ސައިންސް
ރޯގާއަށް ގޭގައި ބޭނުންކުރެވޭ ފަރުވާ ހަޤީގަތުގަވެސް ރޯގާ ލުއިކޮށްދޭތަ؟

ރޯގާއަށް ގޭގައި ފަރުވާކުރަން ބޭނުންކުރާ ބައެއް ތަކެތި ފޮޓޯ:އިންޓަނެޓް
މޮޅެތި އޮރެންޖު ޖޫހުން ފެށިގެން ޒިންކް ލޮޒެންޖަސްއާ ހަމައަށް، ކުކުޅު ސޫޕުން ފެށިގެން ލޮނުމެދު ކެޕްސިއުލްއާ ހަމައަށް، އާންމު ރޯގައަށް ގޭގައި ބޭނުންކުރެވޭ އެތައް ފަރުވާއެއް އެބަހުރެއެވެ. އެހެނަސް މި ފަރުވާތައް މަސައްކަތްކުރާކަމުގެ އެއްވެސް ހެއްކެއް އެބަހުރިތޯއެވެ؟

ކުކުޅު ސޫޕް
ރޯގާ ޖެހުމަކީ ހުރިހާ މީހުންނަށްވެސް ދިމާވާ އާންމު ކަމެކެވެ. އަދި މިބަލި ޖައްސާ 200 އެއްހާ ވައިރަސް ހުރިއިރު، އެއާ ދެކޮޅަށް ބޭނުންކުރާ ގޭގެ ފަރުވާތައްވެސް ހަމަ އެހާ ގިނަ އެވެ. އެހެނަސް މީގެ ތެރެއިން އެއްވެސް ފަރުވާއެއް މަސައްކަތްކުރޭތޯއެވެ؟
ކޮންމެ ގޭގެ ފަރުވާއެއްގެވެސް އަސާސަކީ އެއިން އަޅުގަނޑުމެންގެ ދިފާޢީ ނިޒާމު ވަރުގަދަވާނެ ކަމުގެ ޚިޔާލެވެ. ވައިރަސްއެއް އަޅުގަނޑުމެންގެ ހަށިގަނޑަށް ވަންނަ ހިނދު، އެއާ ދެކޮޅަށް ދެ ދިފާޢީ ނިޒާމެއް މަސައްކަތްކުރެއެވެ: ފުރަތަމަ ނިޒާމަކީ ހަށިގަނޑަށް ވަދެފައިވާ ބޭރުގެ ސެލްތައް ބޭރުކުރަން މަސައްކަތްކުރާ ނިޒާމެވެ. ދެވަނަ ނިޒާމަކީ ހަށިގަނޑަށް ކުރިން ދިމާވެފައިވާ ވަކި ބާވަތެއްގެ ބަލި ޖައްސާ ޖަރާސީމުތަކާ ދެކޮޅަށް މަސައްކަތްކުރާ ނިޒާމެވެ. މި ދެވަނަ ނިޒާމުން އައު ޖަރާސީމުތަކާ ކުރިމަތިލާއިރު، އެ ޖަރާސީމުތަކުގެ މަޢުލޫމާތު ރައްކާކުރާ ސެލްތައް އުފައްދައެވެ. މިގޮތުން އެ ޖަރާސީމުތައް އަނެއްކާ ހަށިގަނޑަށް ވަދެއްޖެނަމަ، އެއާ ދެކޮޅަށް ހަނގުރާމަ ކުރެވޭނެއެވެ.
އަޅުގަނޑުމެންގެ ދިރިއުޅުމުގެ އާދަތަކާއި ކާނާ ގެ ސަބަބުން ދިފާޢީ ނިޒާމުގެ ބާރުގަދަކަމަށް އަސަރުކުރާކަން އެއީ އެނގިފައިވާ ކަމެކެވެ. މިއީ އާންމު ރޯގާ ދުރުކުރުމަށް ބޭނުންކުރާ ގިނަ ފަރުވާތައް ކޮވިޑް-19 ބަލިމަޑުކަމުގެ ތެރޭގައި އަޅުގަނޑުމެން ރައްކާތެރިކުރުމަށް ބޭނުންކުރެވިދާނެ ކަމަށް ބުނެ ސޯޝަލް މީޑިއާގައި ފެތުރުނު ސަބަބެވެ. އެހެންވީމާ، ރޯގާ ނުވަތަ ވައިރަސްއަކާ ދެކޮޅަށް ހަނގުރާމަ ކުރުމަށް ބޭނުންކުރުން އެންމެ ރަނގަޅު ގޭގެ ފަރުވާތަކަކީ ކޮބައިތޯއެވެ؟
ގާލިކް ފަދަ ސަޕްލިމެންޓްތަކުން ވައިރަސްއަކާ ދެކޮޅަށް ހަނގުރާމަ ކުރެވިދާނެތޯއެވެ؟
ދިފާޢީ ނިޒާމު ބަލިކަށިވަނީ އެހެން ގޮތަކުން ދުޅަހެޔޮ މީހުންގެ ކިބައިން ހަމައެކަނި ވިޓަމިން ނުވަތަ މިނަރަލްގެ މަދުކަމެއް ހުރުމުންކަމަށްވާތީ، ކުރިން ރަނގަޅު ކާނާ ލިބެމުން އައި މީހަކަށް ރޯގާ ފަދަ ބައްޔަކާ ދެކޮޅަށް ހަނގުރާމަ ކުރުމަށް ކާނާގެ ބާވަތްތައް އިތުރުކުރުމުން މާބޮޑު ފަރަގެއް ނާންނާނެ ކަމަށް އިމްޕީރިއަލް ކޮލެޖް ލަންޑަންގެ އިންފެކްޝަސް ޑިޒީޒަސް ޑިވިޜަންގެ އިސްވެރިޔާ ޗާލްސް ބެންގްހަމް ވިދާޅުވެއެވެ.
"ހަމައެކަނި ވިޓަމިނެއް، ޒިންކް ނުވަތަ އަޔަން ފަދަ މުހިންމު ކާނާއެއްގެ މަދުކަމެއް ހުރިނަމަ، އެ އެއްޗެއް އިތުރުކުރުމުން ވަރަށް ބޮޑު ފައިދާއެއް ކުރާނެ،" އޭނާ ވިދާޅުވިއެވެ. "އެހެނަސް ހަމަހަމަ ކާނާއެއް ކައިއުޅޭ މީހަކު މިފަދަ އެއްޗެހި އިތުރުކުރުމަކުން ދިފާޢީ ނިޒާމު އިތުރަކަށް ހަރުދަނާއެއް ނުވާނެ."
ކުކުޅު ސޫޕު ފަދަ މަޤްބޫލު ފަރުވާއަކުން އެއްވެސް ފަރަގެއް އާދޭތޯ ބެލުމަށް އިތުބާރުހުރި ދިރާސާއެއް ކުރެވިފައެއް ނުވެއެވެ. އެހެނަސް އާންމު ރޯގާގެ ފަރުވާ ހޯދުމަށް ކުރެވުނު ދިރާސާތަކުން ދައްކާގޮތުގައި (ކާނާގެ ބަދަލުގައި) ސަޕްލިމެންޓްތައް ބޭނުންކުރުން ފައިދާ ކުރެއެވެ.
2016 އަދި 2017 ވަނަ އަހަރުގެ ފިނިމޫސުމުގައި ކުރެވުނު ދިރާސާއަކުން ދެއްކިގޮތުގައި ވިޓަމިން އޭ، ޑީ، ސީ، އީ، ބީ6، ބީ12، ފޮލިކް އެސިޑް، ޒިންކް، ސެލީނިއަމް، ކޮޕަރ އަދި އަޔަން އެކުލެވޭ މަލްޓިވިޓަމިން ބޭނުންކުރުމުން ނޭފަތުން ފެންއައުން އަދި ކެއްސުން ފަދަ ރޯގާގެ އަލާމާތްތައް ފެންނަ މިންވަރާއި މުއްދަތު މަދުވެއެވެ.
ގޭގައި ބޭނުންކުރާ ވަކި މަޤްބޫލު ފަރުވާއެއް ކަމަށްވާ ލޮނުމެދުގެ ފައިދާ ކުރުން އެކަށީގެންވެއެވެ. ކުޑަ ދިރާސާއެއްގައި، 146 ދުޅަހެޔޮ ބޮޑެތި މީހުންނަށް ޕްލެސީބޯއެއް ނުވަތަ ދުވާލަކު އެއްފަހަރު ގާލިކް ސަޕްލިމެންޓެއް ފިނިމޫސުމުގެ 12 ހަފުތާގެ މުއްދަތަކަށް ދެވުނެވެ. ޕްލެސީބޯ ދެވުނު ގްރޫޕަށް 65 ފަހަރު ރޯގާ ޖެހި، ޖުމުލަ 366 ދުވަހު ބަލިވެ އޮންނަން ޖެހުނެވެ. އެހެނަސް ލޮނުމެދު ސަޕްލިމެންޓް ދެވުނު މީހުންނަށް ރޯގާ ޖެހުނީ 24 ފަހަރު އެކަނި ކަމާއި، ބަލިވެ އޮންނަން ޖެހުނީ ޖުމުލަ 111 ދުވަހު އެކަނި ކަމަށް ފާހަގަކުރެވުނެވެ.

ވިޓަމިން ސީ
ރޯގާގެ އަލާމާތްތައް ފެންނަން ފެށުމުން ގިނަ މީހުން ބޭނުންކުރާ އަނެއް ސަޕްލިމެންޓަކީ ވިޓަމިން ސީއެވެ. 2023 ވަނަ އަހަރު ހެކިތައް މުރާޖަޢާކޮށް ބެލިބެލުމުން ދެއްކިގޮތުގައި ވިޓަމިން ސީ ސަޕްލިމެންޓްތައް ބޭނުންކުރުމުން އާންމު ރޯގާގެ މާ ގަދަ ނޫން އަލާމާތްތައް ކަމަށްވާ ނޭފަތުން ފެންއައުމާއި، ކެއްސުމާއި، ކަރުގައި ރިއްސުން ފަދަ ކަންކަން 15 އިންސައްތައެއްހާ މިންވަރަށް މަދުކުރެވެއެވެ. އަދި މި ދިރާސާގެ ނަތީޖާއިން ދައްކާގޮތުގައި ވިޓަމިން ސީ ސަޕްލިމެންޓްތަކުން އާންމު ރޯގާގެ ގަދަ އަލާމާތްތަކަށް އޭގެ އަސަރު އިތުރަށް ފޯރައެވެ.
ވިޓަމިން ސީ ސަޕްލިމެންޓްތަކާ ބެހޭގޮތުން ކުރެވުނު އަނެއް ދިރާސާގެ ދިރާސާވެރިން ނިންމީ، މި ސަޕްލިމެންޓްތަކުގެ ނުރައްކާތެރިކަން ކުޑަވުމާއެކު، އޭގެން ފައިދާއެއް ލިބޭތޯ ބެލުމަށް މަސައްކަތްކުރުން ރަނގަޅުވެދާނެ ކަމަށެވެ.
މޮޅެތި ޖޫހުގެ ފައިދާ އެހާ ބޮޑު ނުވެދާނެއެވެ.
މޮޅެތި ޖޫހުން ރޯގާ ހުއްޓުވުމަށް ނުވަތަ އޭގެ އަލާމާތްތައް ލުއިކުރުމަށް ނުވަތަ ރޯގާގެ މުއްދަތު ކުރުކުރުމަށް ފައިދާކުރާކަން ދައްކުވައިދޭ ވަރުގަދަ ހެއްކެއް ނެތެވެ. މިއީ މޮޅެތި ޖޫހުގައި ދުވާލަކު ބޭނުންކުރާ ސަޕްލިމެންޓްތަކުގައި ހުންނަ މިންވަރަށް ވިޓަމިން ސީ ނުހުންނާތީ ކަމަށް ހެލްސިންކީ ޔުނިވަރސިޓީގެ ޕަބްލިކް ހެލްތު ދިރާސާވެރިޔާ އަދި ވިޓަމިން ސީ ސަޕްލިމެންޓްތަކާ ބެހޭ މުރާޖަޢާގެ މުސައްނިފު ހާރި ހެމިލާ ވިދާޅުވެއެވެ.
އެމެރިކާގެ އެގްރިކަލްޗަރ ޑިޕާޓްމަންޓުން ބުނާގޮތުގައި އާންމު ކުޑަ ފުޅިއެއްގެ މިންވަރުގެ ޖޫހުގައި 72 މިލިގްރާމްގެ ވިޓަމިން ސީ ހުރެއެވެ. މިއީ ދުވާލަކަށް އެންމެ މަދުވެގެން ބޭނުންވާ މިންވަރު ކަމަށްވާ 40 މިލިގްރާމަށްވުރެ ގިނަ ނަމަވެސް، ގިނަ ސަޕްލިމެންޓްތަކުގައި ހުންނަ މިންވަރަށްވުރެ މަދު އަދަދެކެވެ.