ގޯލްޑް ކަޕް: ޓީމު ވަރުގަދަ ކުރުމަށް އެއްލައްކަ ދިނުމަށްފަހު އައްޑޫއިން އިއްބެގެ ރިލީޒް ހޯދައިފި

ނައިންޓީ ޕްލަސް ގޯލްޑް ކަޕުގައި މިއަދު ހަވީރު އައްޑޫ ސިޓީ އިން ދ. މީދޫއާ ދެކޮޅަށް ނިކުތުމުގެ ކުރިން، އެ ޓީމު އިތުރަށް ވަރުގަދަ ކުރުމުގެ ގޮތުން ފުރަތަމަ ޑިވިޝަނުގެ އީގަލްސްއަށް ކުޅެމުންއަންނަ އެ އަތޮޅަށް ނިސްބަތްވާ އިބްރާހީމް މަހުދީ ހުސެއިން (ފޭދޫ އިއްބެ)ގެ ރިލީޒް ހޯދައިފިއެވެ. 

ގޯލްޑް ކަޕަކީ ފައިދާހުރި މުބާރާތެއް ނޫންކަމަށް ބުނެ، އީގަލްސް އިން ވަނީ އެ ކްލަބުގެ ކޮންޓްރެކްޓުގައި ތިބި ކުޅުންތެރިންނަށް މި މުބާރާތުގައި ކުޅުމުގެ ހުއްދަ ނުދީފައެވެ. ނަމަވެސް، އެ ކްލަބަށް ނިސްބަތްވާ ބައެއް ކުޅުންތެރިންގެ ރިޒީލްއަށް އެދެމުން ދިއުމުން، 200،000ރ. (ދެ ލައްކަ ރުފިޔާ)ގެ ރިލީޒް ފީ އަކާއެކު ކުޅުންތެރިން ދޫކުރާނެ ކަމަށް އެ ކްލަބުން ހާމަކުރިއެވެ. އަދި އޭގެ ފަހުން، އެ ކްލަބުން ވަނީ ފީ ކުޑަކޮށްދީފައެވެ. 

ކްލަބުގެ އޮފިޝަލަކާ ހަވާލާދީ، މިހާރުގައި ރިޕޯޓުކޮށްފައިވާ ގޮތުގައި އީގަލްސްއިން ފޭދޫ އިއްބެ ދޫކޮށްފައިވަނި 100،000ރ. (އެއްލައްކަ ރުފިޔާ) ރިލީޒް ފީ އަކަށެވެ. އަދި މި ފައިސާ އައްޑޫ އިން އީގަލްސްއަށް ދައްކާފައިވާކަމަށް ވެސް ރިޕޯޓުކޮށްފައި ވެއެވެ.

އައްޑޫ ސިޓީ ދެވަނަ ބުރަށް ކޮލިފައިވީ 5 ޕޮއިންޓާއެކު ގްރޫޕް-ސީގެ އެއްވަނަ ޓީމުގެ ގޮތުގައެވެ. ނަމަވެސް އެ ޓީމު ފުރަތަމަ ބުރުގައި މޮޅުވެފައިވަނީ އެންމެ މެޗަކުންނެވެ. އަނެއް ދެމެޗު ވަނީ 1-1 އިން އެއްވަރުވެފައެވެ. އެހެންކަމުން، އެ ޓީމާ އިއްބެ ގުޅުމަކީ، ޓީމުގެ ސްކޯރިންގ ރަގަޅު ކުރުމަށް ލިބޭ ވަރަށް ބޮޑު ބާރަކަށް ވާނެއެވެ.

އިއްބެގެ އިތުރުން، އޭދަފުށި ޓީމުގައި ހިމެނޭ އީގަލްސްގެ މިޑްފީލްޑަރު ނިޝާމް މުހައްމަދު ރަޝީދު (ޕޮގް) ވެސް މިހާރު ވަނީ އެ ކްލަބުން ރިލީޒްކޮށްފައެވެ. ނަމަވެސް އޭނާގެ ރިލީޒް ފީ އޭދަފުށިން ހާމަކޮށްފައެއް ނުވެއެވެ. 

އީގަލްސްއިން ރިލީޒްކުރި ނަމަވެސް، ދެވަނަ ބުރުގައި އޭދަފުށިން ކުޅުނު ފުރަތަމަ މެޗުގައި ޕޮގް ކުޅެފައެއް ނުވެއެވެ. އެ ކްލަބުގެ އޮފިޝަލަކު ހާމަކޮށްފައިވާ ގޮތުގައި، ދެވަނަ ބުރުގެ ދެވަނަ މެޗުގައި އޭނާ ކުޅޭނެއެވެ.

ޕޮގްއާއެކު އޭދަފުށިން ދެވަނަ ބުރުގައި ކުޅޭ ދެވަނަ މެޗު އެ ތީމަށް ވަރަށް މުހިންމު ވާނެއެވެ. ފުރަތަމަ މެޗުގައި މާފުއްޓާއި ކުޅެ 2-0 އިން ބަލިވެފައިވުމުން، އެ މެޗުގައި އޭދަފުށިން ޖެހޭނީ ދިއްދޫ ބަލިކުރާށެވެ. އެހެން ނޫންނަމަ، ކުއާޓާ ފައިނަލުން ޖާގަ ނުލިބި، އޭދަފުއްޓަށް ޖެހޭނީ މުބާރާތާއި އަލްވަދާއު ކިޔާށެވެ.