ގޯލްޑް ކަޕް: ވަރުގަދަ އޭދަފުށްޓަށް މާފުށި ހިފަހައްޓައެއް ނުލެވުނު

ނައިންޓީ ޕްލަސް ގޯލްޑް ކަޕްގެ ދެވަނަ ބުރުގެ ދެވަނަ މެޗުގައި މާފުށިން އޭދަފުށީގެ މައްޗަށް ކުރިހޯދައިފިއެވެ. ގްރޫޕް-އެފްގެ ދެ ޓީމު ބައްދަލުކުރި މި މެޗު މާފުށިން ކާމިޔާބުކުރީ 2-0 އިންނެވެ.

އޭދަފުށްޓަކީ މުބާރާތުގެ ފުރަތަމަ ބުރުގައި ސައްތަ އިން ސައްތަ ރެކޯޑާއިއެކު ހުރިހާ މެޗަކުން މޮޅުވި ދެ ޓީމުގެ ތެރެއިން އެއް ޓީމެވެ. ނަމަވެސް އެ ރެކޯޑަކާއެކު ހުރިހާ މެޗަކުން މޮޅުވެގެން ދެވަނަ ބުރަށް ދަތުރުކުރި ފުވައްމުލަކު ސިޓީއަށް ހޯމަ ދުވަހު ހަވީރު ތިމަރަފުށި އަތުން މޮޅު ނުވެވުނުއިރު، މި ރެކޯޑާއެކު ދެވަނަ ބުރަށް ދަތުރުކުރި އޭދަފުށްޓަށް ކުރިމަތިލާން މި ޖެހުނީ ބައްޔަކާއެވެ.

އޭދަފުށިން މުބާރާތުގެ ފުރަތަމަ ބުރުގައި އެގާރަ ގޯލު ކާމިޔާބުކޮށްފައިވާއިރު، އެ ޓީމުގެ ކޮޅަށް ވަދެފައިވަނީ އެންމެ ގޯލެކެވެ. އެހެންކަމުން ފުރަތަމަ ބުރުގައި އެންމެ ރަގަޅު ޑިފެންސިވް ރެކޯޑެއް ވެސް އޮތީ އެ ޓީމުގެ އަތުގައެވެ. 

ރޭގެ މެޗުގައި މާފުށިން ލިޑުނެގީ ފުރަތަމަ ހާފުގެ 33 ވަނަ މިނެޓުގައެވެ. މި ގޯލު ކާމިޔާބުކުރީ  ފުރަތަމަ ޑިވިޝަނުގައި ސުޕަ ޔުނައިޓެޑް ސްޕޯޓްސް (ސަސް) އަށް ކުޅޭ އިބްރާހިމް އަތީގް ހަސަންއެވެ. މި ހާފުގައި އެ ޓީމަށް ލީޑު ފުޅާ ކުރުމަށް ލިބުނު ފުރސަތު ވަނީ މުސްރިފު މޫސާގެ އަތުން ބޭކާރުވެފައެވެ.

މި މެޗުގައި މާފުށީގެ ލީޑު ފުޅާ ކުރީ، ބަދަލު ކުޅުންތެރިއެއްގެ ގޮތުގައި ކުޅެން ނިކުތް އިސްމާއިލް މަފާޒް އިބްރާހިމް ކާމިޔާބުކުރި ގޯލަކުންނެވެ.

މެޗުގެ ގޯލުތަކަށް ވުރެން ސޯޝަލް މީޑިއާގައި އެންމެ ވައިރަލްވެފައިވަނީ އޭދަފުށީގެ ގޯލްކީޕަރު އަޖުފާން ކުރި ނުރައްކާތެރި ފައުލެވެ. އޭދަފުށީގެ ޕެނަލްޓީ އޭރިއާގެ ރޮނގުމަތިން ކަހަލަ ގޮތަކަށް އިދިކޮޅު ޓީމުގެ ކުޅުންތެރިޔާއަށް އަޖުފާނު ފުންމާލާފައި ޖެހި ޓެކުލް އަމާޒުވިއިރު، އޭނާ ވަނީ ރަތް ކާޑު ދައްކާ ދަނޑުން ފޮނުވާލާފައެވެ. 

ދެވަނަ ބުރުގައި 3 ޓީމާއެކު 4 ގްރޫޕެއް ހިމެނޭއިރު، ކޮންމެ ގްރޫޕަކުން ވެސް ދެ ޓީމެއް ކުއާޓާ ފައިނަލަށް ދަތުރު ކުރާނެއެވެ. 

މި މުބާރާތުގެ ދެ މެޗު މިއަދު ވެސް ކުޅޭނެއެވެ. ފުރަތަމަ މެޗުގައި މިއަދު ހަވީރު އައްޑޫ އާއި ދ. މީދޫ ބައްދަލުކުރާއިރު، މިރޭ ކުޅޭ ދެވަނަ މެޗުގައި ބައްދަލު ކުރާނީ އަލިފުއްޓާއި ކުރެންދޫއެވެ.