ގައްޒާ ސުންނާފަތިކޮށްފައިވާ މަންޒަރުތަކާއެކު، އަވަސް އެހީ ފޯރުކޮށްދިނުމަށް އެންޖެލީނާ ޖޯލީ ގޮވާލައިފި

އިސްރާއީލުން ގައްޒާއަށް ދެމުންގެންދާ ހަމަލާތަކުގައި އެ ސިޓީ އެއްކޮށް ސުންނާފަތިވެފައިވާ މިންވަރު ދައްކުވައިދޭ ސެޓެލައިޓް ފޮޓޯތަކެއް ހިއްސާކޮށް، ފިނި މޫސުން ކައިރިވަމުން އަންނާތީ ގައްޒާގެ ރައްޔިތުންނަށް އަވަސް އިންސާނީ އެހީތެރިކަމާއި ބޯހިޔާވަހިކަން ފޯރުކޮށްދިނުމަށް މަޝްހޫރު ހޮލީވުޑް ބަތަލާ އަދި އދ. ގެ ކުރީގެ ގުޑްވިލް އެމްބެސެޑަރު، އެންޖެލީނާ ޖޯލީ ގޮވާލައިފިއެވެ.

އޮސްކާ އެވޯޑް ހާސިލްކޮށްފައިވާ އުމުރުން 51 އަހަރުގެ ޖޯލީ، ހޮނިހިރު ދުވަހު އޭނާގެ އިންސްޓަގްރާމް މެދުވެރިކޮށް ވަނީ ހަނގުރާމައިގެ ކުރިންނާއި ފަހުން ގައްޒާގެ އެކި އަވަށްތައް އޮތް ގޮތް ދައްކުވައިދޭ ސެޓެލައިޓް ފޮޓޯތަކެއް އާންމުކޮށްފައެވެ.

މި ފޮޓޯތަކާއެކު ޖޯލީ ލިޔެފައިވަނީ، ގޫގުލް އާތު ހުޅުވާލުމުން ގައްޒާއަށް ލިބިފައިވާ ބޮޑެތި ގެއްލުންތައް މިހާރު ފެންނަން އެބަހުރި ކަމަށެވެ. އެގޮތުން މުޅި އަވަށްތައް އެއްކޮށް ސުންނާފަތިވެ، ވެއްޔަށްވެފައިވާ ކަމަށާއި، ގެދޮރާއި، ސްކޫލްތަކާއި، ޔުނިވަރސިޓީތަކާއި، ހޮސްޕިޓަލްތަކުގެ އިތުރުން މަގުތަކާއި ފެނާއި ނަރުދަމާގެ ނިޒާމު ފަދަ އިންސާނުން ދިރިތިބުމަށް ކޮންމެހެން ބޭނުންވާ ވަސީލަތްތައް ހަލާކުކޮށްލާފައިވާ ކަމަށް އޭނާ ފާހަގަކުރިއެވެ.

މިދިޔަ ހަފްތާގައި އާންމުވި މި އައު ސެޓެލައިޓް ފޮޓޯތަކުން މުޅި ސަރަހައްދު ސުންނާފަތިވެފައިވާ މިންވަރު ފެނި، ގިނަ ބަޔަކު ސޯޝަލް މީޑިއާގައި ދަނީ ހިތާމައާއި ކަންބޮޑުވުން ފާޅުކުރަމުންނެވެ. އދ. ގެ ސެޓެލައިޓް ސެންޓަރުގެ ހޯދުންތަކާ ހަވާލާދީ ޖޯލީ ބުނީ، ޖޫން މަހުގެ 16 ވަނަ ދުވަހާ ހަމައަށް ގައްޒާގެ އިމާރާތްތަކުގެ 82 އިންސައްތަ އަށް ގެއްލުން ލިބިފައިވާއިރު، އޭގެ ތިންބައިކުޅަ ދެބައި އިމާރާތް ވަނީ އެއްކޮށް ބިމާހަމަވެފައެވެ.

މީގެއިތުރުން ފިނި މޫސުން އަންނައިރު ފަލަސްތީނުގެ ރައްޔިތުން ތަހައްމަލުކުރަމުންދާ އިންސާނީ ކާރިސާއަށް އަލިއަޅުވާލަމުން ޖޯލީ ބުނީ، ގައްޒާގެ އާބާދީގެ 94 އިންސައްތަ ނުވަތަ 1.98 މިލިއަން މީހުންނަށް ބޯހިޔާވަހިކަމުގެ އެހީތެރިކަމާއި ޒަރޫރީ ސާމާނު ބޭނުންވެފައިވާ ކަމަށެވެ. ނަމަވެސް އެހީގެ ސާމާނު ވެއްދުމަށް އަދިވެސް ގިނަ ހުރަސްތަކަކާއި ލަސްތަކެއް ކުރިމަތިކުރުވަމުންދާ ކަމަށް އޭނާ ފާހަގަކުރިއެވެ.

އާންމު ރައްޔިތުންނަށް ބޭނުންވާ މިންވަރަށް އިންސާނީ އެހީ ފޯރުކޮށްދިނުމަށާއި، ހޮސްޕިޓަލްތަކަށް ބޭނުންވާ ސިއްހީ ސާމާނު ލިބޭނެ މަގު ތަނަވަސްކޮށްދިނުމަށް ޖޯލީ ވަނީ ގޮވާލާފައެވެ. އަދި ފަލަސްތީނުގެ ރައްޔިތުންނަށް އެމީހުންގެ ގެދޮރާއި، ސްކޫލްތަކާއި، ހޮސްޕިޓަލްތައް އަލުން އާރާސްތުކުރެވޭނެ ފަދަ މާހައުލެއް ގާއިމުކޮށްދިނުމަށްވެސް އޭނާ ގޮވާލިއެވެ.

މިއީ ގައްޒާގެ އަނިޔާވެރިކަމާއި ފަލަސްތީނުގެ ރައްޔިތުންގެ ހައްގުގައި އަޑުއުފުލައި، އެންޖެލީނާ ޖޯލީ އޭނާގެ މަގުބޫލުކަން ބޭނުންކޮށްގެން ދުނިޔޭގެ ސަމާލުކަމަށް މި މައްސަލަ ގެނައި ފުރަތަމަ ފަހަރު ނޫންކަން ފާހަގަކޮށްލެވެއެވެ.