ޗާލްސް ޑާވިންގެ ނަމުން މަޝްހޫރު ކުދި ބޮއްތަކެއް ޗިލީން ލަންޑަނަށް ގެނެއްސި

މިދިޔަ ދުވަސްތަކެއްގެ ތެރޭގައި ޗިލީގެ ޖަނުވާރުތައް ހިމާޔަތްކުރާ ފަރާތްތަކުން ކުރި މަސައްކަތަކުން، ޗާލްސް ޑާވިންގެ ނަމުން މަޝްހޫރު ކުދި ބޮއްތަކެއް ލަންޑަނަށް ގެނެވިއްޖެއެވެ. މި ބޮއްތައް ގެނެވުނީ ޗިލީގެ ޕާކެ ޓަންޓަވުކޯ ފޮރެސްޓްގައި އުޅޭ މި ބާވަތުގެ ބޮއް ނެތިދިއުމުގެ ބިރު އޮތުމާ ގުޅިގެންނެވެ.

މި ބޮއްތަކަށް ނުރައްކާވެފައިވަނީ އިންސާނުންގެ ސަބަބުން ފެތުރޭ ޗައިޓްރިޑް ފަންގަސްގެ ސަބަބުންނެވެ. މި ބަލީގެ ސަބަބުން އެންމެ އަހަރެއްގެ ތެރޭގައި މި ބޮކުގެ އާބާދީ 90 އިންސައްތައިން ދަށަށް ގޮސްފައިވެއެވެ. މި ހާލަތުގައި ބާކީ ތިބި ބޮއް ސަލާމަތްކުރުމަށްޓަކައި ލަންޑަން ޒޫއިން އިސްނަގައިގެން ކުރި މަސައްކަތުން މި ބޮއް ލަންޑަނަށް ގެނެވުނެވެ. މިއީ މި ބޮކުގެ ނަސްލު އިތުރުކޮށް، އިތުރަށް ދިރާސާކުރުމަށް ކުރެވުނު މަސައްކަތެކެވެ.

މި ބޮކަކީ 1834 ވަނަ އަހަރު ޗާލްސް ޑާވިން އެންމެ ފުރަތަމަ ދިރާސާކޮށް ރިކޯޑުކުރި ބާވަތެކެވެ. މި ބޮކުގެ ބަރުދަނަކީ 2 ގްރާމަށްވުރެ ކުޑަ އަދި ދިގުމިނުގައި 3 ސެންޓިމީޓަރަށްވުރެ ކުޑަ ޖަނަވާރުތަކެކެވެ. މި ބާވަތުގެ ބޮއްތަކުގެ ޚާއްޞަ ކަމަކީ ފިރިހެން ބޮއް ބަނޑުބޮޑުވެ، ބިސްތައް އޭގެ  ކޮތަޅުގައި އުފުލައި، ބިސްތައް ބޮޑުވެ ބޮއް ބޮޑު ވަންދެން ބަލަހައްޓާކަމެވެ.

ލަންޑަން ޒޫއިން ބުނާ ގޮތުގައި މި ދަތުރުގައި ގެނެވުނު 53 ބޮކުގަ ވެސް ރަނގަޅު ޞިއްޙަތެއްގައި ލަންޑަނަށް ވަނީ ގެނެވިފައެވެ. އަދި ބައެއް ބޮއް ވަގުތުން ވީސްލް އަޑު ނެރެން ފަށާފައިވާކަމަށް ބުނެފައިވެއެވެ. މިއީ އެ ބޮއް އައު މާހައުލާ ގުޅިފައިވާކަމުގެ ނިޝާނެއް ކަމަށް ލަންޑަން ޒޫއިން ބުނެފައިވެއެވެ.