތަމަ މަރުޙަލާގައި ސައިޓް ސާފުކުރުމުގެ މަސައްކަތް ކޮށްފައިވާއިރު، ފާރުގައި ސިމެންތި ޖެހުމާއި ރޭނުމުގެ މަސައްކަތްތަކާއެކު މުޅި މަޝްރޫޢުގެ ބޮޑުބައެއް ވަނީ ފުރިހަމަވެފައެވެ.

ދިއްފުށީ ފުޓްބޯޅަ ދަނޑަކީ 2018 ވަނަ އަހަރުން ފެށިގެން އެ ރަށުގެ ރައްޔިތުން ބޭނުންކުރަމުން އަންނަ ދަނޑެއް ނަމަވެސް، ދަނޑުގެ ބައެއް ޒަރޫރީ ވަސީލަތްތައް ފުރިހަމަނުވެ ހުރުމުގެ ސަބަބުން ގިނަ ގޮންޖެހުންތަކަކާ ވަނީ ކުރިމަތިލާން ޖެހިފައެވެ. އެމްޓީސީސީން ކުރިއަށްގެންދާ މި މަޝްރޫޢުގެ ސަބަބުން މި ދަތިތަކަށް ދާއިމީ ޙައްލެއް ލިބިގެންދާނެއެވެ.

ފުޓްބޯޅަ ދަނޑުގެ މަސައްކަތުގެ އިތުރުން، އެމްޓީސީސީން އަންނަނީ ދިއްފުށީގެ ބިން ހިއްކުމާއި ގޮނޑުދޮށް ހިމާޔަތްކުރުމުގެ 157.33 މިލިއަން ރުފިޔާގެ ބޮޑު މަޝްރޫޢު ވެސް ހިންގަމުންނެވެ.