ހަނދުގައި ބޭނުންކުރަން ރިސައިކަލްކޮށްގެން އެއްޗެއް އުފައްދައިގެން 3 މިލިއަން ޑޮލަރު ލިބޭ މުބާރާތެއް

ނާސާއިން ހަނދުގައި އަލުން މީހުން އުޅޭ މަރުކަޒެއް ޤާއިމުކުރުމަށް ރާވަމުންދާއިރު، އެތަނުގައި ދިރިއުޅުމަށް ބޭނުންވާ ތަކެތި ވީހާވެސް ބޮޑަށް ބޭނުންކޮށްފައިވާ ތަކެތިން އުފެއްދުމަށް ވަނީ ނިންމާފައެވެ. މިކަމަށްޓަކައި ނާސާއިން ވަނީ 3 މިލިއަން ޑޮލަރުގެ މުބާރާތެއް ކުރިއަށް ގެންދިއުމަށް ނިންމާފައެވެ.

ނާސާގެ ސެންޓެނިއަލް ޗެލެންޖް ޕްރޮގްރާމްގެ ދަށުން ކުރިއަށްގެންދާ "ލޫނަރިސައިކަލް" މުބާރާތުގެ މަޤްޞަދަކީ ހަނދުގައި ބޭނުންކުރެވޭ ތަކެތި އަލުން ބޭނުންކުރެވޭނެ ގޮތްތައް ހޯދުމެވެ. މީގެ ތެރޭގައި ޕްލާސްޓިކް، ދަގަނޑު އަދި އެހެނިހެން މެޓީރިއަލްތައް ހިމެނެއެވެ.

ނާސާގެ ޖެނިފަރ އެޑްމަންސަން ވިދާޅުވި ގޮތުގައި ބިމުން ހަނދަށް އެއްޗެއް ގެންދިއުމަށް ވަރަށް ބޮޑު ޚަރަދެއް ކުރަންޖެހެއެވެ. އެގޮތުން 1 ކިލޯގްރާމް ހަނދަށް ގެންދިއުމަށް 1 މިލިއަން ޑޮލަރަށްވުރެ ބޮޑު އަދަދެއް ޚަރަދުވެއެވެ. އެހެންކަމުން ހަނދުގައި ތަކެތި އަލުން ބޭނުންކުރުމަކީ އިޤްތިޞާދީ ގޮތުން ވަރަށް ފައިދާހުރި ކަމެކެވެ.

މީގެ އިތުރުން ހަނދުގައި ކުނި އުކާލުމުގެ ބަދަލުގައި ތަކެތި އަލުން ބޭނުންކުރުމަކީ ތިމާވެށި ރައްކާތެރިކުރުމަށްވެސް މުހިންމު ކަމެކެވެ. ނަމަވެސް ހަނދުގައި ތަކެތި އަލުން ބޭނުންކުރުމަކީ ގޮންޖެހުންތަކެއް ހުރި ކަމެކެވެ. މީގެ ތެރޭގައި ދަށް ގްރެވިޓީ، ވެކިއަމް އަދި ހަނދުގައި ކުނި ގިނަވުން ހިމެނެއެވެ.

ނާސާއިން މިހާރުވެސް ބައިނަލްއަޤްވާމީ ޖައްވު މަރުކަޒުގައި ފެނާއި ކުނިބުނި އަލުން ބޭނުންކުރުމުގެ ނިޒާމެއް ޤާއިމުކޮށްފައިވެއެވެ. މި ނިޒާމުގެ ދަށުން މިހާރު 98 އިންސައްތަ ފެން އަލުން ބޭނުންކުރެވެއެވެ. ހަނދުގައި ދިރިއުޅޭއިރު މިފަދަ ނިޒާމުތައް ބޭނުންކުރުމަކީ ކޮންމެހެން މުހިންމު ކަމެކެވެ.