ފުލުހުންގެ ތަރުޖަމާނަކަށް ޝިޔާމް ހަމަޖައްސައިފި

ދިވެހި ފުލުހުންގެ ހިދުމަތުގެ ރަސްމީ ތަރުޖަމާނުގެ މަގާމަށް އިންސްޕެކްޓަ އޮފް ޕޮލިސް އަހުމަދު ޝިޔާމް މިއަދުން ފެށިގެން ހަމަޖައްސައިފިއެވެ.

 ޝިޔާމް މި މަގާމާ ހަވާލުވެވަޑައިގަތީ، މީގެ ކުރިން ތަރުޖަމާނުގެ މަސްއޫލިއްޔަތު އަދާކުރެއްވި ސުޕްރިންޓެންޑެންޓް އޮފް ޕޮލިސް އާރިފްގެ ބަދަލުގައެވެ.

ފުލުހުން ވިދާޅުވި ގޮތުގައި މި ބަދަލާ ގުޅިގެން، ދިވެހި ފުލުހުންގެ ހިދުމަތުގެ ފަރާތުން މީޑިއާތަކަށް މައުލޫމާތު ދެއްވުމާއި އާންމު ހޭލުންތެރިކަން އިތުރުކުރުމުގެ މުއާމަލާތްތަކުގައި އެންމެ އިސްކޮށް ދެން ހަރަކާތްތެރިވެ ވަޑައިގަންނަވާނީ ޝިޔާމެވެ. ޝިޔާމަކީ މީގެކުރިން ވެސް ފުލުހުންގެ މީޑިއާ ޑިޕާޓްމަންޓުގައި މަސައްކަތް ކުރެއްވިއިރު، މީޑިއާތަކާ ގާތް ގުޅުމެއް ބާއްވަމުން ގެންދެވި ބޭފުޅެކެވެ.

ފުލުހުންގެ ވަޒީފާއިން މީގެ 12 އަހަރު ކުރިން ވަކިކުރި ޝިޔާމަށް އަލުން ވަޒީފާދޭން ހައި ކޯޓުން މިދިޔަ އޭޕްރީލް 16 ގައި ވަނީ ހުކުމް ކޮށްފައެވެ. އަދި އޭގެ ދުވަސްތަކެއް ފަހުން އޭނާއަށް އަލުން ވަޒީފާ ވަނީ ދީފައެވެ. މެއި 2014 ގައި ޝިޔާމް ފުލުހުންގެ ވަޒީފާއިން ވަކިކުރީ ނޯތު ޕޮލިސް ޑިވިޝަންގެ ކޮމާންޑަރެއްގެ ގޮތުގައި ހުންނަވައި މަގާމުގެ ނުފޫޒު ބޭނުންކޮށްގެން އަމަލުތަކެއް ހިންގެވި ކަމަށް ތުހުމަތުކޮށެވެ.

އެ މައްސަލަ ޝިޔާމްގެ ފަރާތުން ސިވިލް ކޯޓަށް ހުށަހެޅުމުން އެ ކޯޓުން އޭނާއާ ދެކޮޅަށް ނިންމި ނަމަވެސް، ހައި ކޯޓުގައި އިސްތިއުނާފް ކުރުމުން ހައި ކޯޓުން ވަނީ ފުލުހުންގެ ޑިސިޕްލިނަރީ ބޯޑުގެ ނިންމުން ބާތިލްކޮށްފައެވެ. ހައި ކޯޓުގެ ހުކުމުގައި ބުނެފައިވަނީ ޝިޔާމް ވަޒީފާއިން ވަކިކުރަން ފުލުހުންގެ ޑިސިޕްލިނަރީ ބޯޑުން ނިންމުމުގައި ރިއާޔަތްކުރި ހެއްކަކީ ކޮބައިކަން އެނގޭނެ ހެއްކެއް ކޯޓަށް ދައްކާފައި ނުވާ ކަމަށެވެ.

މީގެއިތުރުން، ޝިޔާމަށް ވަޒީފާ އަލުން ދިނުމަށް ކުރި ހުކުމުގައި، އޭނާ ވަކިކުރި ދުވަހުން ފެށިގެން ވަޒީފާ އަނބުރާ ދިނުމާ ހަމައަށް ލިބެންޖެހޭ މުސާރަ އާއި އިނާޔަތްތައް ދިނުމަށް ވެސް ކޯޓުން ވަނީ އަންގާފައެވެ.