އޭޝިއަން ކަޕް ކޮލިފައިންގައި ރާއްޖެ ހިމެނޭ ގްރޫޕުގައި އެންމެ ވަރުގަދައީ ތަޖިކިސްތާން

ސައުދީ އަރަބިއްޔާގައި 2027 ވަނަ އަހަރު ބާއްވާ އޭއެފްސީ އޭޝިއަން ކަޕް ކޮލިފަޔާސްގެ ތިންވަނަ ބުރުގެ ގުރުއަތު ނެގުން ހޯމަ ދުވަހު، މެލޭޝިއާގެ ކުއަލަ ލުމްޕޫރުގައި ހުންނަ އޭއެފްސީ ހައުސްގައި ބާއްވައިފިއެވެ. މި ބުރުގައި އޭޝިއަން ކަޕުގެ 6 ޖާގަ ހޯދުމަށް 24 ޓީމަކުން ވާދަކުރާނެއެވެ.

މި ބުރުގައި ހިމެނޭ 24 ޓީމު 6 ގްރޫޕަކަށް ބަހާފައިވާއިރު، މި ބުރުން އޭޝިއަން ކަޕަށް ކޮލިފައިވާނީ ގްރޫޕްގެ އެއްވަނަ ހޯދާ ޓީމެވެ. ރާއްޖެ ހިނެމޭ ގްރޫޕް-އޭ ގައި ދެން ހިމެނެނީ ތަޖިކިސްތާން، ފިލިޕީންސް އަދި ޓީމޯރ ލާސްޓޭއެވެ. 

ކޮންމެ ގްރޫޕެއްގައި ހިމެނޭ ޓީމުތަކެއް ވެސް މެޗުތައް ކުޅޭނީ 'ހޯމް އެންޑް އަވޭ' އުސޫލުންނެވެ. އަދި ރާއްޖެ ކުޅޭ ފުރަތަމަ މެޗު މާޗު މަހުގެ 25 ގައި ފިލިޕީންސް އާއި ކުޅުމަށް ހަމަޖެހިފައިވާއިރު، އެ މެޗު އޮންނާނީ ރާއްޖޭގައެވެ. 

މި މުބާރާތުގައި ރާއްޖެ ހިމެނޭ ގްރޫޕުގެ ހުރިހާ ޓީމަކާއި ވެސް ކުރިން މެޗުތައް ކުޅެފައިވެއެވެ. އެގޮތުން ފިލިޕީންސްއާ ދެކޮޅަށް އޭއެފްސީ ޗެލެންޖު ކަޕުގެ ސެމީ ފައިނަލުގައި 2014 ވަނަ އަހަރު ކުޅުނުއިރު، އެ މެޗުން ރާއްޖެ ބަލިވީ 3-2 އިންނެވެ. 

އޭޝިއަން ކަޕް ކޮލިފައިންގައި ރާއްޖެ ހިމެނޭ ގްރޫޕްގެ އެންމެ ރޭންކިން ރަގަޅު ތަޖިކިސްތާނާ މީގެ ކުރިން ތިން ފަހަރެއްގެ މަތިން ކުރިމަތިލާފައިވެއެވެ. އެގޮތުން 1998 ވަނަ އަހަރު އޮތް އޭޝިއަން ގޭމްސްގެ މެޗަކާއި 2011 ވަނަ އަހަރާއި 2015 ވަނަ އަހަރު ކުޅުނު އެކުވެރިކަމުގެ މެޗު ހިމެނެއެވެ. އޭޝިއަން ގޭމްސް މެޗުގައި ރާއްޖެ 3-0 އިން ބަލިވިއިރު، 2011 ވަނަ އަހަރު ކުޅުނު މެޗު އެއްވަރުވެފައި ވަނީ 0-0 އިންނެވެ. އަދި 2015 ގައި ކުޅުން މެޗުން ރާއްޖެ ބަލިވީ 2-0 އިންނެވެ. 

ޓީމޯރ ލާސްޓޭއާ ރާއްޖެއިން ބައްދަލުކޮށްފައިވަނީ އެންމެ ފަހަރަކުއެވެ. އެގޮތުން 2014 ވަނަ އަހަރުގެ އޭޝިއަން ގޭމްސްގައި މި ދެ ޓީމު ބައްދަލުކުރި މެޗު 3-2 އިން ކާމިޔާބުކުރީ ރާއްޖެއެވެ. 

މި މުބާރާތް ބޯމަތިވެފައި އޮތް އިރު، ރާއްޖޭގެ ގައުމީ ޓީމަށް އޮތް އެންމެ ބޮޑު ގޮންޖެހުމަކީ، ރާއްޖޭގެ ފުރަތަމަ ޑިވިޝަނުގެ ފުޓްބޯޅަ ހުއްޓިފައި އޮތުމެވެ. ރާއްޖޭގައި ފުރަތަމަ ޑިވިޝަންގެ މެޗެއް ނުކުޅޭތާ މިހާރު އަހަރަކާ ގާތް ވެއްޖެއެވެ. 

އެންމެ ފަހުން އެފްއޭއެމްއިން ޓީމުތަކާއި ހިއްސާކުރި ޑްރާފްޓް ކަލަންޑަރުގައި ފުރަތަމަ ޑިވިޝަން އަލުން ފެށުމަށް ނިންމާފައިވަނީ އަންނަ ޖެނުއަރީ މަހުގެ ފަހުކޮޅުއެވެ. ނަމަވެސް މިހާތަނަށް ފަރިތަކުރުންތައް ފަށާފައިވަނީ، ދިވެހި ލީގުގެ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަންއެވެ. 

ރާއްޖޭގެ ގައުމީ ޓީމު ގިނަ ދުވަސްތަކަކަށްފަހު އެންމެ ފަހުން ކުޅެފައިވަނީ މިދިޔަ މަހު ބަނގުލަދޭޝްއާ ދެކޮޅަށެވެ. ބަނގުލަދޭޝްއާ ދެ މެޗެއް ކުޅެފައިވާއިރު، ފުރަތަމަ މެޗުން 1-0 އިން ރާއްޖެ މޮޅުވިއިރު، ދެވަނަ މެޗުން ރާއްޖެ ވަނީ 2-1 އިން ބަލިވެފައެވެ.