އެމްޑީޕީގެ ޗެއާޕާސަންގެ ވާހަކަތަކަކީ ޓެރަރިޒަމަށް ހިތްވަރުދިނުން: މަޖިލީހުގެ ރައީސް

ރާއްޖޭގެ ފުރަތަމަ ރައީސް މުހައްމަދު އަމީނަށް ހެދިހެން ހަދަން ޖެހޭ ކަމަށް ބުނެ އެމްޑީޕީގެ ޗެއާޕާސަން ފައްޔާޒު އިސްމާއިލް ދެއްކި ވާހަކައަކީ ޓެރަރިޒަމަށް ހިތްވަރު ދިނުން ކަމަށާއި، އެކަން ސީރިއަސް މައްސަލައެއްގެ ގޮތުގައި ބަލަން ޖެހޭ ކަމަށް ރައްޔިތުންގެ މަޖިލީހުގެ ރައީސް އަބްދުލްރަހީމް އަބްދުﷲ ވިދާޅުވެއްޖެއެވެ.

އެމްޑީޕީން ކުޅުދުއްފުށީގައި ބޭއްވި ޖަލްސާއެއްގައި ރައީސް އަމީންއަށް ރައްޔިތުން ހެދި ގޮތް ރައީސް މުޢިއްޒަށްވެސް ހަދަން ޖެހިދާނެ ކަމަށް ބުނެ މީހަކު ވާހަކަ ދެއްކުމާ ގުޅިގެން ފުލުހުން އެ މައްސަލަ ބަލަން ފަށާފައި ވަނިކޮށް، ފައްޔާޒް ވަނީ އެކަން ދިފާއު ކޮށް ވާހަކަ ދައްކާފައެވެ.

ފައްޔާޒް ބުނި ގޮތުގައި ރާއްޖޭގެ ތާރީޚުގައި ހިނގާފައިވާ ކަންކަން ވެރިންނަށް ހަނދާން ކޮށްދިނުމަކީ ކޮންމެހެން ކުރަންޖެހޭ ކަމެކެވެ. އަދި ރައީސް މުޢިއްޒަށް ވެސް އޮތް ގޮތަކީ ރައީސް އަމީނަށް ހެދިގޮތް ހެދުން ކަމަށް ދޭހަވާގޮތަށް ފައްޔާޒް ވަނީ އިންޒާރުދީފައެވެ.

މަޖިލީހުގެ ރައީސް އަބްދުލްރަހީމް އަބްދުﷲ ކުރެއްވި ޕޯސްޓެއްގައި ވިދާޅުވެފައިވަނީ މިއީ ކަނޑައެޅިގެން ޓެރަރިޒަމަށް ހިތްވަރުދިނުން ކަމަށާއި، ކަމާގުޅޭ މުއައްސަސާތަކުން ވަރަށް ސީރިއަސްކަމާއެކު އެ މައްސަލަ ވަގުތުން ބަލަންޖެހޭ ކަމަށެވެ. އަދި އިދިކޮޅު ސިޔާސީ ޕާޓީގެ އެންމެ އިސް މަގާމުގައި ހުންނެވި ބޭފުޅަކު މިފަދަ ވާހަކައެއް ދެއްކުމަކީ އާދައިގެ ކަމެއް ކަމަށް ބަލައިގެންނުވާނެ ކަމަށް ވެސް އަބްދުލްރަހީމް ވަނީ ވިދާޅުވެފައެވެ.

ރައީސް އަމީންގެ ކާފަ ދަރިކަނބަލުން ޑރ. ފަރަހަނާޒް ފައިޒަލް ވެސް ވަނީ ފައްޔާޒްގެ ވާހަކަތައް ކުށްވެރިކުރައްވާފައެވެ. އޭނާ ވިދާޅުވީ މީހުން ހަވަރަށް ދީ "މަރަން" ތާއީދުކޮށް ފައްޔާޒް ދައްކާފައިވަނީ އިސްލާމީ ހަމަތަކުންވެސް ބޭރު ވާހަކައެއް ކަމަށެވެ.

މި މައްސަލަ މިހާރު މަޖިލީހަށް ހުށަހަޅާފައިވާއިރު، ވަޒީރުންނާއި މަޖިލިސް މެންބަރުން ހިމެނޭހެން ގިނަ ބަޔަކު ދަނީ ފައްޔާޒްގެ ވާހަކަތަކާއި ގުޅިގެން ކަންބޮޑުވުން ފާޅުކުރަމުންނެވެ.